Read East Ambae JON 8 Bible Online

JON 8 - East Ambae bible

JON 8

¹Mo rovo, ingere doluegi ram mule sulo valera, nge i Jisas mo hage lo Vusi Oliv.

²Maraga robongigi, lolo robongi siaga, nge mo vano taligu sulo Sara Gogona. A sinobu doluegi ram vanai lobena, ko nge mo toga hivo ko mo tauvuigi mo huhuire.

³Ira huhui talo Leo hora noi Mosis meire Varise ram lai na vavine vanai rau haqea u vagasile mena mwera, ko ram vaie mo labe lo livugara doluegi.

⁴Ingere ram veve lawea vena, “Huhui, rau haqe na vavine ngaha u vagasile mena mwera.

⁵Lolo noda Leo hora i Mosis u hora huri ve a vavine mwere ngaha dain buguri vagamatea. ?Iniko goin veve na hava gineu hurie?”

⁶Ingere ram veve na leo ngaha ve ran vai lehe, siu ve rai veve vovohie lai. Nge i Jisas mo hudu hivo vuine ko mo uliuli lo tano gena bisune.

⁷Mwere ingere ram garogi ram hui na nora huihui, siu i Jisas mo lalangau mo veve lawera vena, “Ihine den gimiu he vai na galegaleasi tea na tuli na vatu tomue sulune.”

⁸Mo rovo, nge mo hudu hivo taligu ko mo uliuli lo tano.

⁹Ingere rau rono na leo ngaha, ram vano gagatagalegi denie, ingere sesea tomue. I Jisas mo toga gahea, mena vavine hi mo labe mosigei.

¹⁰I Jisas mo lalangau mo veve lawea vena, “?Vavine, ingere logo? ?Wa tangaloi gatagale he tino tea ve na veveginigo?”

¹¹Ingeie mo duvi vena, “Huqe, hatie, hatie tangaloi.” Mo rovo, i Jisas mo veve lawea vena, “Garea, ineu nain he veveginigo tea vage. Gon vano, nge goin mese galegaleasi taligu.”

¹²Mo rovo, i Jisas mo veve lawera taligu vena: “Ineu a leleo talo ure. Ihine tea mo hurieu vin hakovi na leleoi mwasoana ko vin he dige tea lo dodogi.”

¹³Siu ira Varise ram veve lawea vena, “Gom laqagi matamwasaragi hurigo sibomu ngaha; a leomu hatie hogo.”

¹⁴I Jisas mo duvi lawera vena, “Hatie. Tare ve ineu nain laqagi matamwasaragi hurieu siboku, nge a leoku a hogo, huri ineu nau ilo ve nau vanai logo ko nain vano logo. Igimiu ne he ilo tea ve ineu nam vanai logo sige nain vano logo.

¹⁵Igimiu nem vevegi huri na domi tangaloi; ineu na he vevegi ihine tea.

¹⁶Nge tare ve nam vevegi, a noku vevegi a hogo, huri ineu hate gaheau; nge i Mama u horau vanai ingeie meieu.

¹⁷U reve lolo nomiu Leo hora ve a tangaloi gairue roin laqagi matamwasaragi na gineu hala gatagale, nora leo a hogo.

¹⁸Ineu nam laqagi matamwasaragi hurieu siboku, ko i Tamaku u horau vanai vage mo laqagi matamwasaragi hurieu.”

¹⁹Ingere ram huie vena, “I Tamamu nge logo?” I Jisas mo duvi vena, “Igimiu ne he iloau tea ko i Tamaku vage. Tare ve neu iloau neu ilo Tamaku vage.”

²⁰I Jisas mo veve na gineu ngere ngaha tavohe hi mo huhui lolo Sara Gogona, lo ute a tanoi tuli homu aie. Ko ihine he wiribibie tea, huri a nona taro he vanai tea mosigei.

²¹I Jisas mo veve lawera taligu vena, “Ineu nain vano vohogi; ko igimiu nein leoharoau, nge nein mate lolo nomiu galegaleasi. Igimiu nein he vano lai tea lo ute hi neu nain vano aie.”

