Read East Ambae LALAKOGI 18 Bible Online

LALAKOGI 18 - East Ambae bible

LALAKOGI 18

¹Lo tagui gineu ingere hi, i Bol mo vano lo vanue Atens, mo vano lo qatui venue Koren.

²Aiehi ingeie mo haqe na tangaloi gatagale a duvi Israel, a henana i Aqila. Ingeie a vora ta Bontas, siu mo vano mo toga lo vanua Itali lo qatui venue lawua hi Rom. Lo tagugi hi a ratahigi lawua aie hi i Klodias mo tau na leo ve a duvi Israel rain maraga dena qatui venue hi Rom. Siu i Aqila tona gahorana i Brisila, rom siregi dena qatui venue lawua hi, rom vano rom dadari Koren. Ru toga he ribi tea i Bol mo dadari, mo vano mo lehire,

³ko mo toga lobera mo bulu meire lo nora tabanagi, huri ingeie vage a nona tabana mwere hi. Ingere ram samavu na teniti, a vevenagi i Bol mo lai na gana hinaga lo tabana hi.

⁴Nge gesegi lo rani Mangaana, i Bol mo laqa lo valei soneana nora duvi Israel lawera duvi Israel ko ingere ta Kris, vena lai lei na domire ran ladohogo lui Jisas.

⁵Lune i Saelas tona Timoti rom siregi Masedonia, rom vano rom dadari lo qatui venue hi. Lo taro hi i Bol u siregi na tabanagi ngehi u samavu na teniti. Nge vataha tarogi hi mo veve sere na leo garea, mo matamwasaragi vurugegi lawera duvi Israel huri ve i Jisas hi ingeie i Ratahigi Vurei.

⁶Ko ingere ram vaiveie, ram veve asiesiginie. Bol mo teragi na qiei luqana lo nagora, mo haharagi lawera ve ingere ram veve asiesigi God. Nge mo veve vena, “Tare ve nem sala, ngehi a domimiu sibomiu. Neu nam rovo. Mo tauvuigi bagataha, ineu nai vano nai veve sere na noku leo lawera tangaloi tavala varea den duvi Israel.”

⁷Siu ingeie mo vano denire mo toga lolo valei tangaloi gatagale a henana i Titias Jastas. Ingeie a tangaloi tavala varea den duvi Israel ingeie mo hudugoro God. A valena mo labe kakarani lobei valei soneana nora duvi Israel.

⁸A leo goroi valei soneana hi a henana i Krispas mo ladohogo mei renetune doluegi. A tangaloi u sao vage lo qatui venue hi Koren ram rongo na leo noi Bol ram ladohogo ko ram lai na garuhigogona.

⁹Lolo bongi gatagale i Bol mo hueri. Mo lehi na Huqe ve mo laqa meie mo veve vena “Gon mese matagu, goin laqa tamwere hi goin mese siregi,

¹⁰huri ineu meigo. Ihine te gatagale vin he vai asiesi ginigo tea, huri a tangaloi u sao ram toga lo qatui venue lawua ngaha a noku tangaloi.”

¹¹Siu i Bol mo toga aie hi a higao gatagale mautugi mo huhuire tangaloi gena leo noi God.

¹²Lo taro hi ingere ta Rom ram tau Kalio mo voragi kavman lawua nora ta Kris. Siu a duvi Israel ram sone bubugi ram wiribibi Bol ram laie ram vano meie lo kot.

¹³Ngere ram veve vena, “A tangaloi ngaha mo vai ve na revei na tangaloi ve rau hudu hudugoro God lo matahala he tatarise tea mena leohora.”

¹⁴Siu i Bol mo maraga vena laqa, nge i Kalio mo veve lawera vena, “Igimiu ira duvi Israel, nein rorongtagi. Tare ve a gineu ngaha he tatarise tea, sige a gineu he garea tea, mo vai utuhi na tauleo, gimiu neu ilo beno, ve ineu nain rorongtagi gimiu.

¹⁵Nge huri nge ngaha a garoana hogosie lo leo lo hea ko a gineu talo nomiu tau leo, mo eno lumiu hogosie ve nein vurugeginie sibomiu. Ineu nahe havuhevu tea ve nai vevegi na gineu mwere hi.”

¹⁶Nge mo livusire tavarea dena tanoi vevegi.

¹⁷Lune ram mwalue varea dena valei vevegi, A tangaloi hi ram wiribibi Sostinis, a tangaloi leo goroi valei soneana, ram wehe lo nagoi tanoi vevegi. Nge i Kalio he lado te huri vohogi.

¹⁸I Bol u toga a ranigi u sao lo qatui venue Koren mei rehavana, siu mo sireginire mo vano lo qatui venue Kekaria. Gitomue i Bol u teu na waratau siaga mei God, siu aie hi, vena haharagi na vagasigi nona waratau, ingeie mo bala na vulune taligu. Siu i Bol mo lai na aka gatagale vena vanai teligu Siria. I Brisila tona Aqila ram vano bulu.

¹⁹Ram dadari lo qatui venue Evesas, aie hi Bol mo siregi Brisila koi Aqila. Ingeie mo vano lolo valei soneana ko mo laqalaqa meire a duvi Israel.

²⁰A sinobu ram navuhie vena toga meire na mala qaravu, nge ingeie he masinge tea mwerehi.

²¹Nge lo taro hi mo veve lawera vena, “Tare ve i God mo lado mwere hi, bataha nai vanai nai lehi gimiu taligu.” Siu nge mo lai na aka wagineu, mo vano den qatui venue Evesas, nge mo siregi Brisila tona Aqila ingere rom toga aie hi.

²²Lune i Bol mo dadari lo qatui venue Sisaria, mo hage varea. Mo dige mo hage ve na lehire tangaloi talo warelue lo qatui venue Jerusalem. Nge lo tagugi hi nge mo hivo taligu lo vanue Antiok.

²³Ingeie u toga u mala ribi aie hi, siu mo dige taligu. Mo dige turu mo vano lo vanue Kalesia ko Vrijia, ve na vai siagaginire tangaloi noi Jisas ve ram huire taligu.

²⁴Aie hi a duvi Israel gatagale mo vanai den Evesas, a henana i Apolos. U vora lo vanue Aleksandria, ingeie a tangaloi garea lo leo, u ilo vurugegi na revereve gogona.

²⁵Rau huhuie u rovo lo turegi huri na Huqe. Ingeie gesegi mo rongo garea huri mo toretore ko mo huhui na tangaloi gena leo hogo noi Jisas. Nge ingeie u lei na garuhigogona mwere hi i Jon garuhigogona u veie tuei.

²⁶Nge mo toretore lolo valei soneana nora duvi Israel, nge he matagu te vohogi. I Brisila tona Aqila rom rongoe, rom laie ram vano lo valera rom matamwasaragi na Turegi noi God mo tutuvano lawea.

²⁷Lo tagugi hi i Apolos mo lado ve na vano lo vanue Kris. Siu i retuada lo vanue Evesas ram buluie, ram uli na leta mo vano lawera tangaloi noi Jisas. Ram veve lawera ve rain lei tabetabegi Apolos talolo valera. Lune nge mo dadari Kris, mo bului vurugeginire hi i God u buluire beno gena nona havuhevu, aie hi ram ladohogo gi Jisas.

²⁸Gena nona leo huire mo qoraginire duvi Israel lo nagora sinobu mo haharagi na Reve reve Gogona lawera huri ve i Jisas ingeie i Ratahigi Vurei.