Read East Ambae LUK 9 Bible Online

LUK 9 - East Ambae bible

LUK 9

¹I Jisas mo ware bulutegi na nona rorongtagi hangavulu domwagi gairue, ko mo bete na huireana ko a managi lawera goro na vui esi teri ko huri ve ran vagamwasoire segesege.

²Siu nge mo horara ve ran vano ko ran toretore huri ve i God vin voragi Ratahigi, ko huri ve vin vagamwasoire segesege.

³Nge mo veve lawera vena, “Lune nem vano, nen mese hako na gineu mei gimiu, mwere a gaitigo, a tanga, a hinaga, a homu ko ne mese hako luqe ve na gairue.

⁴Lune nem dadari lo qatui venue, nein toga lobena tangaloi ngerehi ram lai vurugegi gimiu, vin dadari lune hi nein mule taligu.

⁵Tare ve nein dadari lo qatui venue rahe lai vurugegi gimiu tea, nen tudori dena vanue ngehi, ko nen heheragi vohogi na qie dena karumiu, a gigilegi lawera.”

⁶Ko ira rorongtagi ram mwalue ram vano lolo vatavataha vanue, ko ram toretoregi na Roro Garea me ram vagamwasoire segesege vataha ute.

⁷Lune i Herot, a ratahigi ta Kalili, mo rongo huri na gineu doluegi i Jisas mo vaire. Ko nge mo ladolado lategi a vevenagi a tangaloi lavasigi ram veve vena, “I Jon Garuhigogona u maraga taligu.”

⁸Nge lavasigi ram ve, “Elaeja u vomai,” ko lavasigi ram ve, “Gatagale denire tangaloi ligoligogi ta tuei u maraga taligu.”

⁹Nge i Herot mo veve vena, “I Jon Garuhigogona nau tei utu na qatune. ?Nge hava tangaloi ngaha nam rogo na roroi gineu teri ngaha huri?” Ko nge u vei leo vena lehi Jisas.

¹⁰Ira gaihora noi Jisas ram mule taligu lobena, ram veve sere lawea huri na gineu doluegi rau vei. Nge mo laire ram vano meie gahera sulo qatui venue lawua hi Betsaeda.

¹¹Lune a sinobu ram rongoe, ram hurie. Nge mo lai vurugeginire ko mo laqagi lawera huri ve God vin voragi nora Ratahigi, ko mo vagamwasoire ngerehi ram taranie ve ran mwaso.

¹²Lune mo tauvuigi mo dodo ira domwagi gairue ram vomai lobei Jisas ram veve vena, “Gon hora mulegi na sinobu huri ve rain vano lategi lolo qatui venue sige lolo talu dalibulu kakarani tagaha ve ran hike hinaga ko ran maturu aie, a vevenagi tagaha a vanue vurogi.”

¹³Nge i Jisas mo veve lawera vena, “Gimiu sibomiu nen bete tea hinaga lawera ran gani.” Ngere ram duvi lawea vena, “A bereti gailime ko a ige gairue hogosie mei gamai. ?Sige gom tarani ve gamai gan vano gan voli hinaga huri na buri sinobu ngaha?”

¹⁴(U tatarise ve a sinobu teri vagalime aie.) I Jisas mo veve lawera nona rorongtagi vena, “Nen veve lawe na sinobu ve ran toga hivo gina burigi, a tangaloi ngavulu gailime vataha na burigi ngerehi.”

¹⁵Ko ira rorongtagi ram vai mwerehi, ram horara ram toga hivo doluegi.

¹⁶Siu i Jisas mo lai na bereti gailime ko a ige gairue, mo dada sueulu, mo vevegareagi God hurie, vunu mo vise vurivurie, mo laie lawe na nona rorongtagi huri ve ran betea lawe na sinobu.

¹⁷Ko ingere doluegi rau geni rau guqe. Siu a nona rorongtagi rau vile bulutegi na maututugi, a gete hangavulu domwagi gairue rau horo.

¹⁸Lo rani gatagale, lune i Jisas u tataro gahea, a nona rorongtagi rau vomai lobena. I Jisas mo hurie vena, “?A tangaloi ram veve ve ineu ihine?”

