Read East Ambae LALAKOGI 16 Bible Online

LALAKOGI 16 - East Ambae bible

LALAKOGI 16

¹Bol mo vano Debi ko Listra. A tangaloi a henana i Timoti mo toga aie hi, i ratahine, u ilo God vage; ingeie a duvi Israel, nge i tamana ta Kris.

²A reretehigi doluegi ta Listra ko Ikoniam ram veve vei Timoti a tangaloi garea.

³I Bol mo tarani vena lai Timoti ve ron vano bulu siu ingeie mo teve gigileginie. Ingeie u veie mwere hi vevenagi a duvi Israel ram toga aie hi rau ilo huri ve i Timoti i tamana ta Kris.

⁴Lune ingere ram vano lategi lolo togagi venue lalawua ram veve na tau leo lawera tangaloi rau ilo God beno, ira hala meire tamaragai rau vagatai a Jerusalem, ko ram veve lawera ve rain tabe na tau leo ingere hi.

⁵Giniehi, a sinobu a nora ladohogo mo siaga ko u sao vage ram bulu meire.

⁶I Bol tona Saelas ko i Timoti ram vano turu na vanue Vrisia ko Kalesia, vevenagi a Vui Gogona he siregi te lawera ve rain ngasagi na Roro Garea lo vanue Esia.

⁷Ngere ram dige lolo vanue Maesia, ingere ram tarani ve rain vano lolo vanue Bitinia, nge a Vui noi Jisas he siregi tea ve rain vano aie.

⁸Siu ingere ram vano lolo vanue Maesia ko ram hivo Troas.

⁹I Bol u hueri lolo bongi mo lehi na tangaloi ta Masedonia mo labe mo warea mo veve vena, “Gon vanai Masedonia gon bului gamai!”

¹⁰Siserigi lo tagugi hi Bol u hueri, gamai gam vai vagatai ve gain vano Masedonia, vevenagi igamai gam lado vei God mo ware gamai ve gan ngasagi na Roro Garea lawe na sinobu ta aie hi.

¹¹Igamai gau vanai lo aka dena vanue Troas ko gam vano tuturedu lo vanue Samotres ko lo bongi tuegi gam vano Neabolis.

¹²Aiehi gamai gam dige gam vano lolo livugei venue Vilibae, a togagi venue lawua garagara lo qatui venue gatagale Masedonia, mo toga lo limei ratahigi ta Rom. Igamai gau toga bongigi u sao lolo togagi venue lawua garagara hi.

¹³Lo Bongi Mabusurigi igamai gam mwalue dena togagi venue hi gam vano lo mwararai wei, igamai gam lado ve a tanoi tataro nora duvi Israel. Igamai gam toga hivo gam laqa meire vavine hi rau sone aie hi.

¹⁴Gatagale denire vavine hi mo rorongtagi gamai i Lidia, ingeie ta Tuatira, ingeie a tangaloi sosogagi galego memea rau raka mwere na luqara ratahigi. A vavine hi mo hudugoro God, ko a huqe mo waga na domine vena rorongtagi na havagineu i Bol mo tarani vena veve, ko ingeie mo rongoe mo ladohogo.

¹⁵Siu ingeie ko i renetune ko a nona tangaloi tabanagi ram garuhigogona. Siu ingeie mo ware gamai mo veve vena, “Nen vanai da toga lo valeku, tare igimiu neu ilo huri ve nau ladohogo gina noda Huqe hogo.” Ko ingeie mo bibiri gamai ve gan vano.

¹⁶Lo bongi gatagale, igamai gam vano lo tanoi tataro, gam haqe na taqalugu a tangaloi tabanagi a vui esi mo toga lune, a vui esi hi mo matamwasaragi na gineu ve rain vei te tarogi. A nona masi ram lai na mane lalawua lo leona.

¹⁷Ingeie mo huri Bol ko igamai, mo ulo mo veve vena, “A tangaloi ingere ngaha a tangaloi tabanagi noi God hi u Hahale Garagara! Ingere ram veve sere lawe gimiu huri ve nei mwaso mwere hi logo!”

¹⁸Ingeie u veie a bongigi u sao mwere hi, siu i Bol mo vanai mo rongoe a lolona he garea te ginie. Siu mo tudori, mo veve lawe na vui esi hi mo toga lune mo veve vena, “Lo henai Jisas Kraes, ineu nam veve lawego gon mwalue den taqalugu hi.” Ko siserigi, a vui esi mo mwalue denie mo vano.

¹⁹Lune a masi nona vavine hi ram lehe mwere hi, a tangaloi ingere hi ram iloe ve ngaha u rovo dain he lai na mane tea lo vavine hi, ingere ram romasi. Siu ingere ram wiribibi Bol tona Saelas ram laire mo vano lo tanoi vevegi lo mahoi ute lawua hi ram sosogagi ko ram voli aie.

²⁰Ram laire mo vano lo nagora tangaloi vevegi gairue ta Rom, ram veve lawera vena, “A tangaloi ingere ngaha, ingere a duvi Israel, rom vai na gineu he garea tea lolo nomai qatui venue lawua.

