Read East Ambae JON 4 Bible Online

JON 4 - East Ambae bible

JON 4

¹Ira Varise ram rongo ve i Jisas u veire tangaloi ram voragi nona rorongtagi ko mo garuhigogona-ginire rau sao u liu dein Jon.

²Nge i Jisas sibona he garuhigogona-ginire tea, nge a nona rorongtagi rau garuhigogona-ginire.

³Tavohe hi i Jisas mo rongo na gineu hi, nge mo siregi na vanue Judia ko mo vano taligu sulo vanue Kalili;

⁴lo turegi ingeie ve vin vano turu na vanue Samaria.

⁵Nge mo vanai sulo togagi venue lolo vanue Samaria a henagi Saeka, nge he vagahao tea dena tano hi i Jekob u betea lawe netune Josev.

⁶A wel noi Jekob aiehi, ko i Jisas u dige u sorue lo turegi, mo toga lo matai wel hi. Lo matainaho tuvovohoi.

⁷A vavine ta Samaria u vonai vena utu na wai, ko i Jisas mo veve lawea vena, “Gon bete te wai laweau nan inu.”

⁸Huri a nona rorongtagi rau vano lolo togagi venue ve ran voli na hinaga.

⁹A vavine ta Samaria hi mo duvi vena, “Iniko a tangaloi ta Judia ko ineu ta Samaria. ?Huri hava gineu gom huieu huri na wai inuinu?” (Huri a tangaloi ta Judia ra he bulubulu garea tea meire ta Samaria.)

¹⁰I Jisas mo duvi lawea vena, “Tare ve iniko gu ilo na hava gineu i God mo tarani ve vin bete lawego, ko ineu ihine hi nam huigo huri na wai inuinu, goin huieu ko ineu nain bete na wai lawego ngehi a wai mwaso.”

¹¹A vavine mo veve vena, “Huqe, iniko go he hakovi na lahai wei tea ko a wel hi u bue. ?Nge goin lei na wai mwaso hi logo?

¹²I tamai i Jekob u bete na wel nge ngaha lawe gamai; ingeie meire netune ko a bulana kakarue doluegi rau inu denie. ?Wa iniko gu lawua den Jekob?”

¹³I Jisas mo duvi lawea vena: “Vataha hine vin inu dena wai nge ngaha vin madogu taligu;

¹⁴nge ihine tea vin inu na wai hi ve ineu nain bete lawea vin he madogu tea taligu vin tuei. Huri a wai ngehi neu nain bete lawea vin voragi waimeuri vin mevuevue lolo lolona, ko vin bete lawea na mwasoana radu.”

¹⁵A vavine mo veve lawea vena, “Huqe, gon bete na wai hi laweau! Huri nain mese madogu taligu, sige nain mese vanai tangaha huri ve nain utu na wai.”

¹⁶I Jisas mo veve lawea vena, “Gon vano gon ware tamai netumu, ko nero vanai tangaha.”

¹⁷A vavine mo veve vena, “Ineu hatie tamai netuku.” I Jisas mo duvi vena: “Gu veve hogo tavohe gom veve huri ve iniko hatie tamai netumu.

¹⁸Huri iniko gu legi mena mwera gailime, ko a mwera ngehi gom toga meie siseri ngaha hatie tamai netumu. Gu veve hogo lo gineu hi.”

¹⁹A vavine mo veve lawea vena, “Huqe, nam lehigo ve iniko a tangaloi veve rarai.

²⁰I retamamai ta tuei ta Samaria rau huduhudu goro God lo vusi ngaha, nge igimiu ta Judia nem veve huri ve a vanue Jerusalem ngehi a ute ve dain huduhudu goro God aie.”

²¹I Jisas mo veve lawea vena: “Vavine, gon ladohogogieu, a tarogi vin vanai tavohe hi rain he huduhudu goro Mama tea lo vusi ngaha sige lolo vanue Jerusalem.

²²Igimiu ta Samaria ne he ilo te vurugegi ve ihine hi gimiu nem huduhudu goroe; igamai ta Judia gau ilo ve ihine hi gamai gam huduhudu goroe, huri a mwasoana mo vanai denire ta Judia.

²³Nge a taro vin vanai, ko u vanai beno, tavohe hi ingere ram huduhudu goro hogo rain huduhudu goro Mama lo Vui ko lo hogo. Huri i Mama mo tarani na tangaloi mwerehi ve rain huduhudu goroe.

²⁴I God a Vui, ko ihine hi mo huduhudu goroe, vin huduhudu goroe lo Vui ko lo hogo.”

²⁵A vavine mo veve lawea vena, “Ineu nam ilo huri ve i Mesaia, (ngehi Kraes,) vin vanai. Tavohe hi ingeie vin vanai ingeie vin veve na gineu doluegi lawe gide.”

²⁶I Jisas mo duvi vena, “Ineu ngaha hi Mesaia, nam laqa meigo.”

²⁷Lo tarogi hi a rorongtagi noi Jisas ram vanai taligu; ko ingere ram awogi huri ram haqea mo laqa mena vavine. Nge hatie gatagale denire ve na veve lawea vena, “?Gom tarani na hava gineu?” sige “?Huri hava gineu gom laqa mena vavine?”

