Read East Ambae JON 6 Bible Online

JON 6 - East Ambae bible

JON 6

¹Lo tagugi ngaha, i Jisas mo vano lo tavului wai ta Kalili (sige ta Taibirias.)

²A buri sinobu lawua ram hurie, huri ram lehi na gigilegi ngerehi nge u veire lune nge mo vagamwasoire segesege.

³I Jisas mo hage lo vusi ko mo toga hivo aie meire nona rorongtagi.

⁴A taroi Hinagai Halegagaliu u kakarani.

⁵I Jisas mo leo dalibulu ko mo lehi na buri tangaloi lawua ram vanai lobena, siu mo veve lawe Vilib vena, “?Dain voli na hinaga logo vin tatarise ve dain vangani na sinobu ingere ngaha?”

⁶Nge mo veve ngaha huri ve mo vailehi Vilib lune; huri ingeie u ilo beno huri na hava gineu hi ingeie ve vin vei.

⁷I Vilib mo duvi lawea vena, “Tare ve dain voli na hinaga gena vatu teri vaga ngavulu gairue, vin he tatarise tea meire ve rain geni wuwerigi vatahara.”

⁸A nona rorongtagi tuegi vage, i Andru, i tuei Saemon Bita, mo veve lawea vena:

⁹“A mwalakelo gatagale nge tangaha mo hakovi na bereti gailime me a ige gairue. Nge a hinaga hi u biti vohogi he tatarise tea huri na sinobu sao ingere ngaha.”

¹⁰I Jisas mo veve lawera vena, “Nen veve lawe na sinobu ran toga hivo.” A duvu u sao aiehi. Siu a sinobu doluegi ram toga hivo; a mwera u teri vagalime doluegi.

¹¹I Jisas mo lai na bereti, mo vevegareagi God hurie, me ko betea lawe na sinobu hi ram toga hivo. Nge mo vai mwerehi vage mena ige, ko ingere doluegi rau geni mwere ram tarani.

¹²Hi ingere doluegi rau guqe, i Jisas mo veve lawera nona rorongtagi vena, “Nen vile bulutegi na maututui bereti ngerehi ram eno, vate vai dam teregi na mautu utugi.”

¹³Siu ingere ram vile buluteginire, ko ram hogoni a gete hangavulu domwagi gairue rau medi gena mautu utui bereti gailime ngerehi ingere rau genie he rovo tea.

¹⁴A sinobu ram lehi na gigilegi ngaha i Jisas u vei, ram veve vena, “A hogo, nge ngaha a tangaloi veve rarai ngehi ve vin vanai sulo ure!”

¹⁵I Jisas mo ilo huri ve ingere ram tarani ve ran vanai ko rain garoginie huri ve vin voragi na ratahigi; siu nge mo dige beragi denire taligu mo hage lo vusi gahea.

¹⁶Lune mo vanai mo revirevi, a nona rorongtagi ram hivo sulo wai Kalili,

¹⁷ram kalo lo aka, ko ram vano lo tavului wei taligu vovohoi na togagi venue Kabeniam. Mo galolo, ko i Jisas he vano te mosigei lobera.

¹⁸Siserigi ngaha a langi huire mo here ko a wai mo reburebuge.

¹⁹A nona rorongtagi rau hue a kilomita gaivesi sige lime beno, siu ram lehi Jisas mo dige lo ului wei, mo vanai kakarani lobei na aka, ko ingere ram matagu u liu.

²⁰I Jisas mo veve lawera vena, “Inge ngaha! Nen mese matagu!”

²¹Ram tarani ve rain leie sulolo aka, ko siserigi a aka mo hage varea lo tanogi hi ingere ram vano aie.

²²Maraga robongigi a buri sinobu ram toga lo tavului wei ram leo huri ve a aka gatagale hogosie u toga aiehi. Ingere ram ilo ve i Jisas he vano tea mena nona rorongtagi lo aka hi, nge ingere rau vano gahera denie.

²³A aka lavasigi wagineu ram vanai dena togagi venue Taibirias, ram hage Varea kakarani lo tanogi hi a buri sinobu rau geni na bereti lo tagugi hi a Huqe u vevegareaginie.

²⁴Lo taro hi a buri sinobu ram leo huri ve i Jisas mena nona rorongtagi ingere hatie aiehi, ram kalo lo aka ngerehi ko ram vano sulo togagi venue Kabeniam, ram leoharo Jisas.

