Read East Ambae JON 18 Bible Online

JON 18 - East Ambae bible

JON 18

¹Lo tagugi hi i Jisas u tataro u rovo, ingeie mo vano meire nona rorongtagi ram gao na walui wei Kidron. A talu aiehi, ko i Jisas meire nona rorongtagi ram vano lolona.

²I Judas, a tangaloi hi u rongo na leoi gai Jisas, u ilo na mahogi hi, huri lo tarogi u sao Jisas meire nona rorongtagi ram kalo bubugi aiehi.

³I Judas mo vano lolo talu mena buri soldia meire bolisman denire muei rugurugu meire Varise, ram hakovi na here bulebule mena laet ko a lakoi vuro.

⁴I Jisas u ilo na gineu doluegi hi ve rain vei lawea, ko mo dige vano mo veve lawera vena, “?Ihine hi nem hikesie?”

⁵‘Ngere ram duvi lawea vena, “I Jisas ta Nasaret.” I Jisas mo veve vena, “Ineu ngaha.” I Judas vage, a tangaloi u rongo na leoi gana, mo labe aiehi meire.

⁶Lune i Jisas mo veve lawera vena, “Ineu naha,” ram susudori ram soi sulo tano.

⁷Siu i Jisas mo huire taligu vena, “?Ihine hi nem hikesie?” Ingere ram veve vena, “I Jisas ta Nasaret.”

⁸I Jisas mo duvi lawera vena, “Nau veve beno lawe gimiu huri ve ineu ngaha. Tare ve nem hikesieu, nen sireginire lavasigi ngaha ran vano.”

⁹(Nge mo veve mwere ngaha huri ve a leo hi u vevea vin eno lune hogo: “A tangaloi gatagale he sala tea, Mama, denire hi gu betera laweau.”)

¹⁰I Saemon Bita u hakovi na bue; nge mo dangea, mo tai vano lo tangaloi tabanagi noi rugurugu lawua, ko mo tai sue na qerona lo matue. A tangaloi hi a henana i Malkas.

¹¹I Jisas mo veve lawe Bita vena, “Gon tau na nomu bue taligu lolo tantanogi. ?Tau gom lado ve nain he inu na lahai gagarasiana tea i Tamaku u bete laweau?”

¹²A buri soldia mena nona tomtomuegi ko ira bolisman nora duvi Israel ram wiri bibi Jisas, ram vauhie,

¹³ko ram laie vano gitomue lawe Anas, huri ingeie qeligei Kaiavas, ngehi a rugurugu lawua lo higao hi.

¹⁴I Kaiavas hi u veve haharagi lawera duvi Israel huri ve u garea ve a tangaloi gatagale vin mate huri na sinobu.

¹⁵I Saemon Bita ko a rorongtagi tuegi rom huri Jisas. A rugurugu lawua u ilo vurugegi na rorongtagi tuegi hi, ko nge mo vano mei Jisas sulolo ara noi rugurugu lawua hi.

¹⁶I Bita mo toga varea lo matai ara. A rorongtagi tuegi hi a rugurugu lawua u ilo vurugeginie mo mwalue vano, mo laqa lawe na taqalugu lo matai ara ko mo lai Bita sulolo ara.

¹⁷A taqalugu lo matai ara mo veve lawe Bita vena, “?Wa iniko hatie rorongtagi gatagale noi tangaloi ngaha?” I Bita mo duvi lawea vena, “Hatie, ineu hatie.”

¹⁸A gamwadidi u lawua ko ingere tangaloi tabanagi meire bolisman ram hure na manonoi avi ko ram labe dalie ram madinu. I Bita mo vano ko mo labe meire mo madinu.

¹⁹A rugurugu lawua mo hui Jisas huri na nona rorongtagi ko huri na nona leo huhui.

²⁰I Jisas mo duvi lawea vena: “Gesegi nam laqa lo ute lawua lawe na sinobu doluegi; gesegi nam huhui lolo valei soneana ko lolo Sara Gogona, ingere duvi Israel ram sone bubugi aiehi. Nahe veve haro vunigi na gineu tea.

²¹?Huri hava gineu gom huieu? Gon hui na sinobu ingere hi rau rongoau huri hava gineu nau veve lawera; ingere rau ilo na hava gineu hi nau veve.”

