Read East Ambae JON 13 Bible Online

JON 13 - East Ambae bible

JON 13

¹Tomue siu a taroi Hinagai Halegagaliu. I Jisas u ilo huri ve a tarona mo vanai hurie ve vin mwalue dena ure ngaha ko vin vano lobei Mama. Gesegi ingeie u tabe na nona sibona u hi ram toga lolo ure, ko vin tabera vin dadari lo vagasigi.

²I Jisas mena nona rorongtagi ram toga lolo gaganie revirevi. I Vui esi u teu na ladolado beno lolo domi Judas Iskariot, i netui Saemon, ve vin rongo na leoi gai Jisas.

³I Jisas u ilo huri ve i Mama u bete na managi doluegi lawea; nge u ilo huri ve u vanai den God ko ve vin vano lobei God.

⁴Siu i Jisas mo maraga dena hinaga, mo tugu vohogi na luqana tuegi, ko mo taligi na gai mamangi lo tanoi wesine.

⁵Mo rovo mo didihi na wai sulolo laha ko mo tauvuigi mo solo na karure nona rorongtagi ko mo mangire gena gaimamangi ngehi u wesiginie.

⁶Ingeie mo vanai lobei Saemon Bita, ko i Bita mo veve lawea vena, “?Huqe, wa iniko goin solo na karuku vage?”

⁷I Jisas mo duvi vena, “Siserigi ngaha iniko go he ilo na hava gineu tea hi ineu nam vaie, nge goin iloe lo tagugi.”

⁸I Bita mo veve lawea vena, Hatie, iniko goin he solo na karuku tea vohogi.” I Jisas mo duvi lawea vena, “Tare ve nain he solo na karumu tea, iniko hatie noku rorongtagi taligu.”

⁹I Saemon Bita mo duvi vena, “Huqe, iniko gon mese solo na karuku hogosie, nge gon solo na limeku mena qatuku vage.”

¹⁰I Jisas mo veve vena: “Ihine u gagaru ingeie u mwasara beno, nge huri na karune hogosie. Igimiu doluegi neu mwasara, nge hatie ve igimiu doluegi”

¹¹(Huri i Jisas u iloe beno huri ve ihine vin rongo na leoi gana; a vevenagi hi ingeie u veve vena, “Igimiu doluegi ne he mwasara tea.”)

¹²Lo tagugi i Jisas u solo na karure rovo, nge mo luqegi na luqana tuegi taligu ko mo toga taligu. Ingeie mo hui vena, “Wa igimiu nem ilo vurugegi na hava gineu hi nam bei veie lawe gimiu?

¹³Igimiu nem wareau gi Huhui ko a Huqe, siu u garea huri nem veve mwerehi, huri ineu hogo.

¹⁴Ineu a nomiu Huqe ko a nomiu Huhui, ko ineu nau solo na karumiu. Giniehi, mo eno lawe gimiu ve nein solo na karumiu vatahagi gimiu.

¹⁵Ineu nau teu na taikeru lawe gimiu, siu huri ve nein vei na hava gineu hi ineu nau vei lawe gimiu.

¹⁶A hogo, a hogo, nam veve lawe gimiu vena, a tangaloi tabana he lawua liu na nona ratahigi tea; a gaihora he lawua liu hine tea hi mo huqegi goroe, a tangaloi digegi leo he lawua tea dein hine hi mo horae gaihora he lawua liu na a tangaloi tea ngehi u horae.

¹⁷Siserigi ngaha igimiu nem ilo na hogo hi; tare ve igimiu nem huri lune igimiu nein hevuhevu vin liu!

¹⁸“Ineu na he laqagi tea huri gimiu doluegi; ineu nau ilo na tangaloi ngerehi neu nau leowahera. Nge ngaha vena vin vagahorongi na Reve reve Gogona ngehi mo veve vena, ‘A tangaloi hi u geni lo gaku hinaga u tudori mo tavului vuro meieu.’

