Read East Ambae ROM 14 Bible Online

ROM 14 - East Ambae bible

ROM 14

¹Igimiu nein lei vurugegi hine tea hi a nona ladohogo u kekena ta lo nomiu burigi. Siu vage he garea tea ve igimiu nein vuigaro meire huri na nora domiana rau wegineu dena nomiu domiana.

²A tangaloi lavasigi ram ladohogo huri ve u vovohoi huri ve ingere rain geni lei na halai hinaga doluegi. Nge ingere lavasigi a nora ladohogo u kekena, ram ladohogo huri ve u vovohoi meire ve rain geni hinaga rivurivu hogosie.

³Ihine tea mo ilo huri ve u vovohoi huri ve vin geni lei na halai hinaga haro vin mese leomasie hi mo gani na mwasi rivurivu hogosie. Ko a tangaloi hi mo gani na mwasi rivurivu hogosie vin mese lado ve ingeie hi mo gani na halai hinaga haro u esi, a vevenagi i God u lei vurugegi na tangaloi hi.

⁴Igimiu nein he vevegi lei na tangaloi tabana nona tangaloi wagineu tea. A nona lawua goro vin domiginie ve a nona tangaloi tabana mo tabana vurugegi sige hatie. Ko a tangaloi tabana nona Huqe vin tabana vurugegi a vevenagi a Huqe mo hako meie.

⁵A tangaloi lavasigi ram lado ve a rani gatagale u garea dena rani tuegi ko ingere lavasigi ram lado ve a rani doluegi rau tatarise. Ingere rain ilo vurugeginie sibora lolo domire.

⁶Irahine hi ram lado ve a rani gatagale u garea dena rani lavasigi ram vaie mwerehi lawe na Huqe. Ingere hi ram gani na halai hinaga doluegi ram vaie mwerehi lawe na Huqe, ko ingere ram veve garea lawe God. Irahine hi rahe masinge tea huri ve rain geni na halai hinaga lavasigi tea, ram vaie mwerehi lawera huqe. Ingere rain veve garea lawe na huqe.

⁷Siu igide dam mwaso sige dam mate hatie huri gide siboda.

⁸Tare ve igide dam mwaso, dam mwaso huri na Huqe, ko tare ve dam mate, igide dam mate huri na Huqe, igide ira noi Huqe.

⁹A gineuhigi hi i Kraes u mate ko mo maraga taligu huri ve ingere hi rau mate beno ko ingerehi ram mwaso tau rain leo hogosie ve ingeie a Huqe.

¹⁰Siu huri havai igimiu nem vevegi retuemiu sige ire haqemiu lui Kraes? Ko huri havagineu igimiu nem lado ve igimiu neu garea taligu denire? Igide doluegi dain labe lo nagoi God ko ingeie vin vevegi gide.

¹¹A vevenagi u uli lo Reve reve Gogona mo veve vena, “A Huqe mo veve vena a hogo, ineu a togatoga. A tangaloi doluegi rain sisiqeu goroau, A tangaloi doluegi rain veve huri ve ineu i God.”

¹²Igide doluegi dain matamwasaragi na hava lalakogi hi dau veie lawe God.

¹³Giniehi, igide dain siregi dain mese vui veve-vevegi gide gagatagalegi. Igide dain ladoutu ve dain mese vai na gineu tea ngehi ve vin vei na tangaloi ladohogo tuegi sulo galegaleasi.

¹⁴Ineu nau bulu lui Jisas a noda Huqe, ko ineu nau ilo huri ve a hinaga doluegi rau vovohoi ve dain geni. Hatie halai hinaga tea ve vin vei soloragi na tangaloi lo nagoi God. Nge tare ve a tangaloi lavasigi ram lado ve a hinaga vin vagasolora ginire lo nagoi God, vin eno mwerehi lawera.

¹⁵Tare gom vagaromasigi tuemu, sige i haqemu lo nona ladohogo lo gineu hi gom gani. Iniko gohe huri na matahalai tabetabe tea. Iniko goin mese makaragiana ladohogo noi hine tea lo hinaga gom gani ngehi ingeie mo lado ve he vovohoi tea, vevenagi i Kraes u mate hurie.

¹⁶Iniko goin mese vaie ve a havagineu hi gom lado ve u garea, vena voragi tanoi leo lawe na tangaloi wagineu rain veve huri ve a gineu hi he vovohoi tea.

¹⁷A hinaga ko a inuinugi he eno hage liu tea lo nagora tangaloi hi i God mo ratahigi gorora. A tangaloi ngerehi i God mo ratahigi gorora, a Vui Gogona mo dedeginire a dorire ram vovohoi, ram toga lo tamwata, ko a domire mo horo gina havuhevu.

¹⁸Ihine tea mo tabana lawe Kraes mo toga lo matahala mwere ngaha mo vai God mo rongarea ko a tangaloi wagineu rain lologarea ginie.

¹⁹Siu igide da vai leo ve da vai na gineu ngehi vin lei na tamwata ko ve da vui bulubului gide gagatagalegi.

²⁰Igimiu nein mese siregi ve a hinaga nem gani ve vin vei makaragiana tabana noi God. A hinaga doluegi rau garea huri ve dain geni, nge he garea tea ngehi dam gani na hinaga ngehi mo vai na tangaloi tuegi mo vano sulo galegaleasi.

²¹Nge u mala garea ve igide dain mese gani bigi sige dain mese inu waen sige dain mese vai na havagineu tea tare ve vin vei tuada sige i haqeda vin soi sulo galegaleasi.

²²A nomiu ladohogo lo gineu ingere ngaha, mo eno hiligi lumiu ko mei God, ko tare ve igimiu nem huri na doridorigi hi nem leo huri ve u vovohoi, ko lolo domimiu nem rongoe ve nehe vai vagasilegi na gineu tea, igimiu nein hevuhevu.

²³Nge tare ve igimiu nem lado gairue lo gineu hi nem gani i God vin vevegi gimiu lune lo taro hi nem ganie, a vevenagi nehe ladohogo tea ve u vovohoi. A havagineu tea hi mo vai tavala varea den ladohogo, i ngehi a galegaleasi.