Read East Ambae LALAKOGI 1 Bible Online

LALAKOGI 1 - East Ambae bible

LALAKOGI 1

¹Tueku Tiovilas. Lo noku muei buk nau reve huri na gineu doluegi i Jisas u huhui ko u veire, u tevuigi lo mahogi hi i Jisas u tevuigi na nona tabanagi,

²mo dadari mo mule hage eulu. Tomue siu i God mobei leie hage taligu eulu u bete na leo huhui gina managi noi Vui Gogona lawe na tangaloi u leo wahera gi nona gai hora.

³Bongi ngavulu gaivesi lo tagugi nona mateana nge u serelue sibona vaga sao, mo mata-mwasaraginie hogo huri ve u mwaso taligu, ingere rau lehe, ko ingeie u laqagi lawera huri ve i God vin ratahigi gorora.

⁴Lune ingere ram vomai tabulutegi lobena, ingeie mo bete na Leo hora lawera vena. “Nei mese mwalue den Jerusalem, nei toga rarai na hogogi i Tamaku u warataugi huri ve vin betea lawe gimiu, ngehi nau laqagi lawe gimiu hurie.

⁵I Jon u garuhigogonagi gimiu gina wai, nge lo tagui bongi te gaivihe i God vin garuhigogonagi gimiu gina Vui Gogona.”

⁶Lune ira gaihora ram vonai lobei Jisas ram huie vena. “?Huqe, wa goin bete na tanoi ratahigi noi God taligu lawera duvi Israel siseri naha?”

⁷I Jisas mo veve lawera vena. “A tarogi ko a mahogi u vagatai beno gina managi noi Tamaku ko he eno tea lawe gimiu ve nei ilo ve rai veie tagaha.

⁸Nge igimiu nei horo gina managi lune a Vui Gogona vin himei lumiu, ko igimiu nei ngasagi na Roro Garea hurieu a Jerusalem, vin deli na vanue Judia ko Samaria ko vin deli na ure.”

⁹Lo tagugi hi u laqa u rovo, ingeie mo hage taligu eulu, lune ingere ram lehe a dodo mo vuniginie dena matara.

¹⁰Lune ingeie u sala dena matara beno, ko ingere ram leo garagara suhage lo dodo, a tangaloi gairue ru luqegi na gavu u mevute rom labe kakarani lobera.

¹¹Rom veve vena, “Igimiu tangaloi ta Kalili. ?Huri havagineu gimiu nem labe nem dada hage sulo dodo? I Jisas ngehi i God mo laie hage taligu eulu, vin himei taligu lo matahala gatagale mwerehi neu lehe mo hage taligu lo eulu.”

¹²Siu ira gai hora ram mule taligu a Jerusalem den vusi Oliv, a mahogi hi u kakarani a Jerusalem, lategi nava vudolue vagavesi.

¹³Ingere ram dadari Jerusalem ram hage lolo qetu utui vale namawe ngehi ram toga aie gesegi, i Bita, i Jon, i Jemis, koi i Andru, i Vilib koi i Tomas, i Batolomiu koi i Matiu, i Jemis natui Alvius, i Saemon, a tangaloi hi talo burigi hi ram tarani ve ran tuli vohogi na tangaloi ta Rom, koi i Judas netui Jemis.

¹⁴Ram sone vatusao ram tataro bubugi meire vavine koi Meri retahi Jisas koi retuei Jisas vage ram bubugi meire.

¹⁵A bongi u sao goro beno, a tangaloi rau lado hogo gi Jisas, ram sonebubugi rau sao lategi vudolue vagatagale avigi ngavulu gairue doluegi, siu i Bita mo labe mo laqa lawera.

¹⁶Ingeie mo veve lawera vena. “Retueku, u tuei beno, a Vui Gogona u laqagi lo singoi Devet, u veve sere huri na lalakogi noi Judas, a tangaloi hi u tomuegi na sinobu a duvi Israel ram wiribibi Jisas. A leo hi u eno lune beno, huri a leo ingere hi lolo Baebol rai teu mwasigi.

¹⁷I Judas nge lo burigi gatagale mei gamai, i Jisas u leo wahea ve vin tabana bubugi mei gamai.”

¹⁸A tangaloi hi i Judas, u voli na mavusui tano gina homu u leie lo turegi he vovohoi tea hi u veie, ingeie u mate, a taqangine u tawaga a tinaena ram rurungudu.

¹⁹A sinobu doluegi hi ram toga Jerusalem ram rongo na rorogi, ko ram ware na tanogi hi lo nora leo sibora ve Akeldama, iloilogi huri ve a, “Tanoi Dei.”

²⁰I Bita mo veve vena, “Huri u reve lo buk Sam ve, A valena na buebueli a tangaloi na mese toga lolona.” U reve vage vena, Ihine tea na lai na tanona huri na tabanagi.

²¹“Siu ihine tea vin bulu mei gamai huri vin ngasagi na maraga taligu noi Jisas a Huqe. Ingeie gatagale denire hi rau bubugi mei gamai lo tarogi i Jisas a Huqe u dige lategi mei gamai. Lo halagi tuegi vage a domianai leo hi u mwere ngaha vena. Ingeie gatagale denire hi rau huri gamai lo taro hi i Jon u garuhigogonagi Jisas, mo dadari lo rani hi i God mo lai vohoginie dei gide mo hage taligu eulu.”

²³Siu ram leo wahe na tangaloi gairue, i Josev a henana tuegi Basabas, a henana vage i Jastas, ko a tangaloi tuegi vage a henana i Mateas.

²⁴Siu ram tataro vena, “Huqe, iniko gu ilo na taqangi tangaloi. Huqe gon tisu wahe lawe gamai ve gatagale denire gairue ngaha gu leo wahera

²⁵vena lai na tanoi tabanagi ngaha nora gai hora, ngehi Judas u sireginie tau mo huri na mawirigi mo sala radu.”

²⁶Siu ingere ram vai na matarongo mo huqe lui Mateas. Siu ram tau Mateas, ram valu bubugi na henana meire gaihora hangavulu domwagi gatagale.