Read East Ambae JON 9 Bible Online

JON 9 - East Ambae bible

JON 9

¹Lune i Jisas mo dige mo vano mo lehi na tangaloi gatagale u vora matadodo.

²A nona rorongtagi ram huie vena: “?Huhui, a galegaleasi noi hine ngaha u veie mo vora matadodo? ?A nona galegaleasi sibona sige noi tamana tona retahine?”

³I Jisas mo duvi vena: “Hate nona galegaleasi sibona sige noi tamana tona retahine ve u veie siu matana rom dodo ginie. Nge a matana ru dodo siu huri ve a tangaloi rain lehi na managi noi God vin tabana lune.

⁴Huri mo rani mosigei, igide da vai na tabanagi noi a hine hi u horau nge lune a bongi mo vanai a tangaloi vin he tabana lai tea.

⁵Lune tarogi ngaha ineu nam toga lolo ure, ineu a leleo talo ure.”

⁶Lo tagugi Jisas u veve na leo ngaha, mo lodo sulo tano ko mo vai na tano mo bibilu gina lodona; siu mo sasavi na Matai tangaloi hi ginie,

⁷ko mo veve lawea vena, “Gon vano gon solo na nagomu lolo Walui Wei Saeloam.” (A leo ngaha a iloilogi ve “Hora.”) Siu a tangaloi hi mo vano, mo solo na nagona, ko mo vanai taligu mo leo lai.

⁸Siu irehuana, ko a sinobu hi gitomuegi navunevu, ira tangaloi talo vanuana mena sinobu hi rau lehe u nevunevu homu, ram huie vena, “?Wa tangaloi ngaha hate ngehi u toga mo navunevu homu tomue?”

⁹A tangaloi lavasigi ram veve vena, “Ingeie hi,” nge ingere lavasigi ram veve vena, “Hate ingeie, nge dam lehe ve u mwereie.” Siu a tangaloi hi mo veve sibona vena, “Ineu ngaha.”

¹⁰Ingere ram huie vena, “?Siu, a matamu ru leleo mwerehilogo?”

¹¹Ingeie mo duvi vena, “A tangaloi gatagale a henana Jisas u vei na tano mo bibilu ko mo sasavi na mataku ginie, ko mo veve laweau vena, ‘Gon vano lo wai hi Saeloam, gon solo na nagomiu’ Siu ineu nam vano, siserigi nam solo na nagoku nam leo lai taligu.”

¹²Ingere ram huie vena, “?Ingeie logo?” A tangaloi hi mo duvi vena, “Ineu nau haroe.”

¹³Siu, ram lai na tangaloi hi a matana ru dodo tomue vano lawera Varise.

¹⁴A rani hi Jisas u vei na tano mo bibilu lolona ko mo vagaleleogi na matai tangaloi hi lo Rani Mangaana.

¹⁵Mo rovo, ingere Varise ram hui na tangaloi hi taligu mwerehilogo hi a matana ru leleo. Ingeie mo veve lawera vena, “Ingeie u sasavi na mataku gina tano bibilu, nau solo na nagoku, ko siserigi ngaha nam leo lai.”

¹⁶Ingere Varise lavasigi ram veve vena, “A tangaloi ngehi u vei na gineu ngaha ingeie hate tangaloi noi God huri ingeie he ladomava tea gina na Rani Mangaana.” Nge ingere lavasigi ram veve vena, “Ve mwere ingeie a tangaloi galegaleasi, vin he vai lei na vaigivui tea mwere ngaha.” Ko a gineu ngaha u veire ram vilewahe.

¹⁷Siu ira Varise ram hui na tangaloi hi taligu vena, “?Iniko gom veve ve ingeie u vei na matamu rom leleo, garea, gom veve mwerehilogo hurie?” Ingeie mo duvi vena, “Ingeie a tangaloi ligoligogi.”

¹⁸Nge ira lawua nora duvi Israel rahe ladohogo tea ve ingeie a matana u dodo tomue ko siserigi ngaha mo leo lai, mo dadari lune ram ware tamana tona retahine vanai,

¹⁹ko ram huire vena: “?Wa i netumiru naha? ?Wa nerom veve huri ve u vora matadodo? ?Garea, mwerehilogo huri ingeie mo leo lai siserigi ngaha?”

²⁰I tamana tona retahine rom duvi vena: “Igamaru gorom ilo huri ve i netumeru ko gorom ilo huri ve u vora matadodo.

