Read East Ambae JON 19 Bible Online

JON 19 - East Ambae bible

JON 19

¹Siu i Baelat mo lai beragi Jisas ve ran talie.

²Ira soldia ram virigi na garo kau mo voragi na qatulibo, ko ram tarie lo qatune; ram saru goro Jisas gina luqe memea dodoga huri ve a luqara ratahigi,

³‘ko ram vanai lobena ram veve vena, “Io, garea, i Ratahigi nora duvi Israel!” Ko ram hage ram rabasie.

⁴I Baelat mo mwalue vano taligu ko mo veve lawera vena, “Leo, nain leie vanai tavanai tangaha lawe gimiu huri ve nein leo ve nahe haqe na gineu tea huri ve nain vevegi vagamatea.”

⁵Siu i Jisas mo mwalue suvarea, mo tari na qatulibo hi a garo kau ko mo saru na luqe memea dodoga. I Baelat mo veve lawera vena, “Leo, a tangaloi hi nge ngaha.”

⁶Lune a muei rugurugu meire bolisman ram lehie ram ulo vena, “Toto vehavehaginie! Toto vehavehaginie!” I Baelat mo veve lawera vena, “Nen laie, nen toto vehavehaginie sibomiu, huri nahe haqe na gineu tea huri ve nain vevegi vagamatea.”

⁷Ira lawua nora duvi Israel ram duvi lawea vena, “A nomai tauleo mo veve huri ve ingeie vin mate, huri mo vaie sibona huri ve ingeie i Netui God.”

⁸Lune I Baelat mo rongo ram veve mwere ngaha, nge mo matagu mo vagevage.

⁹Nge mo vano taligu sulolo Braetoriam ko mo veve lawe. Jisas vena, “?Iniko gom vanai logo?” Nge i Jisas he duvi tea lawea.

¹⁰Siu i Baelat mo veve lawea vena, “?Wa iniko goin he laqa tea meieu? ?Wa go he ilo tea ve nam hakovi na huireana ve nain siregi tabetabe ginigo, ko vage nam huireana ve nain toto vehaveha ginigo?”

¹¹I Jisas mo duvi lawea vena, “Iniko gohe hakovi na huireana tea goroau tare ve God he betea tea lawego. Siu a bugui galegaleasi mo eno lo tangaloi hi u leieu lawego u lawua liu.”

¹²Lune i Baelat mo rongo mwere ngaha inge mo vaileo vena haqe na matahala vena siregi tabetabegi Jisas. Nge ira duvi Israel ram ulo ram veve vena, ?Tare ve iniko goin siregi tabetabe ginie iniko hatie buluana noi Sisa, ihine tea mo vaie sibona ve ingeie a ratahigi, ingeie mo tavului vuro mei sisa.”

¹³Lune i Baelat mo rongo na leo ingere ngaha, nge mo lai Jisas suvarea, ko mo toga hivo lolo herei vevegi lo tantano u waregi ve “A vatu tano bona” (lo leo ta Hibru ve “Gabata.”)

¹⁴U kakarani lawe na matainaho tu vovohoi lo rani tomue siu a Halegagaliu. I Baelat mo veve lawera duvi Israel vena, “Leo, a nomiu ratahigi nge ngaha!”

¹⁵Ngere ram ulo vena, “Lai vohoginie! Lai vohoginie! Toto vehaveha ginie!” I Baelat mo huire vena, “?Wa Igimiu nem tarani ve nan toto vehavehagi na nomiu ratahigi vehavehagi na nomiu ratahigi?” Ira muei rugurugu ram duvi vena, “A nomai ratahigi gatagale hogosie i Sisa!”

¹⁶Mo rovo i Baelat mo lai Jisas vano lawera huri ve ran toto vehave haginie. Siu ram lai Jisas vano lo limara.

¹⁷Ingeie mo mwalue mo vano, mo wali na nona gai saroutu sibona ko mo vanai sulo ute u waregi ve “A tanoi Vurugi Qetu” (lo leo ta Hibru ve “Kolkota.”)

¹⁸Aiehi ram toto vehavehaginie, ko a tangaloi gairue vage meie, tuegi lo mwarasana tavulugi ko tuegi lo mwarasana tavulugi, ko i Jisas lo livugara.

¹⁹I Baelat u uli na leo ko mo taue lo gai saroutu. Mo valu mwere ngaha vena, “I Jisas ta Nasaret, i Ratahigi nora duvi Israel.”

²⁰Ngere duvi Israel rau sao rau velu na gineu ngaha, huri a ute hi rau toto vehavehagi Jisas aie he vagahao tea dena togagi venue, ko u uli lo leo ta Hibru, Latin ko Krik.

