Read East Ambae ROM 11 Bible Online

ROM 11 - East Ambae bible

ROM 11

¹Siu ineu nam hui vena, ?Wa i God utuli vohogi na nona sinobu beno? Hatie vohogi. Ineu siboku a duvi Israel lui Ebraham, a duvi Benjemen.

²I God u leo wahe na duvi Israel ve rain voragi nona sinobu tomue siu ram bei vora, ko ingeie he tuli vohogi nire tea. A hogo, igimiu neu ilo na Reve reve Gogona ngehi Elaeja Ingeie u tataro lawe God ko mo gato sabusebu huri duvi Israel.

³Mo veve vena, “Huqe ingere rau ue vagamate na nomu tangaloi ligoligogi u sao ko rau saogi vohogi na tanoi nomu rugurugu. Ineu a tangaloi ligoligogi gatagale hogosie nam toga. Ko siserigi ngaha ingere ram vaileo ve ran ue vagamateau vage.”

⁴Nge i God u duvi Elaeja mwere hilogo? I God mo veve vena, “Nge ineu nau hako bibi na duvi Israel teri vagabitu ngerehi rahe hudugoro Bal tea.”

⁵Bagataha mo eno tau mwerehi. A sinobu te gaivihe ngerehi i God u leo wahera gina nona domtabetabe lawua.

⁶Ko tare ve u leo wahera gina dom tabetabe lawua hate huri na lalakogi rau veie. Tare ve ingere rain voragi sinobu noi God lo lalakogi hi rau veire, a hogogi noi God lo nona dom tabetabe lawua, hatie ve a hogogi hogo.

⁷Siu u vei mwere ngaha. Hatie huri ira duvi Israel ram vai leo ve ran vovohoi lo nagoi God, ingere rahe vai lei tea, nge ingere hi i God u leowahera rau vovohoi lo nagona. Ingere lavasigi a qature u siaga ko rahe masinge tea ve rain rorongtagi God.

⁸Mwere u uli lo Reve reve Gogona, “I God u bete na dom haroharo lawe na sinobu huri ve ingere rain he ronghogo tea. Ingeie u toqe goro matara huri ingere rain he leo lai tea, ko a qerora huri ingere rain he rogo lai tea mwerehi u eno tuei mo dadari gaqarigi.”

⁹Ko i Devet mo veve vena, “God, gon siregi ve a nora gaganie lalawua na voragi na gai vutuivune, huri rain holi lolona.” God gon siregi ve a nora gaganie lalawua na vaire ve ran soi talolo walu ko ran lai na leo vevegi.

¹⁰God gon vai na matara na dodo huri ingere rain he leo lai tea. God iniko quire gina hakohako mava ve a gaiherera rain tagege tavagi tuei.

¹¹Siu ineu nain hui vena, ?Wa ira duvi Israel rau taturegi ram soi, siu rain he maraga tea taligu? Hatie vohogi. A vevenagi ingere rau galegaleasi i God mo vagamwasoire sinobu ingere hate duvi Israel, huri ve na vaire duvi Israel vena garasire.

¹²Ira duvi Israel, lo nora vai vagasile, a ureure mo lai na vai garea lalawua. Ira duvi Israel, rau vei vagasalagi na gineu gagareagi doluegi, a sinobu ngerehi hatie duvi Israel ram lai na vaigarea lalawua hi. Siu a hogo ingere rain lei na buluiana vin liuliu vage lo tarogi hi ira duvi Israel rain vonai taligu lo bei God.

¹³Siserigi ngaha ineu nam laqa lawe gimiu a sinobu hate duvi Israel, ineu a gai hora lawe gimiu. Ineu mo havusieu gina noku tabana.

¹⁴Ineu nam lado ve lo matahala mwere ngaha ineu nain vei na noku sinobu siboku lavasigi vin garasire huri ingere rain mwaso.

¹⁵I God u rahagi vohoginire duvi Israel, i God mo bulubulu garea meire tangaloi wagiwagineu doluegi lolo ure. Ko lune i God vin bulu garea meire duvi Israel, vin mwerehi ve dau lei na tangaloi hi u mate beno su lo mwasoana.

¹⁶Tare dam hogogi na muei mavusui bereti lawe God, a lovu dolue hi u vei gogonaginie. Tare a gai a goarigi rau gogona, a rangagi rau gogona vage.

¹⁷Siu a gai rivurivu hi a oliv a rangagi lavasigi rau meutu mo vuvu, a rangai oliv mo mwaso lolo labute mo bulu gaoginie lo mataqangogi. Igimiu hi hate duvi Israel neu mwere na gai hi a oliv mo mwaso lolo labute, ko igimiu nem lai na mwasoana talo vui hi a nora duvi Israel.