²¹Nge gamaru goro he ilo tea mwerehilogo hi huri siserigi naha mo leo lai, ko igamaru goro he ilo tea ve ihine ngehi u vei na matana rom leleo. Nen huie; ingeie u sesea beno. Ingeie vin duvi hurie sibona!”

²²I tamana tona retahine ru veve mwere ngaha huri rom mataguginire tangaloi lalawua nora duvi Israel; huri ira lawua nora duvi Israel rau ladobubugi beno huri tare ve ihine tea vin veve huri ve i Jisas ingeie i Kraes rain teue suvarea dena valei soneana.

²³A vevenagi ngaha i tamana tona retahine ru veve vena, “Ineie u sesea beno; nen huie!”

²⁴Siu ram ware na tangaloi hi vagatuegi u vora matadodo ko ram veve lawea vena, “Iniko gon waratau lo nagoi God ve a havagineu goin veve a hogo! Igamai gam ve a tangaloi ngaha hi u vagamwasoigo, ingeie ilo huri a tangaloi galegaleasi.”

²⁵Nge mo duvi vena, “Ineu na he ilo tea tare ve ingeie a tangaloi galegaleasi sige hatie. A gineu gatagale hogosie hi nau iloe: ngehi a mataku u dodo, nge siserigi naha neu nam leolai.”

²⁶Ingere ram huie vena, “?Nge u vei na hava gineu lawego? ?Ingeie u vei na matamu rom leleo mwerehilogo?”

²⁷Ingeie mo duvi vena, “Ineu nau veve beno lawe gimiu, nge ne he rorongtagi tea. ?Nem tarani ve nen rongo taligu huri hava gineu? ?Bataha gimiu vage nem tarani ve nen voragi na nona rorongtagi?”

²⁸?Ram veve asiesiginie ko ram veve vena: “Iniko a nona rorongtagi; nge igamai a rorongtagi noi Mosis.

²⁹Gamai gau ilo huri ve God u laqa mei Mosis; nge a tangaloi ngaha, igamai gahe ilo tea ve mo vanai logo?”

³⁰A tangaloi hi mo duvi vena: “A hava domiana mwere ngaha! Igimiu nehe ilo tea ve ingeie mo vanai logo, nge ingeie u vei na mataku rom leleo!

³¹Igide dam ilo huri ve God he rorongtaginire tangaloi galegaleasi tea; nge mo rorongtaginire sinobu ngerehi ram ladomavaginie ko ram vai na hava gineu hi ingeie me taranire.

³²Lo tauvuigi ure mo dadari bagataha da he rongo te tau ve ihine tea u vei na matai tangaloi u vora matadodo ve na leleo;

³³tare ve a tangaloi ngaha he vanai tea den God, ingeie vin he vai lei na gineu tea.”

³⁴Ingere ram duvi lawea vena, “?Iniko gu vora ko gu sesea lolo galegaleasi mo dadari bagataha, ko gom vai leo huri ve gon huhui gamai?” Siu ingere ram tuli vohoginie dena valei soneana.

³⁵I Jisas mo rongo huri ve ingere rau tuli vohoginie dena valei soneana, mo haqe na tangaloi hi ko mo huire vena, “?Wa iniko gom ladohogo lui Netui Tangaloi?”

³⁶A tangaloi hi mo duvi vena, “Huqe, gon veve laweau ve ingeie ihine, siu neu nain ladohogoginie!”

³⁷I Jisas mo duvi lawea vena, “Iniko gu lehe beno, ko ingeie hi mo laqa meigo siserigi ngaha.”

³⁸A tangaloi hi mo veve lawea vena, “Huqe, ineu nam ladohogo,” siu mo sisiqeu goro Jisas.

³⁹I Jisas mo veve vena, “Ineu nau himei sulo ure ngaha ve nain vevegi, huri ve a matadodo rain leo lai, ko ingere hi ram leo rain voragi matadodo.”

⁴⁰1 Ingere Varise lavasigi ram toga aiehi meie, ram rongoe mo veve mwere ngaha ram huie vena, “?Wa iniko gom veve huri ve a matamai rau dodo vage?”

⁴¹I Jisas mo duvi vena, “Tare ve matamiu rau dodo, a tangaloi vin he vevegi lei gimiu tea ve gimiu ira galegaleasi; nge gimiu nem veve tamwere, huri ve nem leo lai, ngehi ligoligo huri ve a bugui galegaleasi mo eno lumiu.