Read East Ambae LALAKOGI 4 Bible Online

LALAKOGI 4 - East Ambae bible

LALAKOGI 4

¹Bita koi Jon lune ingere rom laqa mosigei lawera sinobu, ira rugurugu ko a tomtomuegi nora bolis talo valei God, ko meire Sadusi ram vonai kakarani lobera.

²Ram lologagasi garagara gina gaihora gairue hi, huri ingere rom huhuire tangaloi huri vei Jisas u maraga dena mateana, giniehi, mo haharagi hurive a tangaloi rain mate siu rain maso taligu.

³Ram wiribibire, ram taure lolo valei vauveu, roin toga vin dadari lo rani tuegi huri a taro u vano beno.

⁴Nge a sinobu sao rau rongo na nora leo huhui ram lado hogo. A tovoi mwera hogosie hi rau lado hogo, u kakarani teri vagalime.

⁵Lo rani tuegi, ira tangaloi lalawua a duvi Israel meire tamaragai ko ira huhui talo Leo hora noi Mosis, ram vomai bubugi Jerusalem.

⁶Ram bulu mei Anas hi ingeie a muei rugurugu ko i Kaeavas, Jon, Aleksanda, ko a tangaloi lavasigi vage ingere a duvi muei rugurugu ve ron vai na nora Kansel.

⁷Ram lai na gai hora gairue hi ram taure rom labe lolo livugara, ko ram huire vena, “?Neru vei na gineu ngaha wuraha? ?Nerom lalakogi lo huire na noi hine, sige neru lalakogi lo henai hine?”

⁸A Vui Gogona mo hivo lui Bita, ko mo duvi lawera mo veve vena, “Gimiu ira tomtomuegi ko ira tamaragai den duvi Israel.

⁹Gimiu nem hui gamaru vena, neru vei wuraha huri na lalakogi garea ngehi guru veie lawe na tangaloi lukuluku hi u esi mo mwaso.

¹⁰U garea ve gimiu ira lawuagoro doluegi nen ilo, ko a sinobu doluegi a duvi Israel rain ilo vurugegi vage. A tangaloi hi mo lehe a karune u garea beno, lo huireana talo henai Jisas Kraes ta Nasaret. Ngehi gitomue neu totoe lo gai saroutu, ko neu vei vagamatea, nge i God u vagamwasoie taligu dena mateana.

¹¹I Jisas nge hi a Reve reve Gogona hurie vena, ‘A beru ngehi igimiu ira tangaloi hako vale neu tuli vohoginie beno, nge bagataha mo voragi beru hunei vale.’

¹²Nge hatie tangaloi wagineu vage ve vin vagamwasoi gide. Huri lolo ure ngaha i God he bete na hea te wagineu vage ve dai maso lune.”

¹³Ingere talo kansel lawua ram garigi garagara, huri Bita koi Jon rohe matagu tea, huri rau ilo vage huri ve ingere a tangaloi vurogi rohe iloilo tea lawuagi. Nge ingere ram leo hogosire ve gitomuegi ru bubugi mei Jisas.

¹⁴Ko ingere hate nora leo vohogi ve ran veve, huri ram lehi na tangaloi hi a karune u esi nge u garea taligu mo labe meire.

¹⁵Ko ingere ram veve lawera ve ran mwalue dena valei laqana hi. Ko a kansel lawua hogosie ram toga lolo vale ram laqalaqa ginire gahera.

¹⁶?Ram huire taligu vena, dain vei wuraha na garue? Ingere doluegi ta Jerusalem rau ilo beno huri na nora tabanagi lawua hi ru veie. Nge igide dai he vunigi laie tea.

¹⁷Nge u garea ve igide da tugoro na roro hi na mese mwalue taligu lawera tangaloi. Dai veve siaga lawera huri ingere rain mese huhui lo henai Jisas taligu.

¹⁸Ko ingere ram warera sulolo vale taligu. Ko ram veve lawe Bita tona Jon vena. “Neri mese veve sere na henai Jisas, neri mese laqagi lawe na tangaloi ko neri mese huhuire taligu.”