²⁵Lo taro hi a sinobu ram haqe Jisas lo tavului wei ingere ram veve lawea vena, “?Huhui, gu vanai hano tagaha?”

²⁶I Jisas mo duvi lawera vena: “A hogo, a hogo, nam veve lawe gimiu vena, igimiu nehe hikesieu tea a vevenagi ve neu ilo vurugegi na gigilegi ingere ngaha, nge hogosie huri neu geni na bereti neu guqe.”

²⁷Igimiu nen mese tabana huri na hinaga hi mo eno he tuei tea mo asi; nge nen tabana huri na hinaga hi mo eno huri na mwasoana radu, i Netui tangaloi vin bete lawe gimiu, huri i Mama, ngehi God, u gigileginie mo haharagi ve nge mo leo mavaginie.”

²⁸Mo rovo, ingere ram huie vena, “?Gamai gain vei lei na hava gineu huri ve gain vei na tabana i God mo tarani?”

²⁹I Jisas mo duvi vena, “Nge ngaha a tabana hi God mo tarani: nen ladohogo lui hine hi nge u horae vanai.”

³⁰Ingere ram huie vena, “?A hava gigilegi hi goin veie siu ve igamai gain lehe ko gain ladohogoginigo? ?Goin vei na hava tabana?

³¹I retamada ta tuei rau geni na mana lolo vanue vurogi, u tatarise mwere na Reve reve Gogona mo veve vena: ‘Ingeie u bete na bereti den eulu lawera ve rain geni.’ ”

³²I Jisas mo veve lawera vena: “A hogo, a hogo, nam veve lawe gimiu vena, hatie ve i Mosis u bete na bereti lawe hatie den eulu; nge i Tamaku vin bete lawe gimiu na bereti hogo den eulu;

³³Huri a bereti hi God mo betea ingeie hi a bereti mo himei den eulu ko mo bete na mwasoana lawe na tangaloi doluegi talo ure.”

³⁴Siu ingere ram huie vena, “Huqe, gon bete na bereti ngaha lawe gamai gesegi.”

³⁵I Jisas mo veve lawera vena, “neu a bereti mwasoana. Ineie hi mo vanai lobeku vin he mwaruruhi te vohogi, ko ihine hi mo ladohogogieu vin he madogu te vohogi.

³⁶Nge nau veve beno lawe gimiu ve igimiu nem lehieu nge ne he ladohogo tea.

³⁷Vataha hine i Tamaku mo bete laweau vin vanai lobeku. Ineu nain he tuli vohogi hine tea mo vanai lobeku,

³⁸huri neu nau himei den eulu, hatie ve nain vei na noku taraniana siboku, nge ve nain vei na taraniana noi hine hi u horau vanai.

³⁹Nge ngaha ingeie hi u horau vanai mo taranieu ve nan veie, ve ineu nain he vagasalagi hine gatagale tea denire hi ingeie u betera laweau, nge ve nain ragasire sulo mwasoana lo rani vagasigi.

⁴⁰Huri nge ngaha i Tamaku mo tarani, ve vataha hine ram lehi i Netui ko ram ladohogoginie rain hakovi na mwasoana radu; ko ineu nain ragasire sulo mwasoana lo rani vagasigi.”

⁴¹Ingere duvi Israel ram tauvuigi ram singo tutubuginie, huri nge mo veve vena, “Ineu a bereti hi u himei den eulu.”

⁴²Ko ram veve vena: “?A tangaloi ngaha ngehi i Jisas i netui Josev. Igamai gau ilo tamana ko i ratahine. ?Nge mo veve siserigi ngaha ve ingeie u himei den eulu wuraha?”

⁴³I Jisas mo duvi lawera vena: “Nen mese ngutungutugi gimiu sibomiu.

⁴⁴A tangaloi gatagale vin he vanai lei tea lobeku tare ve i Mama ngehi u horau vanai vin he reveie tea laweau; nge a tangaloi hi i Mama u reveie laweau. Ineu nain vei vagamwasoie lo Rani vagasigi.

⁴⁵A tangaloi veve rarai rau veve vena, ‘I God vin huhui na tangaloi doluegi.’ Vataha hine mo rongo na leo noi Mama ko mo hikehike denie mo vanai lobeku.

⁴⁶Hate ve ihine tea u lehi i Mama; ingeie hi u vanai den God, ngehi hogosie u lehi i Mama.

⁴⁷“A hogo, a hogo, nam veve lawe gimiu vena, ingeie hi mo ladohogo mo hakovi na mwasoana radu.

⁴⁸!Ineu a bereti mwasoana!

⁴⁹I retamamiu ta tuei rau geni na mana lolo vanue vurogi, ko rau mate.

⁵⁰Nge ngehi a bereti hi mo himei den eulu, ve ihine tea mo ganie vin he mate lai tea.

⁵¹Ineu a bereti maso u himei den eulu. Tare ve ihine tea vin geni na bereti ngaha nge vin mwaso vage tuei. Ko a bereti hi neu nain betea lawea ngehi a vihigoku, nain betea huri ve a tangaloi doluegi talo ure rain mwaso.”

⁵²A leo ngaha mo vaire a duvi Israel ram vuigarogi, ram veve vena, “A tangaloi ngaha vin bete na vihigona huri ve dain genie wuraha?”

⁵³Siu i Jisas mo veve lawera vena: “A hogo, a hogo, nam veve lawe gimiu vena, tare ve igimiu nein he gani na vihigoi Netui tangaloi tea ko nein he inu na daine tea igimiu nein he hakovi na mwasoana tea lolo lolomiu.

⁵⁴Ihine tea mo gani na vihigoku ko mo inu na daiku mo hakovi na mwasoana radu, ko ineu nain ragasie sulo mwasoana lo Rani vagasigi.

⁵⁵Huri a vihigoku a hinaga hogo, ko a daiku a inuinu hogo.

⁵⁶Ihine tea mo gani na vihigoku ko mo inu na daiku mo mwaso lolo loloku ko ineu lolo lolona.

⁵⁷I Mama hi mo mwaso u horau vanai, ko ineu nam mwaso a vevenagi i Mama. Mwerehi vage, ihine tea mo ganieu vin mwaso a vevenagi ineu.

⁵⁸Nge ngaha a bereti hi u himei den eulu; hatie mwere na bereti hi i retamamiu ta tuei rau geni. Ingere rau mate, nge ihine tea mo gani na bereti ngaha vin mwaso vin tuei.”

⁵⁹I Jisas mo huhui mwere ngaha lolo valei soneana a Kabeniam.

⁶⁰A rorongtagi u sao ram rongo na leo hi ko ram veve vena, “A leo huhui ngaha u gona. ?A tangaloi vin lei leie wuraha?”

⁶¹I Jisas u ilo lolo lolora sibona huri ve a nona rorongtagi ram singotutubu huri na leo ngaha; siu nge mo veve lawera vena: “?Wa leo ngaha mo vai taturegi gimiu?

⁶²Wuraha, tare ve igimiu nein lehi i Netui Tangaloi vin hage taligu aiehi u toga tomue aie?

⁶³A Vui mo bete na mwasoana, a vihigogi he bului lai tea. A leo ngerehi neu nau laqagi lawe gimiu ingere na Vui ko ingere na mwasoana.

⁶⁴Nge igimiu lavasigi ne he ladohogo tea.” Huri i Jisas u ilo dena vuigi ve irahine hi rain he ladohogo tea, ko ihine vin rongo na leoi gana.

⁶⁵Ko ingeie mo veve taligu vena, “Giniehi nau veve lawe gimiu ve ihine tea vin he vanai lei tea lobeku tare ve i Mama vin he sireginie tea lawea.”

⁶⁶Giniehi, a nona rorongtagi u sao ram tudori ko ra he vano te meie taligu.

⁶⁷Siu i Jisas mo veve lawera hangavulu domwagi gairue vena, “?Ko igimiu, wa nem tarani ve nen siregieu vage?”

⁶⁸I Saemon Bita mo duvie vena, “?Huqe, igamai ve gain vano lobei hine? Iniko a leoi mwasoana radu ram eno lobemu.

⁶⁹Tau ngaha igamai gam ladohogo ko gam ilo ve iniko gu Gogona gu vanai den God.”

⁷⁰I Jisas mo duvi lawera vena, “?Wa ineu na he leowahe gimiu hangavulu domwagi gairue hi tea? Tau a tangaloi gatagale den gimiu ingere a tamate!”

⁷¹Nge mo laqagi huri Judas, i netui Saemon Iskariot. Huri Judas, ineie gatagale dena rorongtagi hangavulu domwagi gairue, nge vin rongo na leoi gai Jisas.