¹⁸Nge igimiu nei leohuri nein mese leoleo hivoginire hi rau meutu mwere na rangai gei. ?Igimiu nein sage gimiu mwere hi logo? Igimiu neu mwere na rangai gei, a rangai gei he ture lai na goarine tea.

¹⁹Nge igimiu nein veve vena, “Io, a rangagi rau meutu huri mo bete na mahogi lawe gamai.”

²⁰Ngehi a hogo. Ingere rau meutu vohogi a vevenagi, ingere rahe ladohogo tea, siu igimiu nem lai na tanogi vevenagi nem ladohogo. Siu nein mese sage gimiu huri, nge nein matagu.

²¹Tare ve i God mo vevegi na duvi Israel hi rau mwere na rangai oliv hi a gai rivurivu, ingeie vin vevegi gimiu vage.

²²I God u lolo garea ko a dorine u huire vage. Ingeie mo veveginire hi rahe hurie tea taligu. Nge i God mo lolo gareagi gimiu, tare nem vano tuturedu mo huri na nona lolo garea. Tare ve nehe vai tea, vin tei vohogi gimiu dena gai hi.

²³Nge tare ve ira duvi Israel ram ladohogogi God taligu, ingeie vin lei vurugeginire. I God u veilei ve vin teure taligu aiehi rau tino tomue.

²⁴Hate doridorigi ngerehi ve a rangai gei hi a warawarahigi vin bulu bubugi mena gai garea. Ko igimiu hi hate duvi Israel neu mwerena rangagi u tei vohogi dena oliv hi ta lolo labute ko bulugao ginie lo oliv hi a gai rivurivu. Nge ira duvi Israel rau mwerena rangagi u hei lo gai garea, a hogo i God u vei lei ve vin vaga bulure talo bulara gai sibora taligu.

²⁵Retueku, ko ire haqeku, ineu nam tarani ve igimiu nein ilo vurugegi na gineu hogo hi mo toga hiligi, igimiu nein ilo vurugegi huri ve nehe ilo na gineu doluegi tea. I God u vei na duvi sinobu ngerehi a duvi Israel a qature mo siaga, nge i ngehi vin leahi lo tarogi hi a sinobu u sao ngerehi hate duvi Israel rain vonai lobei God.

²⁶Ira duvi Israel ram mwaso lo matahala vin vei mwerehi. Mwere u uli lo Reve reve Gogona vena, “I Vagamwasoi vin vonai den Jerusalem, ingeie vin lei vohogi na gineu esi den rere netui Jekob,

²⁷ko ineu nain vei na noku waratau mena sinobu ngerehi. Lune ineu nain lei vohogi na nora galegaleasi.”

²⁸Ira duvi Israel rahe masinge tea ve rain lei vurugegi na Roro Garea, siu i ngerehi a tavului vuro noi God u vei mwere ngaha huri ve vin bului gimiu hi hate duvi Israel. Nge ira duvi Israel a sinobu leowahe noi God tau mosigei, ko a nona tabetabe u lawua hurire a vevenagi huri na waratau hi u vei lawe retubure

²⁹I God he leahi na domine tea huri na sinobu hi u warera ko a gineu ngerehi u bete lawera.

³⁰Lo taro gatagale igimiu hi hate duvi Israel neu qalo mei God. Nge lune ira duvi Israel rahe masinge tea huri na nona hahagavi, i God mo hagavi gimiu lehire.

³¹Ko siserigi ngaha, lo matahala mwerehi teu, ira duvi Israel ram qalo, ko a hahagavi noi God mo vonai lawe gimiu. Nge a ranigi mo eno ingere rain lei na hahagavi noi God.

³²Huri i God u vei na sinobu doluegi ram toga vau lo nora kalokalo leo siu ingeie vin hagavire doluegi.

³³Io, A gareana noi God u lawua garagara. I God u mataisao garagara ko a nona lolorani u lawua sileti. Hate tangaloi ve vin matamwasaragi lei na gineu ngerehi i God mo domiginire sige vin ilo vurugegi na matahalana.

³⁴Mwere a Reve reve Gogona mo veve vena, “Ihine u ilo na nona huqe, sige ihine u vei lei ve vin veve na leo tureture lawea.

³⁵A tangaloi he bete tea gineu vohogi lawe God huri ve vin soso taligu.”

³⁶Io, huri i God u teu na gineu doluegi, i God u vei na gineu doluegi ram gilu mo huri na dorine. I God u vei na gineu ingere ngaha huri mo huri na nona tarani sibona waregi roroiginie vin tuei. Amen.