Read East Ambae LALAKOGI 26 Bible Online

LALAKOGI 26 - East Ambae bible

LALAKOGI 26

¹I Akriba mo veve lawe Bol vena, “Garea, nam siregi lawego ve gon veve sere te gineu hurigo sibomu.” Siu i Bol horagi na limana huri ve ingere rain toga rorongo ran rorongtaginie. Ingeie mo duvi na leo ingere hi a tangaloi rau vevera vano vovohoie.

²Mo veve vena, “Ratahigi Akriba. Ineu nam leo ve a tangaroa garea laweau hi bagataha, huri ve nain duvi lei na gaku leo ingere hi ira duvi Israel ram vaiveieu ginie lo nagomu.

³A leo hogo ngaha, huri iniko gu ilo vurugegi na noda togatoga igide a duvi Israel. Giniehi, nam navu denigo ve goin rongo ribi meieu huri goin rorongtagi na noku leo.

⁴Ira a duvi Israel rau ilo vurugegi na doridoriku lo mwasoaku u teuvuigi lo taro hi nam maresu teu, nau toga lo vanueku, siu mo dadari lune hi nam toga lo vanue Jerusalem.

⁵Ingere rau ilo vurugegi, huri lune ineu a maresu nau bulu mena noda burigi hi a Varise ram toga lo leo u huire garagara. Io ineu vage a Varise. Io nge tare ve ira duvi Israel ram havuhevu huri ve rain ture na noku leo, ingere rain veve ve a leoku ingere ngaha a hogo.

⁶Siu siseri ngaha ineu nam labe tangaha, ve goin rongo wahewahe na noku leo, huri ineu nam tau na noku domiana mo labe lo waratau hi i God u veie lawe retubude tuei.

⁷A waratau ngaha ingeie tau hi ira duvide hangavulu domwagi gairue, rau hudu goro God lolo rani ko lolo bongi, rau lado tare ve rain leie. Ratahigi Akriba, ineu nam lado tare na waratau hi vage, nge ira duvi Israel, ram vaiveieu huri.

⁸!Ngaraha! ?Huri havai mo siaga lawagi mei gimiu ve nen lado hogo ve i God vin vei lei na tangaloi hi u mate beno vin mwaso taligu?

⁹“Nge lo taro hi tomue, ineu nau leo lai ve nai vei na gineu vin tugoro na henai tangaloi ta Nasaret hi, i Jisas.

¹⁰Nge hi a doridoriku hi nau veie lo vanue Jerusalem. Nam vano nam lai na leo denire rugurugu lalawua, siu nau teu na tangaloi noi God u sao lo valei veuveu. Lune ram veveginire ve rain mate, ineu vage nam daragi ve nain ue vagamatera.

¹¹Vatu saosao nam dali lategi nam vano lolo valei soneana, nam vivihire, nam vaileo ve nan dori na domire, ve ran veve asiesigi Jisas. Nam meroginire garagara nam livusire gesegi, ram toa ram vano lo vanue wagiwegineu vagahao, nge nahe sireginire tea, nam hurire tau mosigei.”

¹²I Bol mo veve vena, “Lo taro gatagale ineu nam vano Damaskas ve nan vai na doridori hi taligu. Ira rugurugu lalawua ram bete na leo siregi laweau, ko ram veve siaga laweau ve nain vei mwerehi.

¹³Ratahigi Akriba, lo matainaho tu vovohoi ineu lo turegi aie hi nam lehi na leleo lawua lo mahava, mo leleo mo vanai vovohoieu ko ira hine hi gau vano bulu. A leleo hi u leleo u liu na leleoi aho.

¹⁴Igamai doluegi gam soi talo tano. Siu nam rongo na dilo lo leora duvi Israel mo veve vena, ‘!Sol! !Sol! ?Huri havai gom vaiveieu mwerehi? A doridori hi mo vai asiesi ginigo sibomu. Go mwere na bulugi hi i tagibulana mo serie gina gai u hogohogora, ingeie mo vara sosori na hogoi gai hi, nge a gai hi mo turu garasie u liu.’

¹⁵Nam huie vena, ‘?Huqe, iniko hine?’ Siu a Huqe hi mo veve vena, ‘Ineu Jisas hi gom vaiveieu.’

¹⁶Nge gon maraga gon labe. Ineu nau serelue lawego huri ve nain leo wahego ve gon voragi noku tangaloi tabanagi. Huri goin veve sere lawera tangaloi wagiwegineu, a gineu hi gu lehire luku hi bagataha, ko a gineu vage hi nain haharaginire lawego lo taro mo vonai mo sigei.

¹⁷Ineu nain lei vohoginigo dena limara duvi Israel, ko dena limara tangaloi wagineu vage, nge nain horago goin vano goin veve sereau lawera.

¹⁸Goin waga na matara ve rain dori na domire, rain bela dena dodogi sulo leleo, ko ve rain mwelue dena huireana noi Setan, ko ran vanai sulolo huireana noi God. Siu i God vin lei vohogi na bugure huri ram lado hogogieu. Siu vin leire rain dadari lo tantanora, meire tangaloi hi i God u leo wahera beno.”

¹⁹I Bol mo veve taligu vena, “Ratahigi Akriba. Ineu nau vei na gineu ngerehi i God u haharaginire laweau, lolo hueri hi.

²⁰Ineu nau teu vuigi nam toretore lo vanue Damaskas, siu lo tagugi hi nam tore lo vanue Jerusalem, ko lategi lolo vanuara duvi Israel, ko vage lategi lolo vanuara tangaloi hi ingere duvigi tavala varea den duvi Israel vage. Nam veve sere lawera tangaloi ve ran tudori dena nora galegaleasi, ko ran lado hogo lui God. Ko ve ran vai na doridori hi ve na haharagi ve ingere rau ladowenigi beno dena nora galegaleasi.

²¹Ko huri na gineu hi, lo tarogi nam toga lolo Sara Gogona, a sarai valei God a Jerusalem, ira duvi Israel ram maraga, ram wiribibieu, ko ram vai leo ve ran ue vagamateau.

²²Nge i God mo hako meieu gesegi, giniehi mo vanai mo dadari bagataha ineu nam veve sere Jisas lo nagora tangaloi lalawua, ko vage lawera tangaloi haro. A leo hi nam laqaginie, a leogi nge tau hi ira tangaloi ligoligogi ko i Mosis rau veve serea beno tuei, ve vin vei mwerehi.

²³Ingere rau veve sere vei Ratahigi Vurei hi, vin rongo gagarasi lo tarabesine vin dadari lune vin mate. Nge lo tagugi hi, ingeie a muegi huri ve vin mwaso taligu. Lo doridorigi ingeie vin haharagi na leleo gatagale hogosie lawera duvi Israel ko lawera tangaloi wagiwegineu vage, ve a leleo hi a turegi noi God vin vagamwasoire doluegi.”

²⁴Lune i Bol mo veve sere na nona leo hi mwere hi, i Vestas mo gato siaga lawea vena, “!Bol! !Gom lenga! A nom iloilo mo vagalenga ginigo. Siseri ngaha a qatumu u rera beno.”

²⁵Nge i Bol mo veve lawea vena, “Huqe. Iniko a tangaloi lawua, nge ineu nahe lenga tea. A leo ingere hi nam vevera rau vovohoi, ko a hogo.

²⁶Ineu nain laqa vano vovohoi na ratahigi hi, nahe maemae tea, huri ba nau ilo ve u ilo na gineu ingere ngaha beno. Nau ilo vurugegi ve ingeie he saloie tea gatagale, huri a hogo, a lalakogi ngaha hatie gineu ve vin eno hiligi lo mahoi ute gatagale hogosie.

²⁷Ratahigi Akriba. ?Mwere hi logo? ?Wa iniko gu lado hogo gina leora tangaloi ligoligogi? Ineu nau ilo vurugegi ve gu lado hogo ginire.”

²⁸Siu i Akriba mo veve lawe Bol vena, “?Gom lado ve lo mahogi qilodo ngaha goin reveieu nai vanai nai voragi tangaloi noi Kraes?”

²⁹Nge i Bol mo veve vena, “Bataha lo mahogi qilodo hogosie sige lo mahogi vin qaravu, nge ineu nam tataro lawe God hatie hurigo hogosie, nge huri gimiu doluegi hi nem rorongtagi na noku leo hi bagataha. Nam tarani garagara ve igimiu doluegi hi nein voragi tangaloi noi Kraes mwereieu. A seni hi rau veuhieu ginie, nam rao ve ran vauhi gimiu ginie vage.”

³⁰Siu a ratahigi hi mena muei kavman ko i Benis ko a tangaloi lavasigi vage aie hi ram maraga,

³¹ram mwalue, ram vui veve veveginire vena, “A tangaloi ngaha he vai na gineu tea ve u tatarise ve vin mate, sige vin toga vau hurie.”

³²Siu i Ratahigi Akriba mo veve lawe Vestas vena, “Ve mwere hi a tangaloi ngaha he veve tea ve vin lei na nona lalakogi ngaha vano lawe Sisa, na sevai igide dain sireginie vin mwelue tabetabegi.”