Read East Ambae JON 17 Bible Online

JON 17 - East Ambae bible

JON 17

¹Lo tagui leo ngaha i Jisas u veve mo rovo, nge mo dada sueulu, mo veve vena: “Mama, a tarogi u vanai beno. Iniko gon vai roroagi Netumu, huri ve i Netumu vin vei roroaginigo.

²Huri niko gu bete na managi lawea goro na tangaloi doluegi, huri ve na betera na mwasoana radu lawe na tangaloi doluegi ngerehi niko gu bete lawea.

³‘Ko a mwasoana radu a iloilogi: huri ve a tangaloi rain ilogo, ve niko i God hogo gatagale hogosie, ko ve rain ilo Jisas Kraes, ngehi iniko gu horae.

⁴Ineu nau vei roroaginigo lo ure ngaha; a tabanagi ngehi gu bete laweau ve nain veie u rovo.

⁵Siserigi ngaha, Mama, gon vai roroagieu, gena roroa nge tauhi u toga meieu ko meigo hi nau tomue siu gom bei teu na ure.

⁶“Ineu nau haharaginigo lawe na tangaloi ngerehi niko gu bete laweau dena ure. Ingere a nomu, siu iniko gu betera laweau. Ko ingere rau ronghuri na nomu leo.

⁷Siserigi ngaha ingere ram ilo huri ve vataha gineu hi gu bete laweau ram vanai denigo.

⁸Huri ineu nau bete na leo huhui hi lawera niko gu bete laweau, ko ingere rau lei vurugeginie; ingere ram ilo hogo huri ve ineu nau vanai denigo, ko ingere ram ladohogo ve iniko gu horau vanai.

⁹“Ineu nam tataro hurire. Ineu na he tataro tea huri na tangaloi doluegi talo ure, nge hurire hi gu betera laweau, huri ingere rau voragi nomu.

¹⁰A gineu doluegi ngerehi neu nam hako a nomu, ko a noku roroa mo haharagi lo ulure.

¹¹“Ko siserigi ngaha ineu nam vanai lobemu; ineu nain he toga tea taligu lolo ure, nge ingere ram toga lolo ure. Mama gogona! Gon leogorora rain mwaso gena huireanai henamu, a henagi hi gu bete laweau, siu ingere rain voragi sinobu gatagale mwere igideru duru gatagale.

¹²Lo tarogi hi nau toga meire nau leogorora rain mwaso gena huireanai henamu, a henagi hi gu bete laweau. Ineu nau koko gorora dena gineu esi, ko ihine tea gatagale denire he sala tea, nge a tangaloi hogosie hi u eno beno huri ve vin sala tamwere, huri ve vin vagahorongi na Reve reve Gogona.

¹³Ko siserigi ngaha ineu nam vanai lobemu ko nam veve na gineu ingere ngaha lolo ure siu huri ve ingere rain hakovi na noku havuhevu ko huri ve a havuhevu hi vin horo mangadi lolo lolora.

¹⁴Ineu nau bete na nomu leo lawera ko a tangaloi talo ure ngaha ram leomasire, huri a leo ingere ngaha hatie talo ure ngaha, mwerehi ineu vage hatie talo ure ngaha.

¹⁵Ineu nahe navuhigo tea huri ve goin lei vohoginire dena ure ngaha, nge huri ve goin leogoro na mwasoara deni vui esi.

¹⁶Ingere hatie talo ure ngaha, mwerehi ineu hatie talo ure ngaha vage.

¹⁷Gon vagataire huri na nomu tabanagi lo nomu leohogo, huri a nomu leo huhui a hogo.

¹⁸Ineu nam horara sulolo ure mwerehi niko gu horau sulolo ure.

¹⁹Ko ineu nam beteau siboku lawego hurire, huri ve ingere vage, rain sireginire lawego lo hogo.

²⁰“Ineu nahe tataro tea hurire hogosie, nge vage huri na tangaloi ngerehi ram ladohogo luku a vevenagi nora leo.

²¹Ineu nam tataro huri ve ingere doluegi rain gatagale. !Mama! Ve ingere rain toga luderu, mwerehi niko gom toga luku ko ineu nam toga lumu. Ve ingere rain gatagale, siu ve a tangaloi talo ure rain ladohogo huri ve iniko gu horau vanai.

²²Ineu nau bete na roroa hi lawera iniko gu bete laweau, siu ve ingere rain gatagale, mwere igideru duru gatagale:

²³ineu lure ko iniko luku, siu ve ingere rain voragi gatagale vohogi, huri ve a tangaloi talo ure rain ilo huri ve iniko gu tabera mwerehi gu tabeau.

²⁴“!Mama! Iniko gu betera laweau, ko ineu nam taranire ve rain toga meieu aiehi neu nain toga, huri ve ingere rain lehi na noku roroa, a roroa hi gu bete laweau; huri iniko gu tabeau tomue siu gom bei teu na ure.

²⁵!Mama hava na vovohoi! A tangaloi talo ure rahe ilogo tea, nge ineu nau ilogo, ko a tangaloi ingere ngaha ram ilo huri ve iniko gu horau vanai.

²⁶Ineu nau veire ram ilogo ko nain haharagi taligu lawera ve a tabetabe hi iniko gu tabeau ginie vin toga lure, ko ineu nain toga lure vage.”