Read East Ambae ROM 16 Bible Online

ROM 16 - East Ambae bible

ROM 16

¹Ineu nam veve lawe gimiu ve i haqeda Vibe ingeie a vavine mo bului tabana lolo warelue lo qatui venue Kengkria.

²Ineu nam navu dein gimiu ve nein lei vurugeginie lo henai Huqe lo matahala mwerehi ve a sinobu noi God rain vei. Igimiu nen buluie lo havagineu tea hi mo tarani, a vevenagi ingeie u buluieu ko a sinobu wagineu vage.

³Ineu nam hora na noku rongarea lawe Aqila tona gahorana Brisila ingere hi ru tabana bubugi meieu lo henai Jisas Kraes.

⁴Ko huri ru lado bulegi na mwasoara huri ve roin vagamwasoieu. Ineu nam veve noku harigiana lawera, hatie ve ineu hogosie, nge a warelue doluegi hi a nora tangaloi tavala varea den duvi Israel ingere ram rongarea vage

⁵Vage a noku veve garea lawe na warelue hi ram sonebubugi lo valera. Noku veve garea lawe na noku buluiana i Epenetus, ingeie a muei tangaloi dena qatui venue Esia mo huri Kraes.

⁶Noku veve garea lawe Meri hi, u tabanagi garagaragi huri na nomiu gareana.

⁷Noku veve garea lawe Andronikus ko i Junia, ire havaku hi rau toga meieu lolo valei veuveu. Ingere a gaihora garea. Ingere rau ladohogo lui Kraes tomue denieu.

⁸Noku veve garea lawe Ampliatas, a noku buluiana lo bulu gatagale nona Huqe.

⁹Noku veve garea lawe Obanas, a tangaloi tabana u tabana bubugi meieu lo tabanagi noi Kraes. Ko veve garea lawe na noku buluana i Stakis.

¹⁰Noku veve garea lawe Abeles huri ingeie u vano turu na gagarasi gineu rau esi ko mo vosangie huri ve a hogo, ingeie mo tabe Kraes. Noku veve garea lawe rahine ram toga lolo valei Aristobulas

¹¹Noku veve garea lawe Herodion i gamaru ta lo vanue gatagale. Noku veve garea lawera hi ram toga lolo valei Nasisas ram lado hogo gina Huqe.

¹²Noku veve garea lawe Trivina ko i Trivosa, a vavine gairue hi ru tabana garagaragi lawe na Huqe. Noku veve garea lawe na noku buluana garea i Bosis, ingeie vage u tabana garagaragi lawe na Huqe.

¹³Noku veve garea lawe Ruvus, a tangaloi tabana, u labe lue lo tabana nona Huqe, ko lawe ratahine, mo vaie huri ve i netune ineu vage.

¹⁴Noku veve garea lawe Esinkritas, i Vilekon, i Homes, i Batrobas, i Homas, ko ira reretehigi doluegi hi ram bubugi bulu.

¹⁵Noku veve garea lawe Vilolokas, ko i Julia, i Nereas, ko i haqena ko i Olimbas. Ko lawe na sinobu noi God doluegi ngerehi ram bubugi bulu.

¹⁶Igimiu nen lai vurugegi gimiu gagatagalegi gina sungsunguni Gogona. A warelue noi Kraes doluegi ram hora nora veve garea lawe gimiu.

¹⁷Retueku ko irehaqeku, ineu nam navuhi gimiu ve nein leo huri rahine hi ram vai na vile wahe ko ram vai na ladohogo nora sinobu ram soi. Ingere ram qalo goro na leo huhui hogo ngehi neu leie, siu igimiu nein tino vagahao denire.

¹⁸A tangaloi mwerehi rahe tabanagi tea lawe na Huqe i Kraes, nge ram vai na gineu mo huri na nora tarani sibora. Ingere ram gato sagesagera, a nora leo rau lulumu, ko ram kalikeli, ram rogegi na domire tangaloi ngerehi hatie iloilora lure.

¹⁹Ira ladohogo doluegi ram rongo huri ve igimiu nem labe siaga lo leo garea. Siu ineu nam havuhevu a vevenagi igimiu. Nge nam tarani ve nein mataisao lo gineu hi rau garea ko nein mese rogegi na domimiu lolo gineu hi rau esi.

²⁰Ko i God hi a noda vui tamwata, vin he ribi tea vin qoragi Setan lo vavai kerumiu. A hogogi nona Huqe i Jisas na toga mei gimiu.

²¹I Timoti mo tabana bubugi meieu, mo hora na nona veve garea, i Lusias, Jeson ko i Sospeta, ire havaku.

²²Ineu Totias nau uli bibi na leo noi Bol lolo leta ngaha ngehi i Bol u vevera. Nam hora na noku veve garea lawe gimiu lo henai Huqe.

²³I Kaeas mo lai vurugegieu ko a warelue doluegi ram sone bubugi lo valena, ingeie mo hora na nona veve garea lawe gimiu. I Erastas, ngehi a tangaloi leogoro mane lawe na togagi venue lawua, ko i tuada i Qatas lui Kraes rom hora na nora veve garea lawe gimiu.

²⁵Waregi roroi gi God. Ingeie u vei gimiu nem labe mo siaga lo nomiu ladohogo, mo huri na Roro Garea hi nau toretore ginie lawe gimiu huri Jisas Kraes. A roro huri Kraes a gineu hiligiana ngehi u toga hiligi huri na higao saosao tuei nge hibagataha mo sereluae.

²⁶U vei matamwasaragi lo revereve nora tangaloi ligoligogi. Ko gina Leohora noi God hi mo toga vagi tuei mo sereluae lawe na vanue doluegi, siu huri ve ingere doluegi rain ladohogo ko rain rong huri.

²⁷Lawe na God gatagale hogosie, ingeie hogosie u mataisao, waregi roroi ginie lo henai Jisas Kraes vagi tuei! Amen.