¹⁹Ineu nam veve lawe gimiu siserigi ngaha siu a gineu hi mo bei rovo vanai, huri ve lo tarogi vin rovo vanai gimiu nein ladohogo ve ‘Ineu hi toga.’

²⁰A hogo, a hogo, nam veve lawe gimiu vena, ihine tea mo lai vurugegi na tangaloi hi neu nam horae, mo lai vurugegieu vage; ko ihine mo lai vurugegieu, mo lai vurugeginie hi u horau vanai.”

²¹I Jisas u veve na leo ngaha vunu, a nona domiana mo vonosie, ko mo laqagi luae vena: “A hogo, a hogo, nam veve lawe gimiu vena, gatagale den gimiu vin rongo na leoi gaku.”

²²A rorongtagi ram vui lehilehire, ram rongo samwegi huri ve ingeie mo veve huri hine.

²³A rorongtagi gatagale aiehi, ngehi i Jisas u tabea, mo toga kakarani lobei Jisas.

²⁴Giniehi, i Saemon Bita mo langlangamata vano lawea ko mo veve vena, “Gon huie ihine hi mo laqagi hurie.”

²⁵Siu a rorongtagi hi mo olo vano lobei Jisas, ko mo huie vena, “?Huqe, ihine hi gom vevea?”

²⁶I Jisas mo duvi vena, “Ineu nain diri na bereti lolo lahai hinaga ko nain betea lawe hine; ineie a tangaloi hi nam vevea.” Siu ingeie mo lai na bereti mo dirie, ko mo betea lawe Judas, i netui Saemon Iskariot.

²⁷Siserigi i Judas mo lai na bereti hi, i Setan mo ahu sulolo lolona. I Jisas mo veve lawea vena, “Iniko gon siseri ve gon vai na gineu hi ve goin veie!”

²⁸(Ngerehi rau toga lo tanoi gaganie ra he ilo tea huri na hava gineu i Jisas mo veve lawea mwerehi.

²⁹A vevenagi i Judas mo leogoro na tangai homu, lavasigi ram lado huri ve i Jisas mo veve lawea ve na vano na voli na hava gineu hi ingere ram tarani huri na gaganie, sige ve na bete te gineu lawera mahoi tangaloi.)

³⁰I Judas mo lai na bereti ko mo mwalue mo vano siserigi. Vohe hi mo bongi.

³¹Lo tagugi hi i Judas u vano beno, i Jisas mo veve vena: “Siserigi ngaha mo vai roroagi Netui Tangaloi ko mo vai roroagi God lune.

³²Tare ve u vei roroagi God lune, u i God sibona vin vei roroagi Netui Tangaloi, ko ingeie vin veie vin siseri.

³³Re netuku, ineu nain he toga tea mei gimiu ve vin qaravu. Igimiu nein hikesieu, nge ineu nam veve lawe gimiu siserigi ngaha mwerehi nau veve lawera duvi Israel beno vena, ‘Igimiu nein he vano lai tea lo ute hi neu nam vano aie.’

³⁴A Leo hora garaqa ineu nam bete lawe gimiu; igimiu nen vui tabetabe gimiu. Mwerehi ineu nau tabe gimiu, siu igimiu nein vui tabetabe gimiu.

³⁵Tare ve igimiu nem vui tabetabe gimiu, mo rovo a tangaloi doluegi rain ilo huri ve igimiu ira noku rorongtagi.”

³⁶I Saemon Bita mo huie vena, “?Huqe, iniko goin vano logo?” I Jisas mo duvi vena, “Lo ute hi ineu nain vano aie, iniko goin he hurieu lai tea siserigi ngaha, nge goin hurieu lo tagugi.”

³⁷I Bita mo hui vena, “?Huqe, huri hava gineu ineu nain he huri laigo tea siserigi ngaha? Ineu nam rarai huri ve nain mate hurigo!”

³⁸I Jisas mo duvi vena: “?Wa iniko gom rarai hogo huri ve goin mate hurieu? A hogo, a hogo, nam veve lawego vena, a toa vin he tarere te tau, nge iniko goin tahau vagatolu.”