Read East Ambae JON 14 Bible Online

JON 14 - East Ambae bible

JON 14

¹I Jisas mo veve lawera nona rorongtagi vena: “Igimiu nen mese vai na taqangimiu vena alealegi. Nen ladohogo lui God, ko nen ladohogo luku vage.

²A mahogi u sao lolo valei Tamaku, ko ineu nain vano nain vagatai na ute huri gimiu. Ve hate hogo mwerehi, nain he veve tea lawe gimiu mwere ngaha.

³Siu lo tagugi nain vano nain vagatai na ute huri gimiu, nain vanai lobemiu taligu ko nain lei gimiu sulobeku, siu huri gimiu nein toga lo ute hi neu nam toga aie.

⁴Igimiu neu ilo na matahala hi beno ngehi mo vano mo dadari lo ute hi ve ineu huri ineu nain vano aie.

⁵I Tomas mo veve lawea vena, “Huqe, igamai gahe ilo tea ve iniko goin vano logo. ?Igamai gain ilo na matahala mo vano aiehi mwerehilogo?”

⁶I Jisas mo duvi lawea vena: “Ineu a matahala, ineu a hogo, ko ineu a mwasoana; ihine vin he vano lai tea sulobei Mama nge luku hogosie.

⁷Tare ve igimiu neu iloau, nein ilo Tamaku vage; ko den hibagataha igimiu nem iloe, ko neu lehie.”

⁸I Vilib mo veve lawea vena, “Huqe, gon haharagi i Mama lawe gamai; ngehi vin tatarise mei gamai.”

⁹I Jisas mo duvi vena: “Vilib, ineu nau toga mei gimiu a mahogi u qaravu, nge iniko go he iloau te mosigei? Ihine u lehieu u lehi i Mama. ?Huri hava gineu niko gom veve vena, ‘Gon haharagi i Mama lawe gamai’?

¹⁰Wa iniko go he ladohogo tea huri ve ineu nam toga lui Mama ko i Mama mo toga luku? A leo ingere ngaha nau veve lawe gimiu, rahe vanai tea denieu. I Mama, ngehi mo toga luku, mo vai na nona tabanagi sibona.

¹¹Nen ladohogogieu huri neu nam toga lui Mama ko i Mama mo toga luku. Tare ve hatie, nen ladohogo a vevenagi huri na vaigivui ingere hi nau veire.

¹²A hogo, nam veve lawe gimiu vena, ihine tea mo ladohogo luku vin vei na tabanagi ngerehi ineu nau veire, ko ingeie vin vei na tabanagi rain lawua taligu dena tabanagi ngerehi ngaha, huri ineu nam vano lobei Mama.

¹³Ko ineu nain vei na hava gineu hi gimiu nein nevu huri lo henaku, siu huri ve i Netui vin vei roroagi i Mama.

¹⁴Tare ve igimiu nein nevuhieu huri na hava gineu tea lo henaku, ineu nain veie.”

¹⁵“Tare ve igimiu nem tabeau, nein ronghuri na noku Leohora.

¹⁶Ineu nain nevu den Mama, ko ingeie vin bete na Buluiana wagineu lawe gimiu, ngehi vin toga mei gimiu vagi tuei.

¹⁷Ingeie hi a Vui mo serelue na hogo huri God, a tangaloi talo ure rain he lai leie tea, huri rain he lehie tea sige rain he iloe tea. Nge igimiu nem iloe, huri ingeie mo toga mei gimiu ko mo toga lolo lolomiu.

¹⁸“Ineu nain he siregi gimiu tea ve nein toga gahe gimiu mwere maresu madue; ineu nain vanai taligu lobemiu.

¹⁹A mahogi biti vage a tangaloi talo ure rain he lehieu te taligu, nge igimiu nein lehieu; ko huri ineu nam mwaso, igimiu vage nein mwaso.

²⁰Lo ranigi hi vin vonai, igimiu nein ilo huri ve ineu lui Tamaku, ko igimiu luku, ko ineu lolo lolomiu.

²¹“Ihine tea mo lai vurugegi na noku Leohora ko mo ronghurire, ingeie hi mo tabeau. I Tamaku vin tabe ihine hi mo tabeau; ko ineu vage nain tabea ko nain haharagieu siboku lawea.”

²²I Judas (hatie Judas Iskariot) mo veve lawea vena, “Huqe, huri hava gineu iniko goin haharaginigo sibomu lawe gamai nge hate lawe na tangaloi ngerehi talo ure?”

²³I Jisas mo duvi lawea vena: “Ihine tea mo tabeau vin ronghuri na noku leo. I Tamaku vin tabea, ko i Tamaku ko ineu gori vanai lobena ko gori togagi venue meie.

²⁴Ihine he tabeau tea he ronghuri na noku leo tea. A leo ngerehi gimiu neu rongo hatie noku, nge rau vanai den i Mama u horau vanai.

²⁵“Ineu nau veve na gineu ngerehi lawe gimiu lo tarogi ineu nau toga tau mei gimiu.

²⁶I Buluiana ngehi, a Vui Gogona i Mama vin horae lo henaku, vin huhui gimiu gena gineu doluegi, ko vin vei gimiu nein ladohaqe na gineu doluegi ngerehi nau vevera lawe gimiu.

²⁷“A tamwata ineu nam siregi lawe gimiu; a noku tamwata nam bete lawe gimiu. Ineu na he bete te lawe gimiu mwere na tangaloi talo ure ram bete. Igimiu nen mese vai na domimiu vena romasi ko nen mese matagu.

²⁸Igimiu neu rongo nau veve lawe gimiu vena, ‘Ineu nam vano, nge nain vanai lobemiu taligu.’ Tare ve igimiu neu tabeau, vin hevusi gimiu, huri ve neu nam vano lobei Mama, huri ingeie u lawua liueu.

²⁹Ineu nau veve na gineu ngaha lawe gimiu siserigi ngaha mwerehi, tomue siu a gineu ngaha mo bei vei, siu lo tarogi ve vin eno lune igimiu nein ladohogo.

³⁰Ineu nain he laqa tea vena qaravu lawe gimiu, huri a huqegi talolo ure ngaha, mo vanai. Ingeie he hakovi na huireana tea goroau.

³¹Nge ineu nam vai na gineu doluegi mwerehi i Mama u horau, huri ve a tangaloi talo ure rain ilo huri ve ineu nam tabe Tamaku. “Nen vanai, da vano dena ute ngaha.”