Read East Ambae ROM 4 Bible Online

ROM 4 - East Ambae bible

ROM 4

¹I Ebraham ingeie gatagale den duvi retubude ?Gide dain veve wuraha hurie? ?A nona lado hikehike huri na ladohogo u mwerehilogo?

²Tare ingeie u vovohoi lo nagoi God lo gineu ngerehi u veire nase vai ingeie vin sagea huri. Nge ingeie vin he sagea lai tea lo nagoi God.

³Huri a Reve reve Gogona mo veve vena, “I Ebraham u ladohogogi God, a vevenagi a nona ladohogo i God mo lai vurugeginie huri ve ingeie a tangaloi vovohoi.”

⁴A tangaloi mo vai na tabanagi garea, mo lai na gaivoli hurie. A gai voli hi, he mwere na hogogi tea. A gaivoli hi, a tangaloi u vei na tabana rau huire huri ve vin leie.

⁵A tangaloi he vai lei na tabanagi tea ve vin veie ve vin vovohoi lo nagoi God, nge mo ladohogo huri ve i God mo vaire tangaloi galegaleasi ram vovohoi lo nagona, i God mo bete na hogogi lawea lo matahala mwerehi. I God mo leo ve ingeie u vovