Read East Ambae LALAKOGI 8 Bible Online

LALAKOGI 8 - East Ambae bible

LALAKOGI 8

¹Ko i Sol u daragi vage huri ve rani ue vagamatea. Siu mo tauvuigi lo rani hi vovohoi, i Sol meire ram maraga, ram vaivei na warelue ta Jerusalem. Ram vai asiesigi ram livusi na tangaloi noi Jisas ram toa ram vano ram toga lategi lolo vanue Judia ko Samaria. Ira gaihora hogosie ram toga a Jerusalem.

²A tangaloi lavasigi rau ladohogo gi God ram vano ram lai Stivin, ram tuleginie. Ram tangi uliu hurie.

³Nge i Sol mo vaivei na warelue vena vai vohoginire. Mo vano vataha na vale, vena lai vohoginire hi ram ladohogogi Jisas, a mwera ko a vavine, ko mo taure lolo valei vauveu.

⁴A sinobu hi ram ladohogogi Jisas, ram vano lategi ram vano doluegi na vanue, ram veve sere na Roro Garea huri Vagamwasoi.

⁵I Vilib mo hivo lolo togagi vanue lawua gatagale a Samaria, mo veve serelue na leo noi Vagamwasoi lawe na sinobu lolo vanue hi.

⁶Ingere doluegi ram rorongtagi vurugegi Vilib lune ram rongo na leona, ko ram lehi na vaigivui noi God hi mo tabana ginie.

⁷A tamate ram mwalue dena sinobu u sao, nge lo tarogi ram mwalue, ram ulo gina dilogi u lawua. Ko a sinobu a tarabesire duvigi rau mate, ko a karure rau esi nge ingeie mo vaire ram garea taligu.

⁸Ko ingere ta Samaria ram rong garea uliu.

⁹Lolo qatui vanue hi a tangaloi uviuvi managi gatagale a henana i Saemon u tuei beno, nge mo vai na sinobu ta Samaria ram awogi garagara huri na uviuvi managi hi ingeie mo tabanaginie. Mo veve sere ve ingeie a tangaloi lawua.

¹⁰Ko ingere talo vanue hi, mo tauvuigi lo tangaloi vurogi mo dadari lo tangaloi hi rau lalawua, ingere doluegi ram rorongtaginie, ram veve vena “A tangaloi hi a huireana noi God, ingere ram warea ve, ‘I Huireana Lawua.’ ”

¹¹Ingere doluegi ram rorongtagi vurugeginie huri u tuei beno, ingeie mo vaire ram rurururu lo nona uviuvimanagi.

¹²Siu siseri ngaha ingere ram ladohogo gina leo noi Vilib, ngehi nge mo veve sere na Roro Garea lo henai Jisas Kraes, ko a doridorigi hi i God mo voragi Ratahigi goro na nona tangaloi. Lo tarogi hi a mwera ko a vavine doluegi ram ladohogo, ko ram lai na garuhigogona.

¹³Ko i Saemon vage ingeie mo ladohogo. Lo tarogi ingeie mo lai na garuhigogona, siu vataha tarogi ingeie kakarani lobei Vilib. Ko ingeie mo awogi garagara huri na vaigivui ko a gigilegi talo huireana noi God ngerehi i Vilib mo tabanaginie.

¹⁴Lune ira gaihora a Jerusalem ram rongo na rorogi huri ve a sinobu ta Samaria rau ladohogo gina leo noi God beno, siu ingere ram hora Bita tona Jon, ve ron vano lobera.

¹⁵Lune ingere rom vano dadari lobera, ingere rom tataro hurire hi rau ladohogo beno, ve ran lai na Vui Gogona.

¹⁶Huri gitomuegi, ingere rau lei na garuhigogona lo henai Kraes a noda Huqe hogosie, nge a Vui Gogona he hivo tea mosigei lure.

¹⁷Siu i Bita tona Jon, rom tangovire, ko ingere ram bei lei na Vui Gogona.

¹⁸Lune i Saemon mo lehi na gaihora gairue hi rom tangovire lo qature, i God mo bete na Vui Gogona lawera. Ingeie mo lai na mane mo vonai meie lawe garue hi,

¹⁹mo veve vena, “Nam harigi gimiru nero bete na huireana hi laweau vage, huri ineu nam tarani ve nain mebu na limeku lo qatui hine tea ingeie vin lei na Vui Gogona.”

