Read East Ambae LALAKOGI 3 Bible Online

LALAKOGI 3 - East Ambae bible

LALAKOGI 3

¹Lo rani gatagale, a taroi tataro, lo matainaho vano, i Bita koi Jon, rom vano lolo valei God.

²Aiehi a tangaloi gatagale he dige lai tea, lune u vora a karune u luku. Nge vataha rani ira nona buluana ram walie ram vanai meie, ram taue lo matai arai valei God, a henagi a mataiara kelakelana. Ko lune nge mo toga mo navunevu mane den rahine ram vano lolo vale gogona hi.

³Lune nge mo lehi Bita tona Jon rom dige ve ron vano lolo valei god, nge mo navunevu denire ve ron bete te gineu lawea.

⁴Bita koi Jon rom leo vano vovohoi na tangaloi hi, Bita mo veve vena, “Gon lehi gamaru.”

⁵Ko nge mo lehire, koi nge mo lado ve roin bete te gineu lawera.

⁶Ingeie Bita mo veve lawea vena. “Hatie gineu meieu ve nai bete lawego, nge a gineu gatagale hogosie a noku ve nai bete lawego. Lo henai Jisas Kraes ta Nasaret, nam veve lawego gon maraga gon dige.”

⁷Koi Bita mo duleie lo matuana vena labe. Nge siserigi a karune mena hariheri nana ram garea.

⁸Ko ingeie mo maraga siserigi mo labe, ko mo dige mo hurire ram vano lolo valei God. Mo dige mo rovorovo hageulu ko mo waregareagi God.

⁹A tangaloi doluegi ram lehe mo dige, ko mo waregareagi God.

¹⁰Lune ram leo hogosi na tangaloi hi ve ingeie hi gesegi mo toga mo navunevu lo matai vale hi a valei God, ingere ram awogi u liu hurie. Ko ingere doluegi ram awogi ko ram rurururugi gina gineu u vei lawe na tangaloi hi.

¹¹Lune a tangaloi ingere hi ram awogi garagara, ram toa ram vanai lobei ngaraha gaitolu hi lo malumelui valei God hi a henagi vea malumelui vale noi Solomon. Aiehi a tangaloi hi mo dule mo siaga lo limei Bita tona Jon.

¹²Lune i Bita mo lehi na tangaloi ngerehi, mo laqa meire, mo veve vena, “Ira duvi Israel, ?Huri havagineu igimiu nem awogi garagara huri na gineu ngaha? Huri havai gimiu nem labe nem lelehuri gamaru mwerehi? ?Bataha nem lado ve guru vagamwasoi na tangaloi ngaha mo dige gina nomaru huireana sibomaru, sige huri vei gamaru a tangaloi gogona, sige a havai? !Io hatie!

¹³God noi Ebraham noi Aesak ko noi Jekob, ko a God noi retubude, ingeie hi u vei na gineu ingere hi. U tabe kalo na henai nona tangaloi tabanagi, Jisas. I Jisas nge tau hi neu teue lo tanoi vevegi, nge gitomuegi i Baelat u veve beno ve vin siregi tabetabeginie, ingeie gimiu nem veve lo nagoi Baelat vena nehe taranie tea.

¹⁴Ingeie Jisas hi nge a tangaloi gogona, ko ingeie a tangaloi vovohoi, ingeie gimiu nehe taranie tea. Ingeie gimiu nem navu dei Baelat vena vai na nomiu tarani, na siregi tabetabegi na tangaloi uebalu.

¹⁵Lo doridorigi hi, gimiu neu wehi na tangaloi a Vui Maso, u mate nge lo tagugi hi, God mo vagamwasoie taligu dena mateana, ko igamai gam veve sere na gineu ngaha huri vea hogo.

¹⁶Ko a huireana talo henai Jisas hi, mo vai vagamwasoi na tangaloi ngaha, mwere nem lehe ko neu iloe beno. A gineu mo vai lawe na tangaloi ngaha a vevenagi igamai gam lado hogo lo henai Jisas. Huri gamai gam lado hogogi Jisas, giniehi, a karune mo garea nge mo dige, mwere igimiu doluegi nem lehe.”

¹⁷Io retueku. Ineu nau ilo vea gineu ingere ngaha neu veire gitomue lawe Jisas, ko ira lawua goro gimiu vage rau veire, ko igimiu doluegi nehe ilo vurugegi na havagineu tea neu veire.

¹⁸Nge ngaha hi a matahala i God u veve rarai gitomue, ram dadari. Lo leo ligoligogi den nona tangaloi ligoligogi rau dadari beno ve i ratahigi vurei vin rong gagarasi lo tarabesine.

¹⁹!Siu igimiu nen ladowenigi nen tudori vano lobei God! Huri ingeie vin lado vohogi na bugumiu.

²⁰Nein vei mwerehi huri God vin bete na huireana garaqa lawe gimiu lolo nomiu domiana. Ko nge vin hora Jisas su lobemiu, ingeie na nomiu Ratahigi Vurei, i God u leo wahea beno.

²¹Ingeie Jisas vin toga lo eulu vin dadari a gineu doluegi rain garaqa taligu, mwerei God u veve beno tuei lawera nona tangaloi veve rarai gogona.

²²I Mosis u veve vena, “A Huqe a nomiu God vin hora na tangaloi serelue gatagale den duvimiu mwereieu, vin vanatu lobemiu. Nein ronghuri vurugegi na gineu doluegi hi nge vin vevera lawe gimiu.”

²³Tare i rahine rahe rorongtagi na leo nona tangaloi veve rarai hi tea, god vin vuro vohoginire dena nona sinobu, ko a tangaloi ngerehi rain sala.

²⁴Io a hogo. Ira tangaloi veve rarai lavasigi vage, u teuvuigi lui Samuel koi ingere hi vage rau vomai lo tagune, ingere doluegi rau veve rarai na leo, huri na rani ingere ngaha.

²⁵A waratau noi God denire nona tangaloi serelue u warataugi huri gimiu, ko a ladobubugi i God u veie beno tuei mei retubumiu, a nomiu vage. A leo i God u teu lawe Ebraham vena, “Ineu nai vei gareagi na sinobu lolo ureure gena duvimu.

²⁶Huri God vin leo wahe na nona tangaloi tabanagi, ko vin horae vonai lawe gimiu gitomue, huri vin veigareagi gimiu, huri vin vei gimiu nen tudori den nomiu galegaleasi.”