Read East Ambae LALAKOGI 12 Bible Online

LALAKOGI 12 - East Ambae bible

LALAKOGI 12

¹Lo taro hi a ratahigi lawua i Herod mo tauvuigi mo vaivei na tangaloi noi Jisas lavasigi.

²Mo lai Jemis tuei Jon, ram tai vagamatea gena buei vuro.

³Lune mo leo ve a sinobu a duvi Israel ram havuhevu lune nge mo hora ve rain wiribibi Bita lo taroi gaganie lawua ngehi ram gani na bereti ngehi hatie isi lolona.

⁴Lune ram wiribibi Bita siu ram taue lolo valei veuveu. Ingeie Herod mo tau na burigi gaivesi ve rain leo goroe, a tangaloi vuro gaivesi lo burigi gatagale. I Herod mo domigi ve a taroi Hinagai Halegagaliu ngaha vin rovo nge vin lei Bita vin veilehe lo nagora tangaloi.

⁵Lune i Bita mo toga lolo valei veuveu, nge a sinobu talolo warelue ram tataro siaga gesegi hurie.

⁶Lolo bongi i Herod mo domigi ve vin lei Bita tavarea lo nagora tangaloi, i Bita mo maturu lo livugara leogoro gairue. Rau veu bibie gina garo vatu gairue, a gai leogorogi tuegi vage mo leogoro na matai valei veuveu.

⁷Siserigi a engsel nona Huqe lo eulu mo labe tahi mo varavara lolo valei veuveu hi. A engsel hi mo gilugi Bita lo siqana mo ragasie mo veve vena, “Gon maraga! Siseri!” Ko a seni hi ram soi vohogi dena limana vagatagale.

⁸Siu a engsel hi mo veve vena, “Gon wasigi na wasimu, ko gon saru na nomu butu.” I Bita mo vai mwerehi. Siu a engsel hi mo veve lawea vena, “Gon luqeluqe vunu gon hurieu.”

⁹I Bita mo hurie mo mwalue dena valei veuveu. Ingeie he ilo tea ve a engsel mo vaie hi a hogo, ingeie mo lado ve a hueri.

¹⁰Rom liu na leogoroi matai ara muegi, ko a leogoroi matai ara tuegi, ko rom dadari vagasigi lo matai ara vatu ngehi mo waga sulolo togagi venue lawua. A matai ara u tavalanga lawera sibona ko ingere rom mwalue. Rom dige mo hivo lo turegi lawua, ko siserigi a engsel mo siregi Bita.

¹¹Siu i Bita mobei leo hogosi na gineu hi u vei lawea, ko mo veve vena, “Siseri ngaha nam ilo vurugegi ve a hogo. A Huqe u hora na nona engsel mo lai luau dena limei Herod, ko dena gineu sao ngerehi a sinobu a duvi Israel rau lado rarai ve rain veire.”

¹²Ko i Bita mo leo vurugegi na gineu hi, siu ingeie mo vano lo tanoi Meri, i ratahi Jon Mak. A sinobu u sao rau sone bubugi ram tataro aiehi.

¹³Ko i Bita mo dingdingi lo matai vale varea, a taqalugu a henana i Roda mo vomai vena roa na matai vale.

¹⁴Ingeie mo rong hogosi na diloi Bita ko mo havuhevu mo toa mo vano taligu, he roa na matai vale tea, ingeie mo veve sere huri ve i Bita mo labe varea.

¹⁵Ko ingere ram veve lawea vena, “Iniko gom lenga!” Ko ingeie mo garogi huri ve a hogo.” Siu ingere ram duvi vena, “ngehi a tamatena.”

¹⁶He ribi tea i Bita mo dingdingi taligu. Ingere ram roa na matai vale ko lune ingere ram lehe ram garigi garagara.

¹⁷Siu ingeie mo toqetoqe bibire gina limana huri ve ran toga rorongo, ko mo mata-mwasaraginie lawera ve a Huqe u veie mo mwalue dena valei veuveu mwere hilogo. Siu mo veve lawera vena, “Nein veve sere lawe Jemis ko i retueku doluegi huri na roro ngaha.” Ingeie mo veve mwere ngaha, siu mo siregi mo vano lo vanue dolue.

¹⁸Lolo robongi siaga a tangaloi vuro ram rong lelengaginie, huri ve a havagineu u vei Bita.

¹⁹Siu i Herod mo hora na leo ve ran hikesie, nge ingere rahe haqea tea. Ingeie mo lai na tangaloi vuro lo kot ko ingeie mo ue vagamatera. Lo tagugi hi i Herod mo hivo den Judia ko mo toga huri mahoi bongi lo vanue Sisaria.

²⁰I Herod u mero garagara gina sinobu ta Taea ko Saedon, siu ingere ram vano tabulutegi ve ran lehe. Gitomuegi ingere rau lei Blastas mo bulu meire, ingeie hi u leogoro na valei Herod. Siu ingere ram vano lobena ram navu na tauleo denie, a vevenagi a sinobu lolo vanue hi ram lai na gara hinaga dena vanuei ratahigi hi.

²¹Siu i Herod mo leo wahe na rani gatagale mo lai na luqei ratahigi mo luqeginie, siu mo toga lo tanoi togatoga ratahigi ko mo laqa lawe na sinobu.

²²A sinobu ram ulo vena, “A tangaloi he laqa tea, nge a god.”

²³Ko siserigi a engsel noi God mo wehi Herod mo soi, a vevenagi he ladomava tea gi God. Siu a siloti ram ganie mo mate.

²⁴Siu a leo noi God mo mwaso ko mo gao lategi.

²⁵Siu i Banabas tona Sol a taroi nora sirosiro u rovo rom vano taligu den Jerusalem, rom lai Jon Mak mo hurire.