¹⁹Ingeie Bita tona Jon rom duvire vena. “?Igimiu nein leo wahe sibomiu ve ngehilogo u vovohoi lo nagoi God, ve gori ronghuri gimiu sige gori ronghuri na leoi God?

²⁰Huri i gamaru gori he siregi tea, nge gori veve sere na havagineu guru leo gina matamaru ko guru rongo gina qeromaru.”

²¹Ngaraha lo kansel lawua ram gato gorora taligu ko ram sireginire dena valei kot, nge hatie nora huireana ve rain teure lo tanoi vevegi, huri a tangaloi ram hau rorogi na henai God huri na gineu ngerehi rau vei.

²²A tangaloi hi ru vei na vaigivui lune, a karune mo garea, a higaona u liu den ngavulu gaivesi.

²³Lune ram siregi Bita tona Jon rom mwalue, rom vano tuturedu lobei retuara. Ko rom veve serelue na havagineu doluegi lawera hi ira muei rugurugu ko ira tamaragai rau veve.

²⁴Lune ingere ram rongo na leo ngerehi, ingere ram tataro lawe God ram veve vena, “Huqe, iniko gu teu na dodo a tano a tahi ko a gineu lolo ure doluegi.

²⁵Lo huireana noi Vui Gogona a nomu i tubumiu Devet ingeie a nom tangaloi tabanagi, nge u veve serelue na leomu, u veve vena. ?Huri havai ira haroharo ram lolo gagasi garagara? ?Huri havai ram tau na leo ve ran vai na gineu esi, nge rahe vai lei tea?

²⁶Ira ratahigi lalawua talolo ure i ram vai rarai ve ran vai na vuro, ko ira lawua goro ram sonebubugi, ko ve ran vai na bulubuluesi goro na Huqe God, mena nona Ratahigi Vurei.

²⁷A hogo i Herod ko i Bontius Baelat rum toga bubugi lolo qatui venue lawua meire haroharo koa sinobu a duvi Israel ram vai vei Jisas, hi a nomu tangaloi tabanagi gogona ngehi gu veie mo voragi Ratahigi Vurei.

²⁸Ingere hi ram bubuginire ve ran vai na gineu ingere hi doluegi gu leo wahera beno, lo nom huireana ko a tanoi nom domiana ve na eno lune.

²⁹Huqe, gon rongo na leo asi teri ingere ngaha, ram vaivei gamai ginie, ve gon hako mei gamai ira nom tangaloi tabanagi ve gan laqagi na leomu ve a domimiu na huire.

³⁰Gam tiehigo ve gon horagi na limemu, ve gon vagamwasoi re ram sege, ko vage gon bete na nom gigilegi ko a vaigivui teri, ko ve gon vaire ran managi lo henai nom tangaloi tabanagi gogona i Jisas.”

³¹Lune ingere rau tataro u rovo, a vale hi rau sone bubugi lolona mo rurururugi. A Vui Gogona mo hivo mo vagahorongire ko mo vai siagagi na domire ram tau vuigi ram ngasagi na leoi God.

³²Ngere hi rau ladohogogi Jisas a nora domiana ko a leora gatagale hogosie. A tangaloi vin he veve tea ve a gineu a nona gahea. Nge ram siregi na nora hakogineu, ram beteginie vatavataha ginire.

³³Ko gina huireana lawua ira gai hora ram veve serelue na maraga taligu nona Huqe jisas, ko God mo vaigarea ginire doluegi.

³⁴Ingere talo burigi hi gatagale denire he qilodo tea lo gineu. Ingere hi a nora tano lure sige a valera ram sogaginire ram lai na gai voligi,

³⁵ram bete lawera gai hora siu a gai hora ram bete lawe na tangaloi vatavatahagi nire u tatarise mena gineu hi ram qilodo lune.

³⁶A tangaloi gatagale a henana i Josev, nge a duvi livae, u vora lo vanue Saebras. Ira gaihora rau teu na henana tuegi vage vei Banabas, a iloilogi vena. “A tangaloi vai mwamwavigi na domire tangaloi.”

³⁷Giniehi, u sogagi na mahoi tanona siu u bete na gaivoligi lawera gai hora.