Read East Ambae JON 1 Bible Online

JON 1 - East Ambae bible

JON 1

¹Tomue siu God mo bei teu na ure, a Leo u toga beno; ingeie u toga mei God, ko ingeie God.

²Lo qatagigi redu, a Leo hi u toga tamwere mei God.

³I God u vei na gineu doluegi gina Leo hi; hatie gineu lo ure ve i God he taure tea.

⁴A mwasoana hi u toga mei God, ko a mwasoana hi mo voragi na leleo lawe na sinobu doluegi

⁵A leleo hi mo leleo lolo dodogi, ko a dodogi he qoragi leie tea.

⁶I God u hora na nona tangaloi vanai, a henana i Jon.

⁷Ingeie hi u vanai huri ve na laqagi matamwasaragi na leleo lawe na sinobu, siu ve a tangaloi doluegi rain rongo na huri na leleo ko ram ladohogo.

⁸Ingeie sibona hate leleo hi; ingeie mo vanai huri ve na laqagi matamwasaragi na leleo hi.

⁹A leleo hogo hi nge ngaha, a leleo hi mo vanai sulolo ure ko mo leleohagi na tangaloi doluegi.

¹⁰A Leo u toga lolo ure. I God u vei na ure gina Leo hi, nge a tangaloi talo ure ra he iloe tea.

¹¹Ingeie u vanai sulo vanuana sibona, nge a nona sinobu sibona ra he lai vurugeginie tea.

¹²Nge lalavasigi rau lei vurugeginie ko rau ladohogo lune; siu ingeie u sireginire ve rain voragi re netui God.

¹³Ingere ram voragi re netui God, hate mwere na vavine mo bava na maresu, sige huri na taraniana nona mwera, nge huri na taraniana noi God.

¹⁴A Leo hi mo voragi tangaloi ko mo toga lolo livugada, u horo mangadi gena lologarea ko a hogo. Igamai gau lehi na nona gareana. A gareana hi mo vanai deni Netui Mama gatagale hogosie.

¹⁵I Jon u laqagi matamwasaragi hurie. Ingeie mo ngaragi lue vena, “A tangaloi hi nge ngaha neu nam laqagi hurie tavohe hi ineu nam veve vena, ‘Ingeie mo vanai lo taguku, nge ingeie u lawua liueu, huri ingeie u toga tomue siu neu nam bei vora.’ ”

¹⁶Huri ingeie u horo gina lologarea ko a hogo doluegi noi God, ko mo bete na tabeana lawe gide tangaloi mo hivo lalangi lune.

¹⁷I God u bete na Leo hora lui Mosis; nge a lologarea ko a hogo ru vanai lui Jisas Kraes.

¹⁸A tangaloi gatagale he lehi God tea vohogi. Nge i Netui Mama hogosie, ineie God, ko mo toga lo mwarasai Tamana, ingeie u haharaginie lawe gide.

¹⁹Nge ngaha a leo hogo huri Jon lune ira tomtomuegi lo vanue Jerusalem rau horara tangaloi lalakogi ko ira Livaet lawea ve rain huie vena, “Iniko hine?”

²⁰I Jon he susu tea ve vin duvi, ne mo veve lo ute lawua vena, “Ineu hatie Kraes.”

²¹Mo rovo ingere ram huie vena, “?Siu iniko ihine? ?Wa iniko Elaeja?” I Jon mo duvi vena, “Hatie, ineu hatie.” Ingere ram huie vena, “?Wa iniko a Tangaloi veve rarai hi?” Ingeie mo duvi vena, “Hatie.”

²²Siu ingere ram veve vena, “?Iniko gon veve lawe gamai vei iniko ihine, ve gamai gain lei na duvi leogi vano taligu lawe na tangaloi ngerehi ram hora gamai. Iniko gon veve na hava gineu hurigo sibomu?”

²³I Jon mo duvi vena, “Ineu ngaha hi: ‘A diloi hine gatagale mo waregi lo vanue vurogi mo veve vena: Nen vai vovohoigi na matahalai Huqe!’ ” (Nge ngaha hi a tangaloi veve rarai i Aesaea u veve.)

²⁴Lavasigi dena tangaloi hi rau horara ingere a Varise.

²⁵Ingere ram hui Jon ram veve vena, “?Tare ve iniko hatie Kraes, sige Elaeja, sige a Tangaloi veve rarai hi, iniko gom garuhigogonagi na tangaloi huri hava gineu?”

²⁶I Jon mo duvi vena, “Ineu nam garuhigogonagi na tangaloi gena wai; a tangaloi gatagale mo labe lolo livugemiu, nge igimiu ne he iloe tea.

²⁷Ingeie mo vanai lo taguku, nge ineu na he tatarise tea ve nain riqe na garoi nona sandel.”

²⁸A gineu ingere ngaha doluegi ram rovo vanai lolo vanue Betani, lo tavului wai Jodan, aiehi Jon u garuhigogona ginire tangaloi.

