Read East Ambae JON 21 Bible Online

JON 21 - East Ambae bible

JON 21

¹Lo tagugi ngaha, i Jisas mo haharaginie sibona vagatagale vage lawe na nona rorongtagi lo mwararai wei Taibirias. Mo haharaginie mwerehi.

²I Saemon Bita, i Tomas (u waregi ve a Malava), i Nataniel (ngehi talo togagi venue Kena lolo vanue Kalili), ira netui Sebedi, ko a rorongtagi gairue vage ingere bubugi doluegi.

³I Saemon Bita mo veve lawera vena, “Ineu nan vano nan siusiu.” Ingere ram veve lawea vena, “Igamai vage dain vano bulu.” Siu ram vano ram hivo sulolo aka; nge lolo bongi hi ingere rau siu rahe revei na havagineu tea vohogi.

⁴Lolo robongi siaga i Jisas mo labe lo mwararai wei, nge ira rorongtagi ra he ilo tea huri ve i Jisas.

⁵I Jisas mo huire vena, “?Ira buluana, wa neu reve te ige?” Ingere ram duvi vena, “Hatie vohogi.”

⁶Ingeie mo veve lawera vena, “Nen tuli na gabe sulo mwararai aka lo matue, ko igimiu nein weli lei na ige.” Siu ram tuli na gabe, ko ram reve samweginie taligu sulolo aka, huri ingere rau weli na matolui.

⁷A rorongtagi ngehi i Jisas u tabea mo veve lawe Bita vena, “A Huqe ngehi!” Lune Saemon Bita mo rongo huri ve a Huqe, ingeie mo taliteligi na luqana huri u tugu vohogi na luqana (huri ingeie u tino vurogi) ko mo qale sulolo wai.

⁸A rorongtagi lavasigi ram hamai suvarea lo aka, ram reve na gabe u horo gena ige. Ingere ra he vagahao tea dena vanue, bataha ngava ngavulu gailime.

⁹Lo tarogi hi ram rovo suvarea ram lehi na manonoi avi aie mena ige u hongi lune ko a bereti.

¹⁰I Jisas mo veve lawera vena, “Nen lai na ige lavasigi laweau ngerehi nem bei welire.”

¹¹I Saemon Bita mo hivo lolo aka ko mo revei na gabe suvarea, u horo gena ige lalawua, a ige vudolue vagatagale avigi ngavulu gailime domwagi gaitolu; hatie huri ige u sao lawagi nge a gabe he madare tea.

¹²I Jisas mo veve lawera vena, “Nen vanai nen gagani.” Hatie ve gatagale denire rorongtagi vena hui lehe vena, “?Iniko ihine?” Huri ingere rau ilo huri ve ingeie a Huqe.

¹³Siu i Jisas mo vanai, mo lai na bereti, ko mo bete lawera; ko a ige vage.

¹⁴I Jisas mo haharaginie sibona lawera rorongtagi vagatoligi ngaha tagugi ingeie u maraga dena mateana.

¹⁵Lo tagugi ingere rau gagani u rovo beno, i Jisas mo veve lawe Saemon Bita vena, “?Saemon, netui Jon, wa iniko gom tabeau u liu denire naha?” Ingeie mo duvi vena, “Io, Huqe, gom ilo huri ve ineu nam tabego.” I Jisas mo veve lawea vena, “Gon vangani na buleku sibsib ngerehi.”

¹⁶I Jisas mo veve lawea vagatuegi vena, “?Saemon netui Jon, wa iniko gom tabeau?” Ingeie mo duvi vena, “Io, Huqe, gom ilo huri ve nam tabego.” I Jisas mo veve lawea vena, “Gon leogoro na buleku sibsib.”

¹⁷I Jisas mo veve lawea vagatoligi vena, “?Saemon, netui Jon, wa iniko gom tabeau?” I Bita mo hahagavi huri i Jisas u veve lawea vagatoligi vena, “?Wa iniko gom tabeau?” Ko mo veve lawea vena, “Huqe, iniko gu ilo na gineu doluegi. Gom ilo huri ve ineu nam tabego.” I Jisas mo veve lawea vena: “Gom vangani na buleku sibsib.

¹⁸A hogo, a hogo, nam veve lawego vena, lo tarogi hi iniko gu mwalakelo, gu wesigi na wasimu ko gom vano logo mwere gu tarani; nge lo tarogi hi iniko goin tamaragai goin horagi na limemu ko a tangaloi wagineu vin veuhigo ko vin leigo sulogo hi go he tarani tea ve goin vano aie.”

¹⁹(I Jisas mo veve ngaha mo matamwasaragi huri ve i Bita vin mate mwerehilogo ko vin vei roroagi God ginie.) Mo rovo, i Jisas mo veve lawea vena, “Gon hurieu!”

²⁰I Bita mo kileu ko mo lehi na rorongtagi ngehi i Jisas u tabea mo hurire, ngehi u toga mo olo vano lobei Jisas lo taroi gaganie ko mo huie vena, “?Huqe, ihine vin rongo na leoi gamu?”

²¹Lune i Bita mo lehie, nge mo veve lawe Jisas vena, “?Huqe, wuraha huri na tangaloi ngaha?”

²²I Jisas mo duvi vena, “?Tare ve ineu nam taranie ve vin toga vin dadari lune ineu nain vanai teligu, a nomu hava gineu lune? Iniko gon hurieu!”

²³Siu a rorogi hi mo wahegi mo vano lawera reretehigi huri ve a rorongtagi ngaha vin he mate tea. Nge i Jisas he veve tea lawea huri ve ingeie vin he mate tea, nge mo veve vena, “Tare ve ineu nam taranie ve vin toga vin dadari lune ineu nain vanai teligu, a nomu hava gineu lune?”

²⁴Ngeie hi a rorongtagi u laqagi matamwasaragi huri na gineu ingere ngaha ko mo reveire; ko igamai gau ilo huri ve a hava gineu hi u laqagi a hogo.

²⁵A gineu sao lavasigi vage hi i Jisas u veire. Tare ve vin reveire doluegi, nam lado ve a ure doluegi vin he hako lai na buk ngerehi tea vin reveire.