Read East Ambae JON 5 Bible Online

JON 5 - East Ambae bible

JON 5

¹Lo tagugi ngaha, i Jisas mo hage a Jerusalem huri na Hinagai Halehagaliu.

²A Jerusalem a horoi wei mo eno kakarani lobei Matai Arai Sibsib, rau vutu na vale mo labe goro na horoi wei hi; a malumelu vale hi gailime; lo leo ta Hibru mo waregi na ute ngehi ve Betsaita.

³A buri sinobu lawua ram eno lo vavai malumelui vale hi, ngerehi ram sege, a matara rau dodo, ngerehi rau luku, ko ngerehi a beture rau mate. Ingere ram rarai na wai vena gilu,

⁴vevenagi gesegi a engsel nona Huqe mo hivo lolo horoi wei mo gilugi na wai. A tangaloi gatagale vin hivo lolo wai lo tagugi hi a wai u gilu vin maso dena hava segeana doluegi hi ram vaie.

⁵A tangaloi gatagale aiehi nge u sege a higaogi ngavulu gaitolu domwagi gaiwelu.

⁶I Jisas mo lehe mo eno aiehi, ko mo ilo huri ve a tangaloi hi u sege a tarogi u tuei lawuagi; siu nge mo veve lawea vena, “Wa iniko gom tarani ve gon mwaso?”

⁷A tangaloi hi mo sege mo duvi vena, “Huqe, hate tangaloi buluieu ve na taueu lolo horoi wei tavohe hi a wai mo gilu; lo taro hi ineu nam vaileo ve nan hivo lolona, a tangaloi wagineu u hivo lolona beno tomue denieu.”

⁸I Jisas mo veve lawea vena, “Gon maraga, gon wali na niemu, ko gon dige.”

⁹Siserigi a tangaloi hi u mwaso; nge mo wali na niana ko mo tavuigi mo dige. A rani hi u vei na gineu ngaha lune a Rani Mangaana.

¹⁰Siu ira lawua nora duvi Israel ram veve lawe na tangaloi hi u mwaso vena, “He garea tea ve goin weli na niemu lo Rani Mangaana, huri a leohora u gatogoro”

¹¹Ingeie mo duvi lawera vena, “A tangaloi hi u vagamwasoieu u veve laweau vena ‘Gon wali na niemu ko gon dige.’ ”

¹²Ingere ram huie vena, “Ihine hi u veve lawego ve gon wali na niemu, gon dige.’ ”

¹³Nge a tangaloi hi u mwaso he iloe tea huri ve ingeie ihine, huri Jisas u siregi na ute hi beno, a vevenagi huri a buri sinobu rau sao ingere aiehi.

¹⁴Lo tagugi hi, i Jisas mo haqea lolo Sara Gogona ko mo veve lawea vena, “Leo, gom mwaso taligu. Gon mese galegaleasi taligu, sige hatie a gineu esi liu vin vanai lumu.”

¹⁵Mo rovo, a tangaloi hi mo mwalue ko mo veve lawera lawua nora duvi Israel vena, “I Jisas hi ne u vagamwasoieu.”

¹⁶A vevenagi ngaha ira lawua nora duvi Israel ram tauvuigi ram vaivei Jisas, huri nge u vagamwasoi lo rani mangaana.

¹⁷Siu i Jisas mo duvi lawera vena, “I Tamaku mo tabana tuqaravu, ko ineu vage nam tabana.”

¹⁸A leo ngaha mo vaire tangaloi lawua lolo duvi Israel ram tarani garagaragi ve rain wehi Jisas; hate huri ve nge u vei utuhi na Leo hora huri na rani mangaana hogosie, nge huri u veve ve i God i Tamana sibona vage, lo matahala mwerehi ingeie mo vaie sibona vena tatarise mei God.

¹⁹Siu i Jisas mo duvi lawera vena: “A hogo, a hogo, nam veve lawe gimiu vena, i Netui he vai lei na gineu tea lo domine sibona; nge mo vai na gineu ngerehi hogosie mwere nge mo lehi Tamana mo vaire. A hava gineu hi i Mama mo vaie, i Netui vage mo vaie.

²⁰Huri i Mama mo tabe i Netui ko mo haharagi na gineu doluegi lawea ingeie mo vaire sibona. Ko nge vin haharagi na gineu lawea rain lawua dena gineu ingere ngaha, ko igimiu nein awogi huri.

²¹Lo matahala mwerehi teu, ingere i Mama mo vai ragasire rau mate ko mo vagamwasoire, mwerehi vage i Netui mo vagamwasoi rahine hi mo tarani.

²²Huri Mama he vevegi na tangaloi te gatagale. Ingeie u siregi na tanoi vevegi doluegi lawe Netune,

²³huri ve a tangaloi doluegi rain ladomavagi i Netui mwere ram ladomavagi i Mama. Ihine he ladomavagi i Netui tea he ladomavagi i Mama tea ngehi u horae vanai.