²⁹Maraga robongi i Jon mo lehi Jisas mo vanai lobena ko mo veve vena: “Ne ngaha i Netui Sibsib bulei God, ngehi a rugurugu mo lai vohogi na galegaleasi nora tangaloi talo ure!

³⁰A tangaloi hi ineu nam laqagi hurie, nau veve vena, ‘A tangaloi mo vanai lo taguku, ingeie u lawua denieu, huri ingeie u toga tomue siu ineu na bei vora.’

³¹Ineu na he iloe tea ve ingeie ihine, nge ineu nam vanai nam garuhigogona ginire gina wai huri ve ineu nam haharaginie lawera duvi Israel, ve ingeie ihine.”

³²Ko i Jon u laqagi matamwasaragi taligu vena: “Ineu nau lehi na Vui mo himei den eulu mwere na rangamea ko mo toga lune.

³³Ineu na he iloe tea ve ingeie ihine, nge i God hi u horau ve nain garuhigogona ginire gina wai, nge mo veve laweau vena, ‘Iniko goin lehi na Vui vin himei ko vin toga lo ului hine; ingeie hi vin garuhigogonagi na tangaloi gina Vui Gogona.’

³⁴Ineu nau lehi na gineu hi ko nam laqagi mata mwasaragi lawe gimiu ve ingeie i Netui God.”

³⁵Maraga robongi i Jon mo labe aiehi taligu mena nona rorongtagi gairue,

³⁶mo lehi Jisas mo dige mo vano, me mo veve vena, “Nge ngaha i Netui Sibsib bulei God!”

³⁷A rorongtagi gairue hi rom rongoe mo veve mwerehi ko rom Huri Jisas.

³⁸I Jisas mo tudori, mo lehire rom hurie, mo huire vena, “?Igimiru nerom tarani na hava gineu?” Ingere rom duvi vena, “?Rabae, gom toga logo?” (A leo naha “Rabae” lo noda leo vena, “Huhui.”)

³⁹Ingeie mo duvi vena, “Nero vanai nero leo.” Siu ingere rom vano meie ko rom lehi na tanona ko rom toga meie lolo rani hi. Bataha a aho gaivesi lo matainaho vano.

⁴⁰A tangaloi gatagale denire hi ru rongo Jon ko rom vano mei Jisas a henana i Andru, i tuei Saemon Bita.

⁴¹Tomuegi redu i Andru mo haqe tuana i Saemon ko mo veve lawea vena, “Igamai gau haqe i Ratahigi Vurei!” (A leo ngaha a iloilogi lo leo nora duvi Israel ve, “i Ratahigi Vurei.” Lo leo nora ta Kris, a iloilogi huri ve, “i Kraes.”)

⁴²Mo rovo ingeie mo lai Saemon lawe Jisas. I Jisas mo lelehurie ko mo veve vena, “Iniko i Saemon, i netui Jon. A henamu vin ware ve i Kifas.” (Kifas a iloilogi vei Bita, nge a iloilogi lo noda leo ve a, ‘Vatu Toga.’)

⁴³Maraga lo rani tuegi i Jisas u tarani ve vin vano lo Kalili. Nge mo haqe Vilib ko mo veve lawea vena, “!Gon hurieu!”

⁴⁴I Vilib ingeie dena vanue Betsaeda, a togagi venue hi Andru ko i Bita ru toga aie.

⁴⁵Siu i Vilib mo haqe Nataniel ko mo veve lawea vena, “Igamai gau haqe na tangaloi hi i Mosis u uli hurie lolo bugui Leo hora ko ira tangaloi veve rarai rau uli hurie. Ingeie i Jisas, netui Josev, dena vanue Nasaret.”

⁴⁶I Nataniel mo huie vena, “Wa gineu garea tea ve vin vanai dena vanue Nasaret?” I Vilib mo duvi vena, “Gon vanai gom leo.”

⁴⁷I Jisas mo lehi Nataniel mo vanai lobena, ko mo veve hurie vena, “Leo, ingeie a tangaloi a duvi Israel hogo; hate kalikeli meie!”

⁴⁸I Nataniel mo huie vena, “Iniko gu iloau wuraha?” I Jisas mo duvi vena, “Ineu nau lehigo tavohe hi gom toga lovavai duledule, tomue siu i Vilib mo veve lawego hurieu.”

⁴⁹I Nataniel mo duvi lawea vena, “Huhui, iniko i Netui God! Iniko a Ratahigi a duvi Israel!”

⁵⁰I Jisas mo veve vena, “Wa iniko gom ladohogo huri neu nau veve lawego ve nau lehigo tavohe hi gom toga lovavai duledule? Goin lehi na gineu rau lalawua liu denie ngaha!”

⁵¹I Jisas mo veve lawera vena, “A hogo, a hogo, nam veve lawe gimiu vena igimiu nein lehi na mahava vin waga ko ira engsel gogona noi God rain hage eulu ko rain himei vuine lo ului Netui Tangaloi!”