Read East Ambae LALAKOGI 2 Bible Online

LALAKOGI 2 - East Ambae bible

LALAKOGI 2

¹Lune a bongi Bentekos mo dadari, lo taroi hinagai halegagaliu nora a duvi Israel, ingere hi rau ladohogo gi Jisas ram toga bubugi.

²Siserigi a rorogi mo vonai lo mahava, mwere na roroi langiue lawua mo here. Mo vano doluegi na loloi vale hi ingere ram toga lolona.

³Siserigi ingere ram lehi na gineu mwerena mui evi, a muigi hi mo gagaburegi mo bulusire doluegi.

⁴Ko ingere doluegi ram horo gina Vui Gogona, ko ram tauvuigi ram laqa gina leo wagiwegineu mwere a Vui Gogona mo vaire ram laqa mwerehi.

⁵A sinobu a duvi Israel hi ram toga Jerusalem, ingere a tangaloi tataro, ingere ram vonai den vataha qatui venue lolo ureure.

⁶Lune a tangaloi doluegi ram rongo na roro hi, a sinobu u sao ram vonai aiehi. Ko ingere doluegi ram awogi u liu huri na roro hi, huri a tangaloi ingere hi a Vui u hivo lure ram laqagi na leo wagiwegineu, nge vatavataha na tangaloi mo rongo hogosi na nora leo doluegi lo leona sibona.

⁷Siu ram awogi u liu, ko ram ruru, ram veve vena. !Ei ngaraha! A tangaloi ingere hi ram gato mwere hi, nge ingere ta Kalili hogosie.

⁸?Huri havai gide dam roba ram laqagi na leoda mwere hi?

⁹Igide a tangaloi talo qatui venue u sao, ta Batia, ta Midia ta Elam, ta Mesabotemia, ta Judia, ta Kapadosia, ta Bontas, ta Esia, ta ?Vrisia, ta Bamvilia, ta Ijib, ta Krit, ta Arebia, ko ta Libia kakarani vano Saerini, ko vage ta Rom. Gide lavasigi a duvi Israel vovohoi, ko lavasigi ingere tangaloi wegiwegineu gitomue, siu lo tagugi rabei lei na noda leo huhui. Tau igide doluegi, dam rongora ram laqagi na noda leo gagatagalegi, ram veve sere na tabana lawua hi i God u veie.

¹⁰

¹¹

¹²Tau ingere ram garigi u liu, a domire mo sala, rahe iloe tea, ram vui huihuiginire vena. “!Ei ngaraha!? A havagineu ngaha?”

¹³Siu ingere lavasigi ram sovure hi a vui u hivo lure beno ram veve vena. “A tangaloi ngerehi rau inu na wai lenga.”

¹⁴Siu i Bita mo labe meire gaihora hangavulu domwagi gatagale, mo laqa gina dilogi u lawua mo veve lawera sinobu hi vena. “!Retueku! Gimiu a duvi Israel, ko gimiu hi nem toga Jerusalem. Gimiu nen rorongtagieu, ko nen rorongtagi vurugegi na noku leo ingere ngaha nain matamwasara gina gineu ngaha lawe gimiu.

¹⁵A tangaloi ingere ngaha rahe inu te wai langa mwerehi gimiu nem veve, hatie. Siseri ngaha mo robongi, a aho mo bei kalo hi.

¹⁶A gineu ngaha gimiu nem lehe, nge hi a gineu i Joel a tangaloi ligoligogi u ligogi tuei vena,

¹⁷‘I God u veve vena, “Lo bongi vagasigi vin kakarani, ineu nai bete na noku Vui lawera tangaloi doluegi, huri ingere rai lehi na nona huireana doluegi. I renetumiu doluegi, maresu mwera koa vavine, rai serelue na leo ngerehi neu nain vevea lawera. Ko ira nomiu mwalakelo mwera, rain hueri. Ko ire tamamiu ingere rain boboregi na boborea teri.

¹⁸Io, lo tarogi hi, ineu nain bete na noku Vui lawera vavai tangaloi hi ram rorongtagieu, a mwera ko a vavine. Huri ve ingere rain lei na nona huireana siu ingere rain veve lue na leo doluegi ngehi neu nain vevea lawera.

¹⁹Ineu nain vei na gineu doluegi a gineu garigiana ta eulu. Ko nai vei na gigilegi huri na noku huireana lolo ure ngaha vage. A dai a avi koa kukugi vin vomai.

²⁰Tomuegi a aho vin dodo, ko a vule vin gara mwere na dai. Siu lo tagui noku rani hi, ineu a Huqe, nge vin vomai. Nge hi a rani hi u lawua, ko u garea garagara.

²¹Garea, lo tarogi hi, tare a tangaloi mo wareau lo henaku, ineu a Huqe ineu nai vagamwasoie.

²²“Gimiu a duvi Israel, nen rorongtagi na leo ingere ngaha. Jisas a tangaloi ta Nasaret ingeie hi hogosie God u horae. Jisas mo haharagi na gineu lolo vaigivui teri. Koa gigilegi mena gineu garigiana hi God u bete na huireana lawea u veire lo nagomiu.”

²³Lune i God u teu na tangaloi hi lo limemiu, nge u veie mwerehi, mo huri na nona tarani, huri nge u ilo na gineu doluegi ve rain mwelue vomai. Tau gimiu nem maraga, nem hako meire tangaloi galegaleasi ram totoe lo gai saroutu mo mate.

²⁴Nge i God u vagamwasoie taligu dena mateana, ko mo laie taligu dena huireana nona mateana, huri a mateana he vailei tea ve vin wiribibie.

²⁵Huri i Devet u veve hurie vena, nau lehi na Huqe mo labe lo nagoku gesegi, ko lo matueku huri nain he ladoasi tea.

²⁶Nau lehi na Huqe mo labe lo nagoku gesegi, ko lo matueku huri nain he ladoasi tea. Huri na gineu ngaha, lo domiku ko lo noku leo, gesegi neu nam rong garea u liu. Ineu a tangaloi, ko a noku domiana u huire gesegi,

²⁷huri gohe siregi vohogi na tamateku tea, vena toga lo tanoi tamatera rau mate beno, Ko gohe siregi na betuku tea, vena mada ko na gahu, huri ineu a nomu tangaloi tabanagi gogona.

²⁸Gu serelue na matahalai mwasoaku beno, huri niko goin vei na domiku vin hevuhevu u liu, huri iniko goin toga meieu.

²⁹“Retueku, Neu nam tarani vena veve matamwasaragi lawe gimiu. I tubude hi ta tuei, a henana i Devet u mate beno. Rau tuleginie, a qaruhine mo eno lo tanoda, mo dadari gaqarigi.

³⁰Ingeie a tangaloi veverarai gatagale, gimiu neu iloe beno ve i God u vei na waratau gatagale lawea. God u vei na waratau gatagale u siaga lawea, huri vea duvine gatagale vin Ratahigi taligu, mwere i Devet Ratahigi tuei.

³¹I Devet mo leo vea gineu gatagale vin mwelue, ko ingeie mo laqagi huri i vagamwasoi ingeie mo veve vena, God he siregi na tamatena tea vena toga lo tanora tangaloi rau mate a tarabesine he mada tea vena gahu, nge u mwaso taligu dena mateana.

³²God u ragasi Jisas dena mateana, ko ingeie mo mwaso taligu, ko igamai doluegi gam laqagi lue na gineu hi.

³³I God u tabe hageginie huri ve vin toga lo matuana. I God tamada u bete na Vui Gogona lawera mwere u waratauginie tuei beno. Ko a gineu ngerehi gimiu nem lehire ko nem rongora, a tabana nona Vui Gogona hi i Jisas u betea lawe gamai.

³⁴I Devet hi, he hage tea lo eulu nge ingeie hogosie mo veve na leo ngaha vena, A Huqe God mo veve lawe na noku Huqe vena gon toga lo matueku,

³⁵vin dadari nain teu na nom tavului vuro, rain voragi tanoi gai heheragi kerumu.”

³⁶“Giniehi, igide a duvi Israel doluegi, dain ilo vurugegi vea hogo a Huqe u lei Jisas hi neu toto vehavehaginie lo gai saroutu. Siserigi ngaha u veie mo voragi noda Huqe koi Ratahigi Vurei vage.”

³⁷Lune a sinobu sao ram rongo na leo hi, ram rongoe ve mo hogosire u liu. Siu ram hui Bita meire hora lavasigi vage, ram veve vena. “?Retueku, gamai gain vei wuraha?”

³⁸I Bita mo veve lawera, vena, “Vatavatahagi gimiu nen tudori dena nomiu galegaleasi, ko igimiu doluegi nen garuhigogona lo henai Jisas Kraes, huri God vin lei vohogi na bugumiu. Siu i God vin bete na Vui Gogona hi lawe gimiu.

³⁹Huri a waratau noi God mo eno lawe gimiu mei renetumiu, ko lure hi ram toga vagahao tau. A waratau hi mo eno lure hi a Huqe a noda God mo warera vanai lobena.”

⁴⁰Ko i Bita mo veve sere na leo hogo hi lawera, ko mo veve na leo u sao huri vena reveire mo veve vena, “Gimiu nen mwalue dena tangaloi esi ingere hi ram toga lobemiu huri nein mwaso dena leo vevegi hi vin hogosire.”

⁴¹Siu ingere hi ram ladohogo gina nona leo ram lai na garuhigogona, ko lo rani hi, ingere u teri vagatolu ram bulu meire.

⁴²Vataha tarogi ingere hi ram rorongtagi na leo ingere hi ira gaihora rau huhuire ginie ko ram bulu lo nora burigi hi. Ram bului ram vise na bereti ko ram tataro. Ko gesegi ram huri mwamwavigi na doridori ingere hi.

⁴³Lo taro hi i God mo vaire gaihora ram tabanagi na gineu garigiana u sao, ko a gigilegi u sao vage talo nona huireana, tau a tangaloi doluegi ram matagu lawagi gina gineu ingere hi.

⁴⁴A sinobu hi ram ladohogogi Jisas, ram bubugi vurugegi lo burigi gatagale hogosie, siu ngere doluegi ram hilegi na nora hakogineu vatavatahaginire.

⁴⁵Ko ram sogagi na nora vanue, ko a nora hakogineu, huri a nora doridori mwerehi, huri ve rain betegi na manegi, lawera mahoi tangaloi, vin tatarise huri na havagineu hi a mahoi tangaloi ram mahogi lune.

⁴⁶Vataha rani, ingere hi ram bubugi mwere a burigi gatagale, lolo valei God. Ko ram toga ram gagani lolo valera, ko ram vise na bereti mwere hi i Jisas u veve. Siu ingere ram gagani ram rong garea. Ko ram havuhevu gesegi.

⁴⁷Ko ingere ram toga ram waregareagi God, ko a tangaloi lavasigi ram lado mavaginire, vataha bongi a Huqe mo vagamwasoi na tangaloi lavasigi vage, ko mo vile bubuginire doluegi lo burigi hi ram saosao vage.