²²Lune i Jisas mo veve mwere ngaha, gatagale denire bolisman mo rabasie mo veve vena, “Gu huire mwere na hava gineu huri gom laqa mwerehi lawe na rugurugu lawua!”

²³I Jisas mo duvi lawea vena: “Tare ve nau veve na gineu esi, gon veve lawera doluegi tangaha hurie. ?Nge tare ve nau veve na gineu garea, huri hava gineu gom tiqarieu?”

²⁴Siu i Anas mo hora i Jisas lawe Kaiavas i rugurugu lawua mena garo vauveu lo limana.

²⁵I Saemon Bita mo labe mo madinu. Siu ingere lavasigi ram veve lawea vena, “?Wa iniko hatie nona rorongtagi gatagale?” Nge i Bita mo tahae mo veve vena, “Hatie, ineu hatie.”

²⁶A tangaloi tabanagi gatagale noi rugurugu lawua, ingeie hi i havai tangaloi hi i Bita u tei sue na qerona, mo huie vena, “?Wa na he lehigo tea meie lolo talu?”

²⁷I Bita mo tahae taligu. Ko siserigi a toa mo tarere.

²⁸Ngere ram lai Jisas dena valei Kaiavas sulolo ara mo waregi vena Braetoriam, huri ve a valei Kavman, lolo robongi siaga. Ira lawua nora duvi Israel ra he ahu tea sulolo Braetoriam vai teu ram vagasolora ginie sibora, nge huri ve rain geni lei na hinagai Halegagaliu.

²⁹Siu i Baelat mo mwalue suvarea lobera mo veve vena, “?Nem vaivei na tangaloi ngaha huri na hava gineu?”

³⁰Ngere ram duvi vena, “Gain he laie tea tavanai lawego huri ve nge he galegaleasi tea.”

³¹I Baelat mo veve lawera vena, “Gimiu sibomiu nen laie ko nen veveginie na huri na nomiu tauleo.” Ira lawua nora duvi Israel ram duvi lawea vena, “Hate leo siregi huri ve gain vei vagamate ihine tea.”

³²(U vei mwere ngaha huri ve a havagineu hi I Jisas u veve huri ve vin mate mwerehilogo vin eno lune.)

³³I Baelat mo ahu taligu sulolo Braetoriam ko mo ware Jisas mo huie vena, “?Wa iniko i ratahigi nora duvi Israel?”

³⁴I Jisas mo duvi vena, “?Wa a leo huihui ngaha mo vanai denigo sige a tangaloi wagineu rau veve lawego hurieu?”

³⁵I Baelat mo duvi vena: “?Gom lado ve ineu a duvi Israel? ?Nge a nomu sinobu sibomu ko a nora muei rugurugu ngerehi rau betego vanai laweau? Gu vei na hava gineu?”

³⁶I Jisas mo duvi vena, ?A noku tanoi ratahigi hatie talo ure ngaha, ve mwere a noku tanoi ratahigi talo ure ngaha, irahine hi ram hurieu ram qalo goroau nain he vano tea lo limara lawua goro nora duvi Israel. Hatie, a noku tanoi ratahigi mo eno lo ute wagineu.”

³⁷Siu i Baelat mo ule vena, “?Wa iniko a ratahigi?” I Jisas mo duvi vena, “Iniko gom veve ve ineu a ratahigi. Ineu nau vora, ko nau vanai sulo ure huri na gineu gatagale ngaha, ngehi ve nain laqagi huri na hogo. Ihine tea talo hogo mo ronghurieu.”

³⁸I Baelat mo huie vena, “?A hogo a havagineu?” Siu i Baelat mo mwalue taligu suvarea lobera duvi Israel ko mo veve lawera vena: “Na he haqe na gineu tea huri ve nain vevegi vagamatea.

³⁹Nge mo huri na nomiu doridori, gesegi nam siregi na tangaloi vauveu gatagale lawe gimiu lo taroi Halegagaliu. ?Nem tarani huri ve nan siregi tabetabegi na ratahigi nora duvi Israel lawe gimiu?”

⁴⁰Ingere ram ulo vena, “Ingeie hatie, nge i Barabas!” (I Barabas nge a tangaloi balubelu.)