²⁰I Bita mo gato siaga lawea, mo veve vena, “?Gom lado ve goin voli lei na hogogi noi God gina mane? Iniko mena nom mane vi tuli vohoginigo sulolo avi redu.

²¹Iniko gohe tatarise tea me nomai tabanagi. A vevenagi a taqangimu he vovohoi tea lo nagoi God.

²²Goin ladowenigi dena nomu domiana hi rau esi. Ko goin tataro lawe na Huqe huri vin ladovohogi na nom domiana asi ngerehi.

²³Huri ineu nam leo hogosigo a gineu u garagarasigo ko gom toga radu lolo galegaleasi.”

²⁴I Saemon mo veve lawe Bita tona Jon vena, “Nam tiehi gimiru, nero tataro lawe na Huqe hurieu, siu huri a gineu ngerehi nerom vevera rain mese hogosieu.”

²⁵Ko ingere rom matamwasaragi na gineu ngerehi i Jisas u veire, rom waregi sere na leo nona Huqe, siu rom mule taligu a Jerusalem. Lune ingere rom vano lo turegi rom toretore gina Roro Garea lo togagi venue u sao a Samaria.

²⁶Siu a engsel nona Huqe mo veve lawe Vilib vena, “Gon maraga ko gon vano suvegibeo lo duvi turegi hi mo himei den Jerusalem mo hivo lolo vanue Kasa.” A turegi hi mo huri lolo vanue vurogi.

²⁷Ko i Vilib mo maraga mo vano, mo haqe na tangaloi ta Itiopia, rau votae, mo mule. Ingeie a tangaloi lawua mo leogoro na mane nona vavine ratahigi sige a Kades lo vanue Itiopia u hage Jerusalem mo hudu goro God.

²⁸Siu ngaha mo mule taligu lo bulana kat. Lune hi mo toa, ingeie mo valu na buk nona tangaloi ligoligogi i Aesaea.

²⁹Ko a Vui Gogona mo veve lawe Vilib vena, “Gon vano kakarani lobei na kat hi.”

³⁰Siu i Vilib mo toa mo vano lobena mo rongoe mo valu na buk hi a nona tangaloi ligoligogi i Aesaea, mo huie mo veve vena, “?Wa gu ilo na leo hi gum value?”

³¹A tangaloi lawua hi mo duvi lawea vena, “?Ineu nai iloe wuraha sige ve a tangaloi tea na mata-mwasaraginie laweau.” Siu mo ware Vilib mo kalo meie lo bulana kat.

³²A leo lo revereve gogona hi mo valure mwere ngaha mo veve vena “Ingeie mwere na sibsib ngehi ram laie ve ran ue vagamatea. Ingeie u mwere na natui sibsib hi ram bala na vulune he ngara tea. Ingeie he veve na mavusui leo tea vohogi.

³³Rau vaga maemae ginie rau vei bulaginie. A duvine vin hatie, huri u mate utu qetune lolo ure.”

³⁴A tangaloi lawua hi mo veve lawe Vilib vena, “?Gon veve laweau, a tangaloi ligoligogi ngaha mo veve huri hine? ?Hurie sibona, sige huri hine tea wagineu?”

³⁵Siu i Vilib mo laqagi mata-mwasaraginie, mo tauvuigi lo Reve reve Gogona hi, mo laqagi na Roro Garea huri Jisas.

³⁶Lune rom toa mo vano lo turegi rom dadari lo mahoi venue hi a wai aie, a tangaloi lawua hi mo laqa mei Vilib mo vena, “A wai nge ngaha. Sige a havagineu vin vei goroau tau nai he lailei na garuhigogona tea.”

³⁷I Vilib mo veve lawea vena, “Tare ve gom ladohogo siaga lui Jisas, goin leilei na garuhigogona.” Ingeie mo duvi lawea vena, “Nam ladohogo huri ve i Jisas Kraes i Netui God.”

³⁸Ko a tangaloi mo wiribibi na bulana kat mo toga, siu ingere vunu tona Vilib rom masuri rom hivo lolo wai, ko i Vilib mo garuhigogona-ginie.

³⁹Lune ingere rom mwalue dena wai hi taligu, a Vui Gogona nona Huqe mo lai vohogi Vilib denie. A tangaloi he lehe tea taligu. Siu ingeie mo mule lo turegine taligu gina havuhevu u liu.

⁴⁰I Vilib mo vutugegi mo leo haqe ve ingeie lo vanue Asdod, siu ingeie mo vano lo qatui venue doluegi mo toretore gina Roro Garea noi Jisas, mo vano mo dadari Sisaria.