Read East Ambae LALAKOGI 13 Bible Online

LALAKOGI 13 - East Ambae bible

LALAKOGI 13

¹Lo warelue a Antiok, a tangaloi veve rarai meire huhui aiehi ko i Banabas tona Simion ngehi ram warea ve i Maeto, ko i Lusias nge ta Saerini, ko i Manaen ngehi rau haweginie mei Herod a ratahigi, ko i Sol.

²Lo taro gatagale ingere ram gologolo ko ram tabana lawe na Huqe, a Vui Gogona mo veve lawea vena, “Neu nam tarani ve igimiu nen tau Banabas ko i Sol, ve ron vai na tabana hi nau warera hurie.”

³Siu ingere ram gologolo ko ram tataro, ram tangovire gina limara ram horara rom vano.

⁴Ko a Vui Gogona mo hora Banabas ko i Sol ram hivo lo vanue Selusia, rom kalo lo aka ram vano lo vanue Saebras.

⁵Lune ingere rom dadari, rom hage varea a Salamis, rom veve sere na leo noi God, lolo valei tataro nora duvi Israel. Ko i Jon Mak mo bulu mweire ko mo buluire lo nora tabana.

⁶Ko ingere ram vano utu lo tavulugi a Bavos. Aiehi, ingere ram haqe na tangaloi uviuvi managi gatagale. Ingeie hi a duvi Israel mo veve ve, ingeie a tangaloi veverarai, a henana i Bajisas.

⁷Ingeie a buluana noi Sejas Bolas a kavman lawua talo vanue hi Saebras. A kavman lawua hi ingeie a tangaloi mataisao garagara. Mo ware Banabas tona Sol vomai lobena huri mo tarani ve na rongo na leoi God.

⁸Siu a tangaloi uviuvi managi hi, ingeie hi a henana vage lo leo ta Kris vei Elimas, u tugoro garue hi mo vaie huri ve a kavman lawua hi ve na mese ladohogo.

⁹Siu i Sol hi a henana tuegi i Bol, mo wuwanga gina Vui Gogona, mo leo vovohoi na tangaloi uviuvi managi hi,

¹⁰mo veve vena, “Iniko a nati Tamate. Iniko gom vai goro na gineu doluegi hi rau garea, ko gu horo gina kalikeli siu gesegi gum vai leo ve gon dori na leo garea nona Huqe talo kalikeli.”

¹¹Nge siserigi hi a limei God vin tango lumu, a matamu vin dodo, goin he lehi na leleoi reni tea vin mala ribi. “Siserigi i Elimas a matana mo vivivivi ko mo dodo maeto mo tatu lategi mo hikesi na tangaloi ve ran dule lo limana ran tomueginie.

¹²Ko lune a kavman lawua mo lehi na gineu mo vai mwerehi, mo ladohogo. Ingeie mo awogi garagara huri na leo huhui nona Huqe.

¹³I Bol mena nona buluana ram lai na aka lo vanue Bavos ram vano Beka a qatui venue lawua a Bamvilia. I Jon Mak mo sireginire aiehi, mo vano taligu a Jerusalem.

¹⁴I Bol tona Banabas rom siregi na vanue Beka, rom dadari a Antiok lo vanue Bisidia, ko lo Rani Mangaana rom vano lolo valei soneana nora duvi Israel rom toga aiehi.

¹⁵A tangaloi gatagale mo valu na Leo hora noi Mosis, ko a revereve nora tangaloi veve rarai mo rovo, siu a tangaloi lalawua talolo valei soneana ram hora na leo lawe Bol tona Banabas vena, “Retuemai, tare a nomiru leo tea, gam tarani ve nero laqagi nero vagamwamwavigi na sinobu tea gina leo garea.”

¹⁶I Bol mo labe hage mo horagi na limana mo surire ve ran toga rorongo, siu ingeie mo veve vena, “Igimiu a sinobu a duvi Israel, ko igimiu hi nem hudu goro na nomai God a duvi Israel, igimiu doluegi nen rorongtagieu.”

¹⁷A nomai God hi, u leowahe re tubumai, mo vaire ram saosao lo tarogi rau togagi halavano a Ijib. Ko i God u leire dena vanue Ijib gina nona huireana u lawua.