²⁸Mo rovo, a vavine hi mo tau na nona lahai wei, mo vano sulolo togagi venue, ko mo veve lawera sinobu aie hi vena,

²⁹“Nen vanai nen lehi na tangaloi u veve laweau huri na gineu doluegi hi nau veire. ?Bataha ingeie hi i Kraes?”

³⁰Siu ingere ram siregi na togagi venue hi ko ram vano lobei Jisas.

³¹Lo taro hi a nona rorongtagi ram veve lawe Jisas vena, “Huhui, gon gani te hinaga!”

³²Nge ingeie mo duvi lawera vena, “Ineu nam hakovi na hinaga ve nain geni ngehi gimiu ne he iloe tea.”

³³Siu a rorongtagi ram tauvuigi ram huihui ginire sibora vena, “?Sige a tangaloi tea u vanai mena hinaga lawea?”

³⁴I Jisas mo duvi vena, “A gaku hinaga ngehi ve nain vei na taraniana noi ihine hi u horau vanai ko nain vei vunuhi na nona tabanagi.

³⁵“Mwere a nomiu matagi leo vena, ‘A vule gaivesi vage ko mo rovo a taro matue.’ Ineu nam veve lawe gimiu, nen leo vano lo talu: a rivurivu rau metue beno huri lailei.

³⁶A tangaloi mo lai na mwasi rivurivu mo hakovi na gaitawe huri ko mo lai bubugi na mwasigi huri na mwasoana radu; siu huri a tangaloi rivurivu ko a tangaloi lailei roin havuhevu bubugi.

³⁷Huri a matagi leogi a hogo vena, ‘A tangaloi gatagale mo rivu, ko a tangaloi tuegi mo lailei.’

³⁸Ineu nau hora gimiu ve nein lei na mwasi rivurivu lolo talu ngehi nehe tabana tea aie; ingere tangaloi wagineu rau tabana aie, ko igimiu nem lailei na nomiu suesuegi dena nona tabana.”

³⁹A tangaloi u sao ta Samaria lolo togagi venue hi ram ladohogo lui Jisas huri na leo a vavine u veve vena, “Ingeie u veve laweau huri na gineu doluegi hi nau veire.”

⁴⁰Siu tavohe hi a tangaloi ta Samaria ram vanai lobena ingere ram huie ve vin toga meire; ko i Jisas u toga aiehi meire rani gairue.

⁴¹A tangaloi u sao vage ram ladohogo a vevenagi a leo noi Jisas,

⁴²ko ram veve lawe na vavine vena, “Igamai gam ladohogo siserigi ngaha, hatie huri na hava gineu hi gu veve, nge huri gamai sibomai gau rongoe, ko igamai gam ilo huri ve ingeie i Vagamwasoi na ure hogo.”

⁴³Lo tagui rani gairue hi, i Jisas mo mwalue ko mo vano lo vanue Kalili.

⁴⁴(Huri Jisas sibona u veve matamwasaragi vena, “Ingere ra he ladomavagi na tangaloi veve rarai tea lolo vanuana sibona.”)

⁴⁵Siu tavohe hi ingeie mo dadari lolo vanue Kalili a sinobu taiehi ram lai vurugeginie, huri ingere sibora rau vano huri na Hinagai Halegagaliu a Jerusalem ko rau lehi na gineu doluegi hi ingeie u veire lolo taro hi.

⁴⁶Siu i Jisas mo vano taligu sulo togagi venue Kena lolo vanue Kalili, aiehi ne u vei na wai mo dori gina waen. A tangaloi lawua gatagale nona ratahigi, netune a maresu mwera mo sege a Kabeniam.

⁴⁷Ingeie mo rongo ve I Jisas u vanai dena vanue Judia sulo vanue Kalili, ko mo vano lobena ko mo huie huri ve na hivo a Kabeniam ko na vagamwasoi netune hi, huri mo kakarani ve na mate.

⁴⁸I Jisas mo veve lawea vena, “Igimiu ngehi ladohogo tea tare ve igimiu nein he lehi na tabana lawua tea talo managi.”

⁴⁹A tangaloi lawua hi mo duvi goroe vena, “Huqe, gon vanai meieu siseri tomue siu i netuku mo bei mate.”

⁵⁰I Jisas mo veve lawea vena, “Gon vano, i netumu mo mwaso!” A tangaloi hi mo ladohogo lo leo noi Jisas ko mo vano.

⁵¹Mo mule mo vano taligu lo valena, a nona tangaloi tabanagi ram haqea lo turegi ram veve lawea vena, “I netumu u mwaso!”

⁵²Siu nge mo huire ve lo hava aho hi i netune u mwaso, ko ingere ram veve vena, “A mahagite u sireginie nainoa lo aho gatagale lo matainaho tudori.”

⁵³Siu i tamana mo ladohaqe huri ve lo taro gatagale tau hi i Jisas u veve lawea vena, “I netumu mo mwaso.” Siu ingeie meire doluegi talo valena ram ladohogo.

⁵⁴Ngaha a gigilegi tuegi i Jisas u veie lo tagugi u vanai dena vanue Judia sulo vanue Kalili.