²²Siu ira lawua nora duvi Israel ram veve vena, “Nge mo veve vena, ‘Igimiu nein he vano lai tea lo ute hi neu nain vano aie.’ ?Wa nge vin wehe sibona?”

²³I Jisas mo duvi vena: “Igimiu nem vanai lovavagi, nge ineu nam vanai den eulu. Igimiu nem vanai dena ure ngaha, nge ineu na he vanai tea dena ure ngaha.

²⁴A vevenagi hi neu nam veve lawe gimiu vena nein mate lolo nomiu galegaleasi. Huri igimiu nein mate lolo nomiu galegaleasi tare ve nein he ladohogo tea ve ‘Ineu nam toga.’ ”

²⁵Siu ingere ram huie vena, “?Iniko ihine?” I Jisas mo duvi vena: “Ineu a gineu hi nam veve lawe gimiu dena vuigi.

²⁶A gineu sao neu nain veve huri gimiu ko nain vevegi gimiu huri na gineu sao. Ingeie u horau vanai, nge a hogo, ko nam veve lawe na tangaloi talo ure a hava gineu hi neu nau rongo denie.”

²⁷Ingere ra he ilo tea ve ne mo laqa lawera huri i Mama.

²⁸Siu i Jisas mo veve lawera vena: “Tavohe igimiu nein tabe hagagi Netui tangaloi siu nein ilo ve ‘Ineu nam toga’; ko nein ilo ve ineu na he vai na hava gineu tea lo domiku siboku, nge nam veve na gineu hogosie hi i Mama u huhuieu ginie.

²⁹Ko ingeie u horau vanai mo toga meieu; nge he siregieu tea ve nan toga gaheau, huri ineu nam vai na hava gineu ngerehi gesegi nge mo leo mana ginire.”

³⁰A tangaloi sao ram rongo Jisas mo veve na gineu ingere ngaha ram ladohogoginie.

³¹Siu i Jisas mo veve lawera nora duvi Israel ram ladohogoginie vena, “Tare ve igimiu nem tabe na noku leo igimiu a noku rorongtagi hogo;

³²ko igimiu nein ilo na hogo, ko a hogo vin vei gimiu nein meriqe.”

³³Ingere ram duvi vena, “Igamai ira duvi Ebraham, ko igamai hatie tangaloi taban a vurogi lawe ihine tea wagineu meriqe. ?Siu huri hava gineu gom veve vena, ‘Igamai gain meriqe?’ ”

³⁴I Jisas mo duvi lawera vena: “A hogo, a hogo, nam veve lawe gimiu vena, vataha tangaloi mo galegaleasi ingeie a tangaloi tabana vurogi lawe na galegaleasi.

³⁵A tangaloi tabana vurogi he toga tea vena siaga nge a natugi vin toga vagi tuei ingeie hatie talolo vale gesegi; nge i netui nge mo toga gesegi lolo vale.

³⁶Siu tare ve i Netui mo vai gimiu nem mariqe nein meriqe hogo.

³⁷Ineu nau ilo ve igimiu a duvi Ebraham. Tau igimiu nem vaileo huri ve nen wehieu, huri a noku leo huhui he toga tea lumiu.

³⁸Ineu nam laqagi huri na hava gineu hi i Tamaku u haharaginie laweau, nge igimiu nem vai na hava gineu hi i tamamiu u haharaginie lawe gimiu.”

³⁹Ingere ram duvi lawea vena, “I tamamai Ebraham.” I Jisas mo duvi vena, “Tare ve igimiu ira netui Ebraham hogo, gimiu nein vei na tabana ngerehi i Ebraham u veire.

⁴⁰Ineu nau veve na hogo lawe gimiu ve ineu nau rongoe den God. Nge igimiu nem vaileo ve nein wehieu. I Ebraham he vai na gineu tea mwere naha vohogi!

⁴¹Igimiu nem vai na tabana hi i tamamiu mo vaie.” Ingere ram duvi vena, “Igamai hatie natui turegi. Igamai i Tamamai gatagale, ngehi i God.”