²⁴“A hogo, a hogo, nam veve lawe gimiu vena, hine mo rongo na noku leo, ko mo ladohogo lui hine hi u horau vanai, mo hakovi na mwasoana radu. Ingeie vin he veveginie tea, nge ingeie u liliu beno dena mateana sulo mwasoana.

²⁵A hogo, a hogo, nam veve lawe gimiu vena, a taro vin vanai ko u vanai beno, tavohe hi ira tamate rain rongo na diloi Netui God, ko ngerehi ram rongoe rain mwaso.

²⁶Huri mwere i Mama sibona ingeie a vuin mwasoana, mwerehi vage nge mo vai Netune mo voragi na vuin mwasoana.

²⁷Ko nge u siregi na tanoi vevegi lawea huri ingeie i Netui Tangaloi.

²⁸Igimiu nen mese awogi huri ngaha; huri a taro vin vanai tavohe hi irahine doluegi lolo qaru rain rongo na dilona,

²⁹ko ingere rain mwelue dena qaruhire: ngerehi rau vei na tabana garea rain maraga sulo mwasoana, ko ngerehi rau vei na galegaleasi rain maraga sulo vevegi.

³⁰“Ineu nain he vai na gineu tea lo noku huireana siboku; ineu nam vevegi lei hogosie mwere i Mama mo veve laweau, siu a noku vevegi u vovohoi, huri na he vaileo tea ve nan huri na noku taraniana, nge hogosie na taraniana noi hine hi u horau vanai.

³¹“Tare ve ineu nam laqagi na leo hurieu siboku, a noku leo hate hogo.

³²Nge a tangaloi wagineu mo laqagi na leo hurieu, ko ineu nau rau ilo ve a hava gineu hi mo veve hurieu a hogo.

³³Igimiu neu hora na nomiu tangaloi ram vano lobei Jon, ko ingeie u laqagi na hogo lawe gimiu.

³⁴Na he veve tea ngaha huri ve nam tarani ve a tangaloi vin laqagi matamwasaragi hurieu; nge nam veve ngaha hogosie huri ve igimiu nein mwaso.

³⁵I Jon u mwere na leleo; mo mui ko mo varavara, ko igimiu neu tarani ve nen havuhevu gina nona leleo lo mahogi qilodo.

³⁶Nge a gineu wagineu mo laqagi hurieu u liu dena leo noi Jon u laqagi hurieu, ngehi a tabana ngerehi nam vaire, a tabana ngerehi i Mama u betera laweau ve nain veire, ram laqagi matamwasaragi hurieu ve i Mama u horau vonai igimiu nehe lehe tea sige nehe rongo na dilona tea.

³⁷Ko i Mama u horau vanai, ingeie vage mo laqagi matamwasaragi hurieu. Igimiu ne he rongo na dilona tea vohogi, igimiu ne he lehi na tarabesine tea vohogi;

³⁸ko igimiu ne he hakovi na nona leo tea lolo lolomiu, huri gimiu ne he ladohogo tea lui hine hi nge u horae vanai.

³⁹Igimiu nem hikehike lo Reve reve Gogona huri nem lado huri ve nein haqe na mwasoana radu lolora. Ko a Reve reve Gogona ngaha nge tauhi mo ram laqagi na gineu hurieu!

⁴⁰Tau igimiu ne he tarani tea ve nen vanai lobeku huri ve nein hakovi na mwasoana.

⁴¹“Ineu na he hikesi na roroa tea dena tangaloi.

⁴²Nge ineu nam ilo gimiu; nam ilo ve a tabeana noi God he toga tea lo lolomiu.

⁴³Ineu nau vanai lo henai Tamaku, nge igimiu ne he lai vurugegieu tea; tare ve a tangaloi wagineu vin vanai lo henana sibona, igimiu nein lai vurugeginie.

⁴⁴?Igimiu nem tarani ve na roroa den vatavatahagi gimiu gagatalegi, nge igimiu ne he tarani tea ve nein hikesi na roroa mo vanai den God gatagale; tare ve u mwerehi, igimiu nein ladohogo lai wuraha?

⁴⁵Igimiu nen mese lado ve ineu nain vevegi vovohoi, gimiu lawe Tamaku. Nem lado talui Mosis, nge i Mosis hi vin vevegi vohogi gimiu.

⁴⁶Tare ve igimiu neu ladohogo lui Mosis, garea, gimiu nen ladohogogieu vage, huri ingeie u reve hurieu.

⁴⁷?Nge tare ve gimiu ne he lado tea hogo lo nona revereve, gimiu nein ladohogo lo noku leo wuraha?”