¹⁸A higao lategi ngavulu gaivesi lune ingere lo vanue vurogi ram singotutubu lawagi ingeie God he sireginire tea.

¹⁹Siu ingeie mo livu vohogi na garoi tangaloi gaibitu hi rau toga lolo vanue Kenan, ko ingeie mo bete na vanue lawe retubumai, gi vanuara.

²⁰Siu u eno mo dadari higao vudolue vagavesi avigi ngavulu gailime. “Lo tagugi hi, i God mo tau na tomtomegi lawera, ram tomueginire mo dadari lo taroi Samuel a tangaloi veve rarai.

²¹Ko ingere ram navu na ratahigi, i God mo bete Sol i netui Kis den duvi Benjemen, huri ve vin voragi nora ratahigi, vin ratahigi gorora higao ngavulu gaivesi.

²²Lune i God mo lai vohoginie, ingeie mo tau Devet mo voragi nora ratahigi. Ko i God mo laqagi hurie mwere ngaha vena, ‘Nau haqe Devet i netui Sese, ngehi a tangaloi nau taranie, ingeie vin vei na gineu doluegi mwerehi nam tarani.’

²³Ko u tatarise mwere i God u warataugi beno, ingeie u tabe kalo na tangaloi gatagale den duvi Devet, a henana i Jisas huri ve vin vagamwasoi na sinobu a duvi Israel.

²⁴Nge lune i Jisas he vonai te mo sigei, a tangaloi a henana i Jon mo toretore lawe na sinobu a duvi Israel, mo veve vena, ‘Nen tudori den nomiu galegaleasi, gimiu doluegi nen garuhigogona.’

²⁵Siu mo kakarani ve i Jon a nona tabanagi na rovo mo veve vena, ‘?Igimiu nem lado ve ineu ihine? Ineu hatie ngehi igimiu nem raraie. Igimiu nein lehe. Ingeie hi mo vonai lo taguku ineu nahe tatarise tea ve nain riqe na garoi nona butu.’

²⁶“Retueku. Igimiu hi ira duvi Ebraham, ko igimiu a sinobu wagineu vage hi nem hudu goro na nomai God, i God u hora na leoi mwasoana ngaha lawe gide.”

²⁷A sinobu hi rau toga Jerusalem mena nora tomtomegi rahe ilo tea ve ingeie i vagamwasoi, ko rahe ilo tea vurugegi na leo nora tangaloi veve rarai ram value vataha rani mangaana. Giniehi, a leo nora tangaloi veve rarai mo eno lune huri ram vevegi Jisas ve vin mate.

²⁸A tangaloi rahe haqe na gineu tea vohogi ve vin mate hurie, siu ingere ram navu den Baelat vena vai vagamatea.

²⁹Lune ingere rau vei tui na gineu doluegi hi a revereve gogona u veve hurie, ram lai surie dena gai saroutu ram tuleginie lolo malanga vatu.

³⁰Nge i God u vagamwasoie dena mateana.

³¹A tangaloi rau huri Jisas tomue dena vanue Kalili mo dadari Jerusalem. Lune ingeie mo maraga taligu dena mateana mo sereluae sibona lawera ram lehe a ranigi u sao. Siseri ngaha ingere ram laqagi hurie lo nagora sinobu a duvi Israel.

³²“Ko igamaru go rom toga hano huri ve gori veve sere na Roro Garea lawe gimiu. A havagineu hi i God u warataugi teu lawe ratubude tuei, huri ve vin vei,

³³nge bagataha u vei lawe gide hi ira duvire, u ragasi Jisas dena mateana mwere hi u reve lo Sam tavalugi gairue, ‘Iniko i netuku, bagataha ineu nam voragi tamamu vohogi.’

³⁴I God u veve beno ve vin ragasie dena mateana, vin he mate tea taligu ve a tarabesine vin mada mwere hi u veve lo revereve gogona vena, ‘Ineu nai bete na vaigarea gogona lawego hi nau warataugi teu lawe Devet.

³⁵Siu mwerehi vohogi u veve lo Sam mahogi wagineu vage vena, ‘Goin he siregi na tarabesi nom tangaloi gogona tea ve na mada.’