¹⁹Ram duvi vena, “Lavasigi ram veve ve iniko i Jon Garuhigogona. Ko lavasigi ra ve iniko i Elaeja, ko lavasigi ra ve iniko gatagale denire tangaloi ligoligogi ta tuei u maraga taligu.”

²⁰Ko nge mo huire vena, “?Nge igimiu nem veve ve ineu ihine?” I Bita mo duvi goroe vena, “Iniko i Kraes gom vomai den God.”

²¹Ko i Jisas mo gato gorora siaga ve rain mese veve na gineu hi lawe hine tea.

²²Nge mo veve lawera taligu ve mo eno ve i Netui Tangaloi vin rongagarasi garagara, ko ira tamaragai ko ira muei rugurugu ko ira huhui talo Leo hora noi Mosis rain tuli vohoginie, ko rain vei vagamatea nge vin maraga taligu lo tagui rani gaitolu.

²³Ko i Jisas mo veve lawera doluegi vena, “Tare ve ihine mo tarani vena vomai lo taguku, nge vin lado buleginie sibona, vin weli na nona gai saroutu vataha bongi ko vin hurieu.

²⁴Huri ihine mo tarani vena hako bibi na mwasoana vin vei salaginie, ko ihine mo vagasalagi na mwasoana hurieu vin hako bibie.

²⁵?Huri a tangaloi vin lei na hava gineu u garea tare ve vin qoragi na ure doluegi, nge mo vagasalagi na mwasoana ko vin gagarasi lo tagugi?

²⁶Giniehi, ihine tea mo siesie gi eu me na noku leo, siu ineu i Netui Tangaloi nain siesie ginie lo taro lune nain vomai lo varavaraku ko lo varavarai Tamaku meire engsel gogona.

²⁷A hogo, nam veve lawe gimiu, ve lavasigi denire ram labe tahingaha ran he mate tea vin dadari rain ilo ve i God vin voragi Ratahigi goro na nona tangaloi.

²⁸A wik gatagale lo tagugi i Jisas mo veve na gineu ngerehi, nge mo lai Bita, Jon ko i Jemis meie, ram hage lo vusi huri tataro.

²⁹Lune nge mo tataro, a nagona mo dori ko a luqana mo voragi varavara ko mo mavute.

³⁰Siserigi a tangaloi gairue rom laqalaqa meie, a henara Mosis tona Elaeja,

³¹rom serelue na varavarara ko rom laqa bubugi mei Jisas huri ve vin mwelue dena ure ngaha vahavagi, gena nona mateana vin vei a Jerusalem.

³²I Bita ko a buluine gairue mo lulu mo vomai lure ve ran maturu, nge ram rada, ram lehi Jisas mo varavara ko a tangaloi gairue rom labe meie.

³³Lune ingere rom siregi Jisas, i Bita mo veve lawea vena, “Huqe, u garea ve da toga hano. Ve da vai na vale siusiu gaitolu, gatagale hurigo, gatagale huri Mosis ko gatagale huri Elaeja.” (Nge he ilo tea vurugegi na hava gineu nge mo veve)

³⁴Lune nge mo laqa tau mosigei, a dodo mo vomai mo tango gorora, ko ira rorongtagi ram matagu lune a dodo mo tango gorora.

³⁵A dilogi mo vomai dena dodo hi, mo veve vena, “Ngaha i Netuku, ngehi nau leo wahea. Nen ronghurie!”

³⁶Siu a dilogi mo mautu, i Jisas hogosie aie he. Ira rorongtagi ram toga rorongo huri na gineu hi, ko rahe veve tea lawe hine lo taro hi huri na gineu hi rau leo.

³⁷Maraga robongi ingere ram hivo dena vusi, ko a sinobu lawua ram vomai lobei Jisas.

³⁸A tangaloi gatagale denire sinobu mo ware vena, “Huhui, nam navuhigo, gon lehi netuku, nge a dule gatagale!

³⁹A vui esi mo vaie, nge mo ulo siserigi ko mo matemategi vule, ko a davine mo hale. Ko a vui hi mo vai asiesiginie, nge he sireginie tea vena siseri.

⁴⁰Ko nau hui na nomu rorongtagi ve ran vuro luae, nge rahe vai lei tea.”

⁴¹I Jisas mo duvi lawera vena, “Ei, gimiu ra tangaloi ladosavi ko ira galegaleasi! ?Nain toga mei gimiu vin dadari tagaha? ?Nain gagarasi mei gimiu vin dadari tagaha?” Siu nge mo veve lawe na tangaloi hi vena, “Gon lai netumu vomai tangaha.”