²¹Siu ira muei rugurugu nora duvi Israel ram veve lawe Baelat vena, “Gon uli reve ve ‘I Ratahigi nora duvi Israel,’ nge ve ‘A tangaloi ngaha u veve sibona vena, Ineu i Ratahigi nora duvi Israel.’ ”

²²I Baelat mo duvi vena, “A hava gineu nau uli, nau uli.”

²³Lo tagugi hi ira soldia rau toto vehavehagi Jisas, rau lei na luqana, ram waheginie hala gaivesi, a hala gatagale lawe na soldia gatagale. Ko ram lai na luqana lolona, u vavatuginie lo mavusui galego gatagale, hatie hariherigi lune.

²⁴Ira soldia ram veve veveginire vena, “Da mese hevea; nge da tuli na taisi, dain leo huri ve ihine vin leie.” Mo vai mwere ngaha huri ve vin vagahorongi na Reve reve Gogona u veve vena: “Ingere rau wahegi na luqeku vatavatahaginire, ko rau tuli na taisi huri na gavuku.” Siu ira soldia rau vei mwerehi.

²⁵A vavine ram labe kakarani lobei gai saroutu noi Jisas, i ratahine, i tuei ratahine, i Meri i gahorai Klobas, ko i Meri ta Makdala.

²⁶I Jisas mo lehi ratahine ko a rorongtagi hi u tabea rom labe aiehi, siu nge mo veve lawe ratahine vena, “Vavine, i netumu nge ngaha.”

²⁷Mo rovo nge mo veve lawe na rorongtagi vena, “Leo, i ratahimu nge ngaha.” Ko dena tarogi hi a rorongtagi mo laie ve vin toga lo valena.

²⁸Lo tagugi ngaha i Jisas u ilo ve a gineu doluegi rau rovo; ko huri ve vin vagahorongi Reve reve Gogona, nge mo veve vena, “Nam madogu.”

²⁹A laha aiehi, u horo gena waen gagasi; ram duduni na qasa lolona, ram turuginie lo mavuro, ram sogaginie sulo singona.

³⁰I Jisas mo lai na waen ko mo veve vena, “U rovo!” Siu nge mo taigi na qatune ko mo mate.

³¹Mo rovo ira lawua nora duvi Israel ram navu dein Baelat vena horara tau na leo ve ran kore na karure, tangaloi ngerehi ko ran lai surire dena gai saroutu. Ram vai mwere ngaha huri a rani hi a rani tomuegi dena Rani Mangaana, ko rahe tarani tea ve a beture rain eno lo gai saroutu lo Rani Mangaana, huri a Rani Mangaana ngaha mo vanai u gogona.

³²Siu ira soldia ram vanai ram kore na karui tangaloi tuegi siu ram kore vagasigi na karui tuana rau toto vehavehaginire mei Jisas.

³³Nge lune ram vanai lobei Jisas, ram leo u mate beno, siu rahe kore na karure tea.

³⁴Nge gatagale denire soldia mo menu na mwarasai Jisas gena nona sari ko siserigi a dai ko a wai rom hale.

³⁵Ihine u lehi na gineu ngaha u vei, u laqagi hurie, siu huri ve igimiu vage nein ladohogo. Ve a havagineu hi u veve a hogo, ko ingeie mo ilo ve a hava gineu mo laqagi a hogo.

³⁶U vei mwere ngaha huri ve vin vagahorongi na Reve reve Gogona u veve vena, “A huine gatagale vin he mavolo tea.”

³⁷Ko a Reve reve Gogona tuegi vage mo veve vena, “A sinobu rain leo vano lui hine hi rau menue”

³⁸Lo tagugi ngaha, Josev ta Arimatia mo hui Baelat ve vin leilei na betui Jisas. I Josev hi a rorongtagi noi Jisas, nge u toga hiligi, huri mo mataguginire ira lawua nora duvi Israel. I Baelat mo siregi lawea, siu Josev mo vano mo lai vohogi na betune.

³⁹I Nikodimas, ingeie hi u vanai tomue lobei Jisas lolo bongi, nge u vano mei Josev, mo lai na gineu buhoru gairue, a mir ko a alos mo rogeginire, bataha mavanagi a kilo vudolue.

⁴⁰A tangaloi gairue hi rom lai na betui Jisas ko rom luqesie gina galego mavute mena gineu buhoru hi, huri na lengagi nora duvi Israel huri ram vagatai na tarabesi tangaloi u mate mo rarai huri tuletulegi.

⁴¹A talu lo mahogi hi rau toto vehavehagi Jisas aie ko lolo talu hi a malangai mateana garaqa, ngehi rahe tulegi na tangaloi tea lolona mosigei.

⁴²A tangaloi rau tei Jisas lolo malanga hi a vevenagi u kakarani taiehi ko ira duvi Israel ram vaga rarai vena a Rani Mangaana na tauvuigi.