³⁶Lo taro i Devet mo mwaso tau, u vei na gineu doluegi hi i God mo tarani. Lo tagugi hi nge mo mate, ingere ram tuleginie mei retubune. Ko a tarabesine u mada beno.

³⁷Siu i Jisas hi i God u ragasie dena mateana, a tarabesine he mada tea.

³⁸“Retueku. Igimiu doluegi nein ilo vurugegi huri guru matamwasaragi na leo hi lawe gimiu ve a nomiu galegaleasi vin lado vohogi lui Jisas.

³⁹Gimiu nein ilo vurugegi ve i Jisas hogosie vin vei leire hi rau ladohogo ginie rain toga mwagumwegu dena nora galegaleasi. Nge a leohora noi Mosis vin he vai gimiu tea ve nein toga mwagumwegu dena nomiu galegaleasi.

⁴⁰Siu igimiu nein leo huri vurugegi, vaiteu a leo nora tangaloi veve rarai ram hogosi gimiu, ngehi mo veve vena,

⁴¹‘Igimiu ngaha neu mavaginie nem vai asiesiginie, nein leo huri. Neu vei bulaginie igimiu nein mate. Huri a tabana hi ineu nam vaie lo tarogi ngaha, vei ihine tea gatagale vin mata-mwasaraginie lawe gimiu nein he ladohogo tea lune.’ ”

⁴²Siu i Bol tona Banabas rum mwalue dena valei soneana, a sinobu ram navu denire vena, “Gam harigi gimiru huri ve lo Rani Mangaana taligu neri vomai, neri veve sere na leo tea vage lawe gamai.”

⁴³Lune a tangaloi ram mulemule, u sao ram huri Bol tona Banabas ingere lavasigi a duvi Israel, lavasigi ingere a haroharo hi rau vovohoi ram ladohogogi God ram huri na leo huhui nora sinobu a duvi Israel. A gaihora gairue hi rom laqa meire rom vaga mwamwavigi na domire ve rain toga vin siaga lo domi tabetabe lawua noi God.

⁴⁴Lo Rani Mangaana taligu, a sinobu ram sone bubugi u kakarani vei ingere doluegi lo qatui venue hi, ram rongo na leo noi noda Huqe.

⁴⁵Lune ingere a duvi Israel ram lehi na sinobu ngerehi, mo garasire garagara ram veve asiesigi Bol ram qalo goro na leona vage.

⁴⁶Nge i Bol tona Banabas rom laqa mo huihuire vage rom veve vena, “U tatarise ve igimiu nei rongo na leoi God tomue. Nge igimiu nem rahaginie, siu igimiu nem lado ve ngehe tatarise tea mena mwasoana hi vin he rovo lai tea. Siu hate huri i gamaru gori siregi gimiu, gori vano lobera haroharo.

⁴⁷Huri a leo waratau, ‘Nau teugo ve goin voragi na leleo lawera haroharo denire sinobu a duvi Israel, goin veve sere na matahalai mwasoana lawe na ureure doluegi.’ ”

⁴⁸Lune ira haroharo ram rongo na leo hi, ram rongo garea u liu, ram waregarea gina leo noi noda Huqe. Nge ingere hi i God u leo wahera beno huri ve rain lei na mwasoana hi vin he rovolai tea, ingere hi rau ladohogo ginie.

⁴⁹Siu a leo nona Huqe mo vano doluegi na togagi venue lolo vanue hi.

⁵⁰Siu a sinobu a duvi Israel ram tau keli lui Bol tona Banabas ram veve lawe na tangaloi lalawua lo qatui venue hi, mena vavine haroharo vage, ingere hi ram ladohogogi God ram vaire a lolora mo gagasi. Ram tau vuigi ram vai bulabulagi Bol tona Banabas, ram livu vohoginire dena vanuara.

⁵¹Ko ingere rom heheragi vohogi na qie dena karure gorora, mo haharagi lawera sinobu talo togagi venue hi, ve ingere rau rahagi na Roro Garea noi Jisas. Siu ingere rom vano lo qatui venue hi Ikoniam.

⁵²Ko a sinobu hi rau ladohogogi Jisas lo vanue Antiok ram havuhevu u liu, ko ram horo gina Vui Gogona.