⁴²I Jisas mo veve lawera vena: “Tare ve i God i Tamamiu hogo, nase vai gimiu nein tabeau; huri neu nau vanai den God ko nam toga tangaha. Ineu na he vanai tea lo domiku siboku, nge ingeie u horau vanai.

⁴³?Huri hava gineu gimiu ne he ilo vurugegi na gineu tea hi nam veve? A vevenagi ne he masinge tea ve nein rorongtagi lei na noku leo,

⁴⁴Igimiu ire netui tamamiu, i Vui esi, ko nem tarani ve nen huri na taraniana noi tamamiu. Ingeie i gineu ueue tangaloi dena vuigi. Ingeie he bulu tea lo hogo tea vohogi, a vevenagi a hogo hatie lolo lolona. Lo taro hi ineie mo veve na kalikeli ingeie mo vai na gineu mo huri na dorine, huri ingeie i gineu kalikeli ko i tamai kalikeli doluegi.

⁴⁵Nge ineu nam veve na hogo, ko a vevenagi hi gimiu ne he ladohogo te gieu.

⁴⁶?Ihine tea den gimiu vin tisu lue ve ineu a noku galegaleasi lure? ?Tare ve ineu nam veve na hogo, huri hava gineu gimiu ne he ladohogo te gieu?

⁴⁷Ingeie hi mo vanai den God mo rorongtagi na leoi God. Nge igimiu ne he vanai tea den God, ko a vevenagi ngaha igimiu ne he rorongtaginie tea.”

⁴⁸Ira lawua nora duvi Israel ram duvi lawea vena: “?Wa igimai gahe veve hogo tea ve iniko ta Samaria ko a vui esi lumu?”

⁴⁹I Jisas mo duvi vena, “A vui esi hatie luku, nge ineu nam ladomavagi i Tamaku ko igimiu ne he ladomavagieu tea.

⁵⁰Ineu na he hikesi na tanoi ladomava tea laweau siboku. Nge ihine tea Gatagale mo hikesi na tanoi ladomava hi ko mo leo wahe ve vin voragi noku. I gineu gatagale mo toga mo hikesie ko mo veveginie.

⁵¹A hogo, a hogo, nam veve lawe gimiu vena, ihine mo tabe na noku leo vin he mate tea vin tuei.”

⁵²Ira lawua nora duvi Israel ram veve lawea vena: “Siserigi ngaha gamai gau ilo ve a vui esi lumu! I Ebraham u mate, ko ira tangaloi ligoligogi rau mate, ko iniko gom veve vena, ‘Ihine mo tabe na noku leo vin he mate tea vin tuei.’

⁵³I tamamai Ebraham u mate. ?Wa iniko go he veve tea huri ve iniko gu lawua den tamamai i Ebraham nge u mate? Ko ira tangaloi ligoligogi rau mate vage. ?Gom lado ve iniko hine?”

⁵⁴I Jisas mo duvi vena: “Tare ve ineu nain vei roroagieu siboku, a roroku vin vurogi. Ingeie hi mo vai roroagieu ngehi Tamaku ingeie hi gimiu nem veve huri ve a nomiu God.

⁵⁵Igimiu nge he iloe tea, ko ineu nau iloe. Tare ve nam veve ve na he iloe tea, ineu a tangaloi kalikeli mwere igimiu. Nge ineu nau iloe, ko nam tabe na leona.

⁵⁶I tamamiu Ebraham u rong garea huri u lehi na taroi noku vanaiana; ingeie u lehe ko u hevuhevu huri.”

⁵⁷Siu ira lawua nora duvi Israel ram veve lawea vena, “Iniko a higaomu he ngavulu gailime tea. ?Wa iniko gu lehi Ebraham?”

⁵⁸I Jisas mo duvi vena, “A hogo, a hogo, nam veve lawe gimiu vena, tomue den Ebraham u vora, ‘Ineu nam toga.’ ”

⁵⁹Giniehi, ingere ram vile na vatu ve rain bugurie, nge i Jisas mo hili sibona ko mo mwalue dena Sara Gogona.