⁴²Siu a mwalakelo hi mo vomai lobei Jisas, a vui esi mo vaie, mo tulie hivo lo tano ko nge mo matemategi vule. I Jisas mo gato goro na vui esi, mo vagamwasoi na mwalakelo hi ko mo betea lawe tamana.

⁴³Ko a sinobu doluegi ram awogi garagara huri na managi noi God. A tangaloi ram awogi tau mosigei huri na gineu doluegi i Jisas mo vaire, siu nge mo veve lawera nona rorongtagi vena,

⁴⁴“Nen mese galuvegi huri na gineu nain veve lawe gimiu! Rain lei i Netui Tangaloi talo limara tangaloi.”

⁴⁵Nge ira rorongtagi rahe ilo tea na leo hi. Nge mo eno hiligi denire huri ve rahe ilo vurugeginie tea, ko ingere ram matagu huri ve ran huie huri.

⁴⁶Ira nona rorongtagi ram vui garogi huri ve ihine hi u lawua garagara denire.

⁴⁷I Jisas nge u ilo vurugegi huri na hava gineu hi ingere ram vui garogi huri, nge mo lai na maresu ko mo labetaginie kakarani lobena,

⁴⁸ko mo veve lawera vena, “Tare ve ihine mo lai vurugegi na maresu ngaha lo henaku, nge mo lai vurugegieu. Ko tare ve ihine mo lai vurugegieu, nge mo lai vurugeginie hi vage u horau vomai. Siu ihine hi u biti den gimiu doluegi, ingeie hi u lawua garagara.”

⁴⁹I Jon mo veve lawe Jisas vena, “Huqe, gau lehi na tangaloi u vuro lue na vui esi lo henamu ko gam gato goroe, a vevenagi ingeie hatie talo noda burigi.”

⁵⁰Nge i Jisas mo veve lawe Jon ko lawera nona rorongtagi lavasigi vena, “Nen mese gato goroe, huri ihine he tavului vuro tea goro gimiu, ingeie mei gimiu.”

⁵¹Siu a bongi mo langa mo rovo huri ve God vin lei Jisas vin hage siu eulu, nge mo ladoutu ve vin maraga vin vano a Jerusalem.

⁵²Nge mo hora na nona gaihora lavasigi ram tomue, siu ingere ram maraga ram vano sulolo vanue gatagale ta Samaria vena ram vai vagatai na gineu doluegi huri Jisas.

⁵³Siu giniehi, ingere ta Samaria rahe lai vurugeginie tea, a vevenagi huri ve ingeie vin vano a Jerusalem.

⁵⁴Lune nona rorongtagi Jemis ko i Jon rom lehe rom veve vena, “?Huqe, tare ve iniko gom tarani gamai ve gam ware sueulu ve God na hora na avi den eulu vena vai vohoginire?”

⁵⁵Nge i Jisas mo tudori ko mo gato gorora.

⁵⁶Siu i Jisas meire nona rorongtagi ram vano lo vanue wagineu.

⁵⁷Lune ingere ram dige lo turegi, a tangaloi gatagale mo veve lawe Jisas vena, “Nain hurigo vataha ute goin vano aie.”

⁵⁸I Jisas mo duvi lawea vena, “A wiriu turu a malangara lure, ko a manu namawe a mwagunire lure, nge i Netui Tangaloi hate tanoi niana.”

⁵⁹Siu nge mo veve lawe na tangaloi wagineu vena, “Gon hurieu.” Nge a tangaloi hi mo veve vena, “Huqe, gon siregieu ve nan vano tomue na tulegi tamaku.”

⁶⁰I Jisas mo duvi vena, “Gon sireginire rau mate beno ran tulegi na nora mateana. Iniko gon vano, gon ngasagi huri na Ute noi God.”

⁶¹A tangaloi wagineu mo veve vena, “Huqe, nain hurigo. “Nge gon siregieu huri ve na vano nain tuletulegi lawe rehavaku.”

⁶²I Jisas mo duvi lawea vena, “Ihine mo tauvuigi mo gahi na talu, siu nge mo kileu doridori, ingeie he tatarise tea mena Ute noi God.”