²¹Rom vai na gineu rahe garea tea, rom veve ve igide dain huri na leo huhui wagineu, nge a leo huhui hi rahe tatarise tea mei gide hi dam toga lo vavai vilagi ta Rom.”

²²Siu a tangaloi vage u sao ram vonai ram bulu meire ram vevegi garue hi. A tangaloi vevegi hi rum hora na tangaloi vuro ve ran tugu na luqara ko ran vivihire.

²³Lune rau wehi Bol tona Saelas hi u rovo ram taure talolo valei veuveu. Siu rom veve lawe na tangaloi leo gorora hi ram toga vau, ve vin leo goro vurugeginire.

²⁴Lune a tangaloi leogoro mo rongo na leo hi, mo laire mo vano lolo vale. Mo vau siagagi na karure tamena welehi lawua.

²⁵Lategi lolo livugei bongi i Bol tona Saelas rum tataro ko rom huri rorogi God. Ingere lavasigi hi ram toga vau ram rorongtaginire.

²⁶He ribi tea a ruru lawua mo vanai, mo rurugi na valei veuveu hi mo rurungudu, a matai vale hi ram wuwanga, siu a garo vatu hi rau veuhire tangaloi vauveu hi ginie rau meutu utu denire.

²⁷A tangaloi leo gorora hi ram toga vau mo rada mo lehi na matai vale rau wuwanga beno. Mo lado ve a tangaloi hi rau toga lo goro vau rau toa vohogi beno. Siu mo lai na nona buei vuro mo vena qange vaga matea ginie.

²⁸Nge i Bol mo ware siaga vena, “Ei! Go vate wehigo sibomu. Igamai doluegi tangaha.”

²⁹A tangaloi leogorora hi ram toga vau, mo ware siaga ve tangaloi tea na vanai mena leleo lawea. Siu ingeie mo toa mo vano lolo vale. Mo matagu liu ko mo ruru, mo soi hivo lobei karui Bol tona Saelas.

³⁰Siu mo laire ram mwalue varea, mo huire vena “!Ei, garue! ?Ineu nain vei wuraha huri i God vin vagamwasoieu?”

³¹Rom veve lawea vena, “Gon ladohogo lui Jisas hi a nomai Huqe, huri i God vin vagamwasoigo ko ira hine doluegi hi ram toga lolo valemu.”

³²Ingere rom veve sere na leoi noda Huqe lawea, ko lawe rahine hi ram toga lolo valena vage.

³³Nge lolo bongi hi tau mosigei, a tangaloi leogorora hi ram toga vau, mo laire hi mo solo vurugegi na matai ara. Lo tagugi hi ingeie, ira netune ko a tangaloi doluegi hi ram toga lolo valena ram garuhigogona.

³⁴Siu mo lai Bol tona Saelas ram hage lolo valena ko mo bete hinaga lawera. Ingeie ko ingere doluegi hi lolo valena ram rong garea u liu huri ram ladohogo lui God.

³⁵Maraga robongi: a tangaloi vevegi gairue hi rom veve lawera tangaloi vuro vena, “Nen vano nen siregi na tangaloi gairue hi ron mwalue dena valei vauveu.”

³⁶Siu a tangaloi leogorora hi ram toga vau, mo veve lawe Bol vena, “A tangaloi vevegi gairue hi rom veve lawe gamai ve gan siregi gimiru nero mwalue dena valei vauveu siserigi ngaha i gimiru nero mwalue, nero vano, siu a domimiru vin toga masuri.”

³⁷Nge I Bol mo veve lawera tangaloi vuro vena, “?Ei, nge wuraha? I gamaru gorom toga lo vavai vilagi ta Rom. Siu a tangaloi vevegi gairue hi rohe haqe na gineu tea ve guru veie u esi. Nge ru vivihi gamaru lo nagora tangaloi beno. Rom tuli gamaru talolo valei veuveu. Ko siseri ngaha rom tarani ve ron lailei rorongogi gamaru tavarea. !Ngehi hatie! Ingere roin vanai tangaha rom lai gamaru tavarea sibora.”

³⁸Siu a tangaloi vuro ram vano ram veve na leo ingere hi lawe na tangaloi vevegi gairue hi, nge lune ingere rom ilo huri i Bol tona Saelas rom toga lo vavai vilagi ta Rom, ingere rom matagu garagara.

³⁹Siu ingere rom vano rom veve nora hahagavi lawe Bol tona Saelas, siu rom tomuegi ginire rom mwalue dena valei veuveu. Siu a tangaloi vevegi gairue hi rom navu denire huri ve ron mwalue den togagi venue hi.

⁴⁰Siu i Bol tona Saelas rom mwalue dena valei veuveu, ingere rom vano lo valei Lidia. Aie hi, rom haqe retuada ko i rehaqeda, ko rom laqalaqa meire ve ron vagamwamwavigi na domire, siu lo tarogi hi ingere rom mwalue rom vano.