Read East Ambae JON 16 Bible Online

JON 16 - East Ambae bible

JON 16

¹“Ineu nau veve ngaha lawe gimiu huri ve nein mese hakosiregi na nomiu ladohogo.

²Ngere rain teu vohogi gimiu tavarea dena valei soneana. Ko a tarogi vin vanai lune ihine tea vin wehi gimiu vin lado huri ve mo vai na lalakogi lawe God.

³Ingere rain vei na gineu ingere ngaha lawe gimiu huri ingere rahe ilo Mama tea sige ineu.

⁴Nge ineu nau veve na gineu ingere ngaha lawe gimiu, huri ve a tarogi vin vanai hurire ve rain vei na gineu ingere ngaha, igimiu nein ladohaqe huri ve ineu nau veve lawe gimiu beno.” “Ineu na he veve na gineu ingere ngaha tea lawe gimiu lo tauvuigi, huri ineu nau toga mei gimiu.

⁵Nge siserigi ngaha ineu nain vano lobei hine hi u horau vanai; nge ihine gatagale dein gimiu he huieu tea vena, ‘?Iniko gon vano logo?’

⁶Nge huri ineu nau veve na gineu ingere ngaha lawe gimiu, ko a tanqimiu mo horo gina hahagavi.

⁷Nge ineu nam veve hogo lawe gimiu; u garea mei gimiu ve ineu nain vano, huri tare ve ineu nain he vano tea den gimiu, a Buluiana vin he vanai tea lobemiu. Nge tare ve ineu nain vano den gimiu, ineu nain horae lawe gimiu.

⁸Ko lune nge vin vanai vin haharagi lawe na sinobu talo ure huri ve ingeie ra u vagasile huri na galegaleasi, ko huri na hava gineu hi u vovohoi, ko huri na leo vevegi noi God.

⁹Ingere ram vagasile huri na galegaleasi, huri ingere ra he ladohogo te gieu;

¹⁰Ingere ram vagasile huri na havagineu hi u vovohoi, a vevenagi ineu nain vano lobei Mama, ko igimiu nein he lehieu tea taligu.

¹¹Ingere ram vagasile huri na leo vevegi, huri God u vevegi na huqegi talolo ure ngaha beno.

¹²“A gineu sao tau ve nain veve lawe gimiu, nge siserigi ngaha gimiu nein he laire tea huri rau gona mei gimiu.

¹³“Nge lune a Vui vanai, ingeie hi u serelue na hogo huri God vin vanai, ingeie vin tomuegi gimiu sulo hogo doluegi. Ingeie vin he laqa tea gena nona managi sibona, nge vin veve na hava gineu hi nge u rongo, ko vin laqagi huri na gineu ngerehi rain vanai.

¹⁴Ingeie vin ware roroagieu, huri nge vin lei na noku leo doluegi ko vin veve serera lawe gimiu.

¹⁵A gineu doluegi noi mama, ingere a noku giniehi, nau veve huri ve a Vui vin na hava gineu hi nain bete lawea ko vin vevea lawe gimiu.”

¹⁶“A mahogi biti taligu, igimiu nein he lehieu tea; siu, a mahogi biti vage, igimiu nein lehieu.”

¹⁷Siu a nona rorongtagi lavasigi ram veve veveginire vena: “?A hava gineu hi mo vevea vena, ‘A mahogi biti taligu, igimiu nein he lehieu tea, ko mo rovo, a mahogi biti taligu, igimiu nein lehieu’? Siu mo veve vage vena, ‘Huri ineu nain vano lobei Mama.”’

¹⁸Ingere ram hui vena, “?A hava gineu ngaha, a mahogi biti? Igide da he ilo tea ve ingeie mo laqagi huri na hava gineu!”

¹⁹I Jisas u ilo huri ve ingere ram tarani ve rain huie, siu ingeie mo veve lawera vena: “?Igimiu nem vui huihuigi gimiu huri na hava gineu nau vevea vena, ‘A mahogi biti, igimiu nein he lehieu tea, siu, a mahogi biti vage igimiu nein lehieu’?

²⁰A hogo, a hogo, nam veve lawe gimiu vena, igimiu nein ngara ko nein tengi, nge a tangaloi talo ure rain rongarea; igimiu nein hahagavi, nge a nomiu hahagavi vin dori gina havuhevu.

²¹Lo tarogi hi a vavine a maresu mo ragasie ingeie mo hahagavi huri a taroi nona bavabava mo vanai; nge lune a maresu u vora beno nge mo galuvegi na nona gagarasi, huri nge mo rongarea gena maresu biti u vora sulolo ure.

²²Igimiu mwerehi: siserigi ngaha nem hahagavi, nge ineu nain lehi gimiu taligu, ko a lolomiu vin horo gena havuhevu, siu ihine tea vin he lai vohogi na havuhevu hi tea den gimiu.

²³“Lo ranigi hi vin vanai, igimiu nein he navu na hava gineu tea denieu. A hogo, a hogo, nam veve lawe gimiu vena, i Mama vin bete na hava gineu lawe gimiu hi nein nevu hurie lo henaku.

²⁴Mo dadari gaqarigi igimiu ne he navu huri na gineu tea lo henaku; igimiu nem navu ko igimiu nein lei, siu huri a nomiu havuhevu vin horo mangadi.”

²⁵“Ineu nau veve na gineu ingere ngaha lawe gimiu gena gato tavalu. Nge a tarogi vin vanai lune ineu nain he laqa tea lo gato tavalu taligu, nge ineu nain laqagi lue lawe gimiu lo leo vovohoi huri Mama.

²⁶Lo tarogi hi vin vanai igimiu nein nevu den Mama lo henaku; ko ineu na he veve tea huri ve nain nevu denie lo henamiu,

²⁷huri i Mama sibona mo tabe gimiu, a vevenagi gimiu neu tabeau ko neu ladohogo huri ve ineu nau vanai den God.

²⁸Ineu nau vanai den Mama ko nam vanai sulolo ure; ko siserigi ngaha nam siregi na ure ko nam vano lobei Mama.”

²⁹Siu a nona rorongtagi ram veve lawea vena: “Gon leo, siserigi ngaha iniko gom laqa vovohoi, ko go he laqa tea lo gato tavalu.

³⁰Siserigi ngaha igamai gam ilo huri ve niko gu ilo na gineu doluegi; go he tarani ihine tea ve vin huigo huri hava gineu. Giniehi gam ladohogo huri ve iniko gu vanai den God.”

³¹I Jisas mo duvi gorora vena: “?Wa igimiu nem ladohogo siserigi ngaha?

³²Nein leo, a tarogi mo vanai, u vanai beno, tavohe igimiu doluegi nein vano tereteregi, vataha na nomiu togagi venue, siu ineu nain toga gaheau vohogi. Nge ineu hate gaheau vohogi, huri i Mama mo toga meieu.

³³Ineu nau veve na gineu ingere ngaha lawe gimiu, siu huri ve nein toga lo tamwata lo bubugiana meieu. A tangaloi talo ure rain vei gagarasigi gimiu. Nge igimiu nein muremure! Ineu nau qoragi na ure!”