Read East Ambae LALAKOGI 27 Bible Online

LALAKOGI 27 - East Ambae bible

LALAKOGI 27

¹Lune rau teu na leo u rovo ve gain vano Itali, ram tau Bol ko a tangaloi lavasigi vage lolo valei veuveu lo limei leogoro nona tangaloi vuro gatagale a henana i Julias. Ingeie a tangaloi leogoroi tangaloi vuro vudolue, ingere talo burigi hi ram waregi ve a “Burigi noi Sisa.”

²A aka gatagale u maraga lo vanue Adramitiam mo vanai, siu ngaha mo rarai ve na vano taligu lolo vanue ingere hi Esia. Igamai gam hivo lo aka hi, gam maraga. A tangaloi gatagale ta Masedonia u vanai mei gamai vage, a henana i Aristakas ingeie talo togagi venue lawua hi Tesalonaeka.

³Maraga robongi gam vano dadari lo vanue Saedon. I Julias mo hagavi Bol, mo sireginie mo hage varea lobera nona buluana aie hi, ve ingere ran leo huri vurugeginie.

⁴Igamai gam maraga dena vanue hi taligu ve gan vano nge a langi mo susuni gamai, gam maraga gam vano dorihegi lo tagui venue hi Saebras, a tahi u mesuri aie hi.

⁵Gam toa varea lolo tahi lawua sulawe na vanue Silisia ko Bamvilia siu gam vanai gam dadari lo vanue Lisia lo qatui venue Maera.

⁶Aiehi, a leogoroi tangaloi vuro hi mo haqe na aka gatagale mo maraga Aleksandria, mo vano huri na vanue Itali. Ingeie mo tau gamai sulo aka hi.

⁷Gam toa taligu, gau toa a rani u sao huri a aka hi mo toa rorongo, a langi mo susuni na aka gam haqea u huire huri ve gan hage varea lo vanue Nidas. Nge aie hi a langi u huire mo tugoro gamai, gahe hage lai tea varea. Siu hatie gam toa gam vano lo vanue Krit. Gam toa liliu na singogi a henagi Salmone. Gam toa mo huri na tagui venue hi,

⁸gam toa mo huri na mwararai venue hi varea, nge gam haqea u huire tau. Nge gam vanai gam dadari lo ute gatagale a henagi a Halea Garea, u kakarani lo qatui venue hi Lasea.

⁹Huri gau toa lategi lolo tahi a ranigi u sao beno, a taroi walawalau lo aka u rovo beno, huri mo kakarani a taroi langiue. A rani lawua nora duvi Israel hi a henagi “A Rani huri Vai Vovohoigi na Tangaloi dena nona Galegaleasi” u vano beno. I Bol mo vai lado taligu ginire, mo veve vena,

¹⁰“Retueku. Ineu nam leo ve bataha a asiana lawua vin hogosi gide lo turegide. Bataha u kakarani vohogi vage ve dain vagasalagi na lakolako, mena aka ngaha ko bataha igide vage dain sala.”

¹¹Nge a leogoroi tangaloi vuro hi mo rorongtagi na kapten talo aka hi ko mo rorongtagi na tangaloi hi a nona akagi. Nge he rorongtagi na leoi Bol tea.

¹²A halea hi hatie halea garea ve a aka rain hili aie lo taroi gamwadidi, huri a taro hi a taroi langiue. Giniehi, u sao denire ram tarani ve gan maraga dena halea hi, gan vano huri na halea wagineu hi a henagi Vinikis, tare ve ram vai lei. Ngehi a halea wagineu vage lo vanue Krit, mo tino vovohoi na langi gairue hi a gadue mena waibilage. Ngehi a aka vin mwaso lai aie lo taroi gamwadidi.

¹³A langi mwasaru mo mwalue he lawua lawagi tea. Siu ingere ram lehe ve u tatarise me nora tarani, ram leo ve bataha rain vei lei. Ingere ram revei na vatu ligo, ko ram revei na gabani ko igamai gam mwalue. Gam toa kakarani varea lo mwararai vanue lawua hi Krit.

¹⁴Nge he ribi tea, a langi lawua mo maraga nge na langiue. A langi hi ram wareginie ve a siritano, mo himei lo vanue hi,

¹⁵mo hako bibi na aka hi a qatui aka he eno tea vovohoi na langi. Siu hatie gam siregi na aka hi mo eno mwere hi, nge mo tuli gamai hogosie mo vano.

¹⁶Gam toa kakarani lobei vanue biti hi Kaoda, gam hili mahogi qilodo aie hi, mo bete na taro lawe gamai huri gam revei na botu ta hage namawe huri gam vau bibi vurugeginie. Nge a tangaloi tabana talo aka hi ram gagarasi u liu,

¹⁷huri ram reveie tanamawe. Siu ram taligi na garo lalawua mo hivo lo vavai aka hi, ram vau siaga ginie huri mo hako bibi na aka hi. Ram matagu, huri hage varea lo vanue hi Libia, a tahi he bue tea, ram lado matagu ve vai teu a aka hi mo roro lolo one aie hi. Giniehi, ram torosi na gabani mo hivo, ram siregi a langi hogosie mo susunie mo vano.

¹⁸A langi lawua hi mo huire tau, maraga robongigi gam tuli na lakolako lavasigi lolo aka hi talolo tahi.

¹⁹Lo rani gaitoligi ram tuli na lakolakoi aka hi lavasigi vage talolo tahi.

²⁰A rani u sao gahe lehi na aho tea, ko lolo bongi vage gahe lehi na visiu tea. A langi hi mo huire rorongo tamwere hi he hivo tea. Siu igamai gam lado ve igamai vage gain he mwaso tea.

²¹Lo taro hi igamai doluegi gahe gagani tea huri na rani u sao. Siu i Bol mo labe hage lo nagomai doluegi, mo veve vena, “Retueku. Ve mwere neu rorongtagi na leoku gitomue ve da mese maraga dena vanue Krit, bataha u garea. Bataha a gineu rain he sala tea mwere ngaha.

²²Nge siseri ngaha nein mese matagu. Igide doluegi dain he mate tea, nge a aka ngaha hogosie vin dono.”

²³Ineu a tangaloi noi God nam huduhudu goroe. Lolo bongi, a nona engsel gatagale u vanai lobeku, mo veve vena,

²⁴“Bol goin mese matagu. Goin vano tuturedu goin labe lo nagoi Sisa, lo vanue Rom. Huri God ingeie u garea meigo u liu, ingeie mo havuhevu huri ve a tangaloi ingere hi ram toga lo tanora.”

²⁵I Bol mo veve taligu vena, “Ratueku. Nein mese matagu gena gineu ingere ngaha. Ineu nam lado hogogi God ve a gineu doluegi hi rain vei mwere hi a engsel u vevera laweau.

²⁶Nge gitomuegi a langi ngaha vin susuni na akada ngaha tavarea lo vanue gatagale.”

²⁷A langi lawua hi u wehi gamai u dadari rani hangavulu domwagi gaivesi, mo tuli na aka hi lategi mei gamai mo sigei lolo tahi lawua hi a henagi Mediterenian. Nge lo rani hangavulu domwagi gaivesigi hi lolo livugei bongi, a bosiguru ram lado ve bataha gam hage kakarani varea te logo.

²⁸Ram tuli na garo a gaidume, ram haqe ve a ngava ngavulu gairue. Ram toa qilodo ram tulie taligu, ram haqea ve lategi a ngava hangavulu domwagi gailime hogosie.

²⁹Ram matagu ve vaiteu a aka hi mo tawaga lolo vatu, siu ram tuli na vatu ligo gaivesi lo boroi aka hi. Nge ram tataro ve na rani na siseri.

³⁰A bosiguru talo aka hi ram vai leo ve ran toa dena aka. Ram suri na botui aka hi talolo tahi ram kalire ve ran tuli na vatu ligo vage lo qatui aka hi.

³¹Nge i Bol mo veve lawe na leogoroi tangaloi vuro hi ko ira nona tangaloi vuro vena, “A tangaloi ingere hi rain tino rorongo tamwere hi lo aka. Tare ve hatie mwere hi i God vin he vagamwasoi gimiu tea.

³²Ira tangaloi vuro hi ram rongoe mwere hi ram tai rotohi na garoi botu hi mo soi talolo tahi mo sala.

³³Mo kakarani ve na rani leleo, i Bol mo veve siaga lawera vena nen gagani. Mo veve vena, “Huri a rani hangavulu domwagi gaivesi beno gimiu nem romasi nehe gani na gineu tea vohogi.

³⁴Nam veve siaga lawe gimiu ve nein geni na hinaga. Nein geni huri nein mwaso. Igimiu nein mwaso tabetabegi. A vulumiu gatagale vin he sala lai tea.

³⁵I Bol mo veve mwere hi siu mo lai na bereti mo veve gareagi God lo nagora siu mo vise utuhie mo gani.

³⁶Ingere doluegi ram rong garea, rahe matagu tea ingere ram gagani.

³⁷Gamai lo aka hi vudolue vagarue avigi ngavulu gaibitu domwagi gaiono.

³⁸Gau geni gau guqe u rovo. Siu gam tuli na bagi raisi talolo tahi huri a aka mo mamarae.

³⁹Maraga robongi, ira bosiguru ram lehi na vanue. Rahe ilo tea ve a hava vanue, nge ram lehi na halea ko a one. Ram ladoutu ve ran walaugi na aka na hage lolo one tare ve ram vai lei.

⁴⁰Siu ram tai utu utuhi na garoi vatu ligo hi lo boroi aka hi ram sereginire talolo tahi. Siu ram toro na garoi vohei walaue, ram revei na gabani hi mo eno tomue vohei na langi mo here, mo walaugi na aka, gam toa ve gam hage varea.

⁴¹A aka mo toa mo hage lo mahogi he garea tea, mo roro lolo one, nge igamai lolo buegi tau mosigei. A qatui aka hi u wata u siaga lolo one he gilu lai tea, siu a navo lalawua ram vuri na boroi aka hi.

⁴²A tangaloi vuro ingere hi ram tau na leo ve rain wehi na tangaloi vauveu ingere hi doluegi, ve vai teu ram garu ram hage varea ram toa vohogi.

⁴³Nge a leogoroi tangaloi vuro mo tarani ve vin vagamwasoi Bol, siu hatie mo tugorora ve rain mese vai mwere hi. Siu mo veve lawera tangaloi hi rau ilo na garugeru ve ran qale talolo tahi ran garu na hage varea.

⁴⁴Siu mo veve lawera lavasigi vage ve ran hurire, ran garu lo tawagawagai aka sige a mavusui gaigi tea hi a navo u vurire, ran hage varea, gau vei mwere hi igamai doluegi gau hage varea gam mwaso.