Read East Ambae JON 7 Bible Online

JON 7 - East Ambae bible

JON 7

¹Lo tagugi ngaha, i Jisas mo dige lategi lolo vanue Kalili; nge he tarani tea ve vin dige lategi lolo vanue Juda, huri ira lawua a duvi Israel aiehi ram tarani ve rain wehe.

²A taro gogona nora duvi Israel a Hinagai Vale Siusiu u kakarani,

³siu i retuei Jisas ram veve lawea vena: “Gon siregi na ute ngaha ko gon vano lolo vanue Judia, siu a nomu rorongtagi rain lehi na tabana ngerehi gom vaire.

⁴Ihine tea he vai vunigi tea na nona tabana, tare ve ne mo tarani ve a tangaloi rain ilo vurugeginie. Tare ve gom vai na gineu ingere ngaha, gon haharaginigo sibomu lawe na ure.”

⁵Huri i retuana vage ra he ladohogo te ginie.

⁶I Jisas mo veve lawera vena: “A noku taro vovohoi he vanai tea mosigei. Vataha tarogi u vovohoi mei gimiu.

⁷A tangaloi talo ure rain he leomasi gimiu lai tea, nge ram leomasieu, huri nam laqagi matamwasaragi hurire ve a nora togaana u esi.

⁸Igimiu nen vano lolo gaganie. Ineu nain he vano tea lolo gaganie ngaha, huri a noku taro he vanai tea mosigei.”

⁹Nge mo veve na gineu ngaha lawera, ko mo toga tau lolo vanue Kalili.

¹⁰Lo tagugi hi i retuana rau vano lolo gaganie, i Jisas vage mo vano; nge he vano tea lo ute lawua, ingeie nge u vano vunigi.

¹¹Ira lawua nora duvi Israel ram leo haroe lo matai hinaga. Ingere ram hui vena, “?Nge logo?”

¹²A buri sinobu ram ngutuginie u liu. Lavasigi ram veve vena, “Ingeie a tangaloi garea.” Ko lavasigi ram veve vena, “Hatie, nge mo vagalengagi na sinobu.”

¹³Nge ihine tea he laqagi tea hurie lo ute lawua, huri ram mataguginire ira lawua nora duvi Israel.

¹⁴Lo livugei taro gogona i Jisas mo hage sulolo Sara Gogona ko mo tauvuigi mo huhui.

¹⁵Ira lawua nora duvi Israel ram awogi, ram veve vena, “A tangaloi ngaha u lei na nona lolorani logo, huri he sikulu tea?”

¹⁶Siu i Jisas mo duvi lawera vena: “A hava gineu hi nam huhui hatie noku, nge mo vanai den God, nge u horau vanai.

¹⁷Ihine tea mo tarani ve vin vei na hava gineu hi God mo tarani vin ilo ve a noku leo huhui mo vanai den God ko he vanai tea denieu siboku.

¹⁸A tangaloi mo laqagi na gineu lo nona huireana sibona, ingeie mo vaileo vena lai na roroa lawea sibona. Nge ihine mo tarani na roroa lawe hine hi u horae ingeie a hogo, ko hatie kalikeli meie.

¹⁹?Wa i Mosis he bete na Leohora tea lawe gimiu? Nge gatagale den gimiu he tabe na Leohora tea. ?Igimiu nem vaileo ve nen wehieu huri hava gineu?”

²⁰A buri sinobu ram duvi vena, “Iniko a vui esi lumu! ?Ihine mo vaileo ve na wehigo?”

²¹I Jisas mo duvi vena: “Ineu nau vei na tabana lawua gatagale ko igimiu doluegi nem awogi hurie.

²²Huri Mosis u veve lawe gimiu ve nein tevegigilegi re netumiu (nge hatie ve i Mosis u teuvuigi na lengagi ngaha nge i retamamiu ta tuei), igimiu nem tevegigilegi na maresu mwera lo rani mangaana.

²³?Tare ve rain tevegigilegi na maresu mwera lo rani mangaana huri ve a Leo hora noi Mosis vin he mautu tea, huri hava gineu gimiu nem merogieu huri nau vei na tangaloi mo mwaso vurugegi lo rani mangaana?

²⁴Nen mese vevegi huri na gineu tavala varea, nge nen vevegi huri na gineu vovohoi.”

²⁵A sinobu lavasigi ta Jerusalem ram veve vena, “?Wa tangaloi ngaha hatie ve ingeie hi ira lawua ram vaileo huri ve ran wehe?

²⁶Nen leo! Ingeie mo laqa lo ute lawua ko ra he veve na gineu tea lawea! Bataha ira lawua rau ilo vurugegi ve ineie i Kraes.

²⁷Lo taro hi i Kraes vin vanai, ihine tea vin he ilo tea ve ingeie mo vanai logo. Nge igide doluegi dau ilo na tangaloi naha ve mo vanai logo.”

²⁸I Jisas mo huhui lolo Sara Gogona, nge mo veve gena dilogi u lawua vena: “Io, neu ilo vurugegieu, ko nem ilo huri ve ineu nau vanai logo. Nge na he vanai tea lo domiku siboku. Hatie! Ihine mo toga u horau vanai, nau vanai logo denie. Igimiu ne he iloe tea,

²⁹nge ineu nau iloe, huri neu nau vanai denie ko ingeie u horau vanai.”

³⁰Giniehi, ingere ram vaileo ve ran wiribibie, nge ihine tea he tau na limana tea lune, huri a nona taro he vanai tea mosigei.

³¹Nge a tangaloi sao dena sinobu hi ram ladohogoginie, ko ram veve vena, “Lo taro hi i Kraes vin vanai, wai nge vin vei na tabana lawua rain liu na tangaloi ngaha u veire ngaha?”

³²Ira Varise rau rongo na buri sinobu ram ngutugi na gineu ingere ngaha hurie, siu ingere ko ira muei rugurugu ram hora na bolisman lavasigi ve ran wiribibi Jisas.

³³I Jisas mo veve vena: “Ineu nain toga mei gimiu a mahogi qilodo vage, mo rovo nain vano lobena hi u horau vanai.

³⁴Igimiu nein hikesieu, nge nein he haqeau tea; ko igimiu nein he vano lai tea lo ute hi neu nain toga aie.”

³⁵Ira lawua nora duvi Israel ram vui veveginire vena: “Nge vin vano logo siu ve igide dain haqea tea? Wai ingeie vin vano vin toga meire duvi Israel ram toga lategi lolo togagi venue nona ta Kris ko vin huhuire ta Kris?

³⁶Nge mo veve vena, ‘Igimiu nein hikesieu, nge nein he haqeau tea, ko igimiu nein he vano lai tea lo ute hi neu nain toga aie.’ Nge mo vevea hi. A iloilogi wuraha?”

³⁷A rani vagasigi talo taro gogona ngehi u lawua liu. Lo rani hi i Jisas mo labe ko mo veve gena dilo lawua vena: “Ihine tea mo madogu na vanai lobeku ko na inu.

³⁸Mwere na Reve reve Gogona mo veve vena, ‘Ihine mo ladohogogieu, a wai halehale rain hale dena lolona, a wai mwaso ngerehi.’ ”

³⁹I Jisas mo veve ngaha huri na Vui a tangaloi rau ladohogoginie rain leie. Lo taro hi God he bete na Vui te mosigei, huri he vai roroagi Jisas te mosigei.

⁴⁰Lavasigi denire sinobu ram rongoe mo veve ngaha ko ram veve vena, “A hogo, ngeie hi a Tangaloi veve rarai hi!”

⁴¹Lavasigi ram veve vena, “Ingeie i Kraes!” Nge lavasigi ram veve vena, “I Kraes vin he vanai tea dena vanue Kalili!

⁴²A Reve reve Gogona mo veve ve i Kraes vi vanai dena duvi Devet, ko vin vora lolo vanue Betlehem, a togagi venue i Devet u toga aie.”

⁴³Siu a sinobu ram toga vilewahe hurie.

⁴⁴A tangaloi lavasigi ram tarani ve ran wiribibie, nge ihine tea he tau na limana tea lune.

⁴⁵Mo rovo, Ira bolisman ram vano taligu lobera muei rugurugu meire Varise, ko ngerehi ram huire vena, “?Huri hava gineu ne he laie tea vanai?”

⁴⁶Ira bolisman hi ram duvi vena, “Ihine tea he laqa tea mwereie!”

⁴⁷Ira Varise hi ram huire vena, “?Wa nge u vagalengagi gimiu vage?

⁴⁸!Nen leo! Hatie gatagale denire lawua sige denire Varise u ladohogo ginie.

⁴⁹Nge a sinobu ngaha he ilo na Leo hora noi Mosis tea, siu a lologagasi noi God mo toga lure!”

⁵⁰I Nikodimas nge gatagale denire; nge u vano ve vin lehi Jisas tomue. Nge mo veve lawera vena,

⁵¹“A noda Leo hora mo veve ve dain he vevegi na tangaloi tea tomue siu da bei rongoe ko dam haqe vurugegi na hava gineu hi nge u veie.”

⁵²Ingere ram duvi goroe vena, “?Wa iniko vage dena vanue Kalili? Gon valu na Reve reve Gogona ko goin leo ve a tangaloi ligoligogi vin he vanai tea dena vanue Kalili.”