Read East Ambae JON 10 Bible Online

JON 10 - East Ambae bible

JON 10

¹“A hogo, a hogo, nam veve lawe gimiu vena, a tangaloi he ahu tea sulolo arai sibsib lo matai ara, nge mo kalo turu lo matahala wagineu tangaloi balubelu ko a tangaloi ue balu.

²Nge a tangaloi hi mo ahu lo matai ara inge hi a tangaloi leogoro sibsib.

³A tangaloi leogoro matai ara mo roa na matai ara lawea; a sibsib ram rongo na dilona lune nge mo ware na bulana sibsib gena henara, ko mo tomueginire suvarea.

⁴Lune ingeie mo laire suvarea, mo tomue ko a sibsib ram hurie, huri ingere rau ilo na dilona.

⁵Ingere rain he huri na tangaloi wagineu tea; nge rain toa vohogi denie, huri ingere rahe ilo na dilona tea.”

⁶I Jisas mo veve na gato tavalu ngaha lawera, ne ngere ra he ilo vurugegi na gineu tea hi ingeie mo veve lawera.

⁷Siu i Jisas mo veve taligu vena: “A hogo, a hogo, nam veve lawe gimiu vena, ineu a matai arai huri na sibsib.

⁸A tangaloi doluegi rau vanai tomue denieu ingere a balubelu ko a ue balu; nge a sibsib rahe rorongtaginire tea.

⁹Ineu a matai ara. Ihine tea vinehu turu vanai luku vin mwaso; ineie vin ehu vanai ko vin mwelue vano, ko vin haqe na hinaga lobu.

¹⁰A tangaloi balubelu mo vanai hogosie huri vena balu, ko na ue vagamate, ko na vai vohogi. Ineu nau vonai huri ve igimiu nein lei na mwasoana, ko a mwasoana hi u horo mangadi.

¹¹“Ineu a leogoro sibsib garea. A leogoro sibsib u garea mo siregi na mwasoana huri na sibsib.

¹²A tangaloi mo tabanagi huri na gaivoli, ingeie hate leogoro sibsib ko hate bulana sibsib ngerehi, lune ingeie mo lehi na wiriuturu mo vanai, ingeie mo siserigi na sibsib, ko mo toa vohogi, siu a wiriu turu hi mo vena wiribibi na sibsib ko mo livu mata buriginire lategi.

¹³A tangaloi tabanagi hi mo toa vohogi huri ingeie mo tabana huri gai voli ko he lado tea huri na sibsib.

¹⁴Ineu a leogoro sibsib garea. Mwere i mama u iloau ko ineu nau ilo mama, mwerehi ineu nau ilo na buleku sibsib ko ingere rau iloau. Ko neu nam siregi na mwasoaku huri na sibsib.

¹⁶A sibsib wagineu vage tahi a buleku, nge ingere hatie lolo arai sibsib, ngaha, ineu nain leire vage; ingere rain rorongtagi na diloku ko ingere rain voragi burigi gatagale lo vavai leogoro sibsib gatagale.

¹⁷“I Mama mo tabeau huri ineu nam siregi na mwasoaku, siu huri ve nain lei leie taligu.

¹⁸Ihine tea vin he lai vohogi na mwasoaku tea denieu. Nge ineu siregi na mwasoaku, ko mo eno laweau ve nain leie taligu. Nge ngaha a gineu i Tamaku u horau ve nain veie. Siu mo eno laweau ve nain sireginie, ko nam hakovi na managi huri ve nain leie taligu. Nge ngaha i Tamaku u horau ve nain veie.”

¹⁹A leo ngaha mo vaire tangaloi lalawua nora duvi Israel ram vilewahe taligu.

²⁰A tangaloi u sao denire ram veve vena, “Ingeie a vui esi lune! A qatune mo lenga? Igimiu nem rorongtaginie huri hava gineu?”

²¹Nge ingere tangaloi lavasigi ram veve vena, “A tangaloi a vui esi lune vin he laqa te lai mwere ngaha? A vui esi vin vei na matai tangaloi vin leleo taligu mwerehilogo?”

²²A tarogi mo vanai ve rain vei na Gaganie lawua huri na Vaigogonagi na valei God a Jerusalem u vei lolo rani hi.

²³I Jisas mo dige lo Sara Gogona lo Malumelui Vale nei Solomon.

²⁴Lune ira duvi Israel ram sonebubugi dalie ko ram huie vena, “?Iniko goin vei gamai gain lado tatu tetu hurigo vin dadari tagaha mwerehilogo? Tare ve iniko i Kraes, gon veve vovohoi lawe gamai.”

²⁵I Jisas mo duvi lawera vena: “Nau veve lawe gimiu beno, nge igimiu nehe ladohogo te gieu. A vaiquivui nau veire lo henai Tamaku, ngehi mo haharagi ve ineu ihine.

²⁶Nge igimiu nehe ladohogo tea huri igimiu hate buleku sibsib.

²⁷A buleku sibsib ram rorongtagi na diloku. Ineu nau ilora ko ram hurieu.

²⁸Ineu nam bete na mwasoana radu lawera, siu ingere rain he mate lai tea vin tuei; ko ihine vin he laileinai belu tea ginire denieu.

²⁹A havagineu hi i Tamaku u bete laweau u lawua dena gineu doluegi ko ihine tea vei vin he haga laie tea dena tanoi leo goro noi Mama.

³⁰Ineu Mama gamaru gatagale.”

³¹Siu a sinobu ram vile na vatu taligu ve rain bugurie.

³²I Jisas mo veve lawera vena, “Ineu nau vei na tabanagi garea u sao lo nagomiu ngehi i Tamaku u bete laweau ve nain veire. ?Gimiu nem tarani ve nan bugurieu huri na hava tabana tea denire ngaha?”

³³Ingere ram duvi vena, “Igamai gahe tarani tea ve gain bugurigo huri na tabanagi garea, nge huri gom veve asiesigi God! Iniko a tangaloi hogosie, nge gom vai go huri ve gu tatarise mwerei God!”

³⁴I Jisas mo duvi lawera vena: “U uli lo nomiu Leo hora huri ve i God u veve vena, ‘Igimiu ira god.’

³⁵Igide dam ilo ve a Reve reve Gogona mo veve hogo vin eno vagituei; ko God mo wareginire ve ira god, ngerehi u bete na nona leo lawera.

³⁶Siu huri havagineu igimiu nem veve huri ve ineu nam veve leo rau esi vovohoi God, a vevenagi huri nau veve ve, ?Ineu Netui God? Ineu hi i God u leowaheau ko mo horau sulolo ure.

³⁷Tare ve ineu na he vai na gineu tea ngerehi i Tamaku, mo tarani ve nain veire, siu igimiu nen mese ladohogogieu.

³⁸Nge tare ve ineu nam vai na gineu ngerehi, nge ne he ladohogo te gieu, nen ladohogo lo havagineu ngerehi, nau veire huri ve gimiu nein ilo vurugegi ve i Tamaku mo toga lolo loloku, ko ineu lolo lolona.”

³⁹Siu ingere ram vai leo taligu ve ran wiribibie, nge ingeie mo mwasikele dena limara.

⁴⁰I Jisas mo vano taligu lo tavului wei Jodan sulo mahoi ute hi Jon u garuhigogona gi na sinobu tomue radu, aie, ko mo toga aie.

⁴¹A sinobu u sao ram vanai lobena. Ingere ram veve vena, “I Jon he vai na vaigivui tea, nge vataha na gineu ingeie u veve huri na tangaloi ngaha a hogo.”

⁴²Ko a sinobu u sao aiehi ram ladohogoginie.