Read East Ambae JON 12 Bible Online

JON 12 - East Ambae bible

JON 12

¹A rani gaiono tomue siu mobei a Hinagai Halegagaliu, i Jisas mo vano lo vanue Betani, i Lasarus u toga aie, a tangaloi hi Jisas u ragasie dena mateana.

²Ingere rau vei rarai na gaganie revirevi hurie aiehi. Mata mo bete na hinaga, ko i Lasarus ingeie gatagale denire ram gagani bubugi mei Jisas.

³Siu i Meri mo lai na vurei bonbon a mautui kilo, gaivoligi u lawua garagara, mo lingie sulo karui Jisas, ko mo mangie gena vulune. A lulumui bonai vurei hi mo buhoru doluegi na lolo i vale.

⁴1 Judas Iskariot, ngehi gatagale denire rorongtagi noi Jisas, a tangaloi hi ve vin rongo na leoi gana, mo veve vena,

⁵“?Huri hava gineu a vurei bonbon hi ra he sogaginie tea huri na vatu teri vaga ngavulu gaitolu, siu ve rain bete na homu lawera mahogi?”

⁶Ingeie mo veve mwere ngaha, hatie huri ve nge mo lado hurire mahogi, nge huri ingeie a tangaloi balubelu; ingeie mo wali na tangai homu ko mo balu na homu lo mahogi lavasigi.

⁷Nge i Jisas mo veve vena: “Gon sireginie na hakovi na vurei hi huri na rani vin tulegieu lolona.

⁸Huri ira mahogi ram toga gesegi mei gimiu, nge ineu nain he toga tea gesegi mei gimiu.”

⁹Siu a sinobu sao a duvi Israel ram rongo ve i Jisas mo toga a Betani, siu ram vano aiehi; ram vano, hate huri Jisas hogosie, nge vage ve rain lehi Lasarus ngehi Jisas u ragasie dena mateana.

¹⁰Siu ira muei rugurugu ram tau na leo ve rain wehi Lasarus vage;

¹¹A vevenagi huri Lasarus hi a duvi Israel u sao ram siregi na nora tomtomuegi, ko ram ladohogo Jisas.

¹²Lo rani tuegi a sinobu lawua rau vanai huri na Hinagai Halegagaliu ram rongo ve i Jisas vin vanai lo vanue Jerusalem.

¹³Siu ram lai na raui metui ko ram vano ve rain lehe, ram ulo vena: “Waregarea! Vevegarea gi ihine mo vanai lo henai Huqe! Ngehi i Ratahigi nora duvi Israel!”

¹⁴I Jisas u haqe na dongki as ko mo toga lune, mwere hi Reve reve Gogona mo veve vena:

¹⁵“Nen mese matagu, igimiu ta Jerusalem! Leo, a nomiu Ratahigi mo vanai lobemiu, mo toga lo natui dongki.”

¹⁶A nona rorongtagi ra he ilo vurugegi na gineu ingere ngaha tea lo tarogi hi; nge tavohe hi i Jisas u maraga sulo varavarana ingere ram ladohaqe ve a Reve reve Gogona u veve mwere ngaha, ko ve ingere rau vei na gineu ingere ngaha lawea.

¹⁷A sinobu rau toga mei Jisas, tavohehi ingeie u ware Lasarus mo mwalue dena qaru mo ragasie dena mateana, ram laqagi huri na hava gineu hi i Jisas u veie.

¹⁸A vevenagi hi a sinobu rau vanai ve rain lehe, huri ingere rau rongo ve ingeie u vei na vaigi vui ngaha.

¹⁹Siu ira Varise ram veve veveginire vena, “Nen leo, igide da he vai na gineu te gatagale veu vovohoi! Nen leo, a tangaloi doluegi lolo ure ram hurie!”

²⁰A tangaloi lavasigi ta Kris rau toga meire tangaloi ngerehi rau hage Jerusalem ve rain huduhudu goro lo taro Hinagai Hale gagaliu.

²¹Ingere ram vanai lobei Vilib (ingeie talo togagi venue Betsaeda lolo vanue Kalili) ram huie vena, “Buluana, igamai gam tarani ve gan lehi Jisas.”

²²I Vilib mo vano ko mo veve lawe Andru, ko ingere gairue rom vano ko rom veve lawe Jisas.

²³I Jisas mo duvire vena: “A taro mo vanai siserigi ngaha ve God vin vei roroagi i Netui Tangaloi.

²⁴A hogo, nain veve lawe gimiu vena, tare ve a toli ko mo soi talo tano ko vin teu na toligi vin sao. Nge tare ve he mate tea, a toli hi nge gatagale tamwere hi.

²⁵Ihine mo tabe na mwasoana sibona vin vei salaginie; ko ihine mo lado bulegi na mwasoana sibona lo ure naha vin hako bibie huri na mwasoana radu.

²⁶Ihine tea mo tarani ve vin tabana laweau nge na hurieu, siu a noku tangaloi tabanagi vin toga meieu aiehi ineu nam toga. Tare ve ihine mo tabana laweau, i Tamaku vin ladomavaginie.”

²⁷“Siserigi ngaha u domiku mo vonosi garagaragieu, ko ineu? Nain veve wuraha? Wa ineu nain veve lai vena, ?Mama gon lai vohogi na taro ngaha denieu? Hatie! Ineu nau vanai hogosie huri na gineu ngaha, huri ve nain rongo gagarasi.

²⁸Mama, gon vai roroagi na henamu!” Mo rovo, a dilogi mo vanai den eulu, mo veve vena, “Ineu nau vei roroaginie beno, ko nain vei roroaginie taligu.”

²⁹A sinobu ram labe aiehi ram rongo na dilogi hi ko ram veve vena, “A mantawa mo dere!” A tangaloi lavasigi ram veve vena, “A engsel u laqa lawea!”

³⁰Nge i Jisas mo veve lawera vena: “A dilogi ngaha mo vanai, hate hurieu, nge huri gimiu.

³¹Siserigi ngaha a tarogi mo vanai ve God vin vevegi na ure ngaha; siserigi ngaha a tarogi mo vanai ve God vin tuli vohogi i lawua goro talo ure ngaha.

³²Tavohe hi vin tabehagegieu dena tano, ineu nain reve na tangaloi doluegi vanai laweau.”

³³(Ingeie mo haharagi lo leo ngaha ve a hava mateana hi nge vin mate ginie.)

³⁴Siu a sinobu ram duvi lawea vena: “A nomai Leohora mo veve ve i Kraes vin toga vagituei. ?Nge huri hava gineu gom veve ve i, netui Tangaloi vin tabe hageginie? ?I Netui tangaloi ngaha ihine?”

³⁵I Jisas mo duvi vena: “A leleo vin toga mei gimiu a tarogi vin he qaravu tea lawagi. Nen dige lategi lune a leleo mo toga mei gimiu, siu ve a dodogi vin he luluwegi gimiu tea; huri a tangaloi hi mo dige lolo dodogi nge he ilo tea ve ingeie mo vano logo.

³⁶Lune a leleo mo toga tau mei gimiu, nein ladohogo ginie, siu ve igimiu nein voragi na netui leleo.” Lo tagugi i Jisas u veve na gineu ngaha u rovo, ingeie mo vano mo hili denire.

³⁷Hatie huri Jisas u vei na vaigivui u sao lo nagora sinobu, nge ingere rahe ladohogo tea ginie mosigei.

³⁸Siu ve na vagahorongi na leo hi Aesaea a tangaloi ligoligogi u veve vena: “?Huqe, ihine u ladohogo lo roro hi gau veve? ?A Huqe u haharagi na nona managi lawe hine?”

³⁹A vevenagi ngaha ingere ra he ladohogo lai tea, huri Aesaea u veve vage vena:

⁴⁰“I God u vei na matara, ram dodo, ingeie u toqe goro na domire, huri ve a matara rain he leo lai tea, a domire rain he ilo lai tea, ko ingere rain he tudori tea lobeku huri ve ineu nain vagamwasoire.”

⁴¹I Aesaea u veve ngaha huri ingeie u lehi na varavarai Jisas ko mo laqagi hurie.

⁴²Nge ingere rau sao ram ladohogogi Jisas, ko meire lavasigi denire lawua goro nora duvi Israel; nge huri ingere ram mataguginire Varise ra he veve sere tea huri na nora ladohogo lo ute lawua, vai teu ram tau vohoginire dena valei soneana.

⁴³Ingere ram tarani na roroa denire tangaloi u liu dena roroa mo vanai den God.

⁴⁴I Jisas mo gato siaga vena: “Ihine mo ladohogieu, he ladohogo te gieu hogosie, nge mo ladohogo vage lune hi u horau vanai.

⁴⁵Ko ihine tea lehieu mo lehe hi u horau vanai.

⁴⁶Ineu nau vanai sulolo ure mwere na leleo, ve vataha ihine mo ladohogogieu vin he toga tea lolo dodogi.

⁴⁷Ihine tea mo rongo na noku leo siu he ronghurie tabea tea, ineu nain he veveginie tea, huri ineu nau vanai, hate huri ve nain vevegi na ure, nge ve nain vagamwasoie.

⁴⁸Ihine tea mo rahagieu ko he lai vurugegi na noku leo tea, a noku leo huhui vin veveginie. A leo ngehi ineu nau laqagi vin veveginie lo rani vagasigi.

⁴⁹Io, huri a leo ngerehi nau laqagi he vanai tea denieu siboku, nge i Mama u horau ve nain veve na hava gineu, ko nain huhui na havai.

⁵⁰Ko ineu nau ilo ve a nona Leo hora mo lai na mwasoana radu. Siu, a hava gineu hi nam veve, ngehi i Mama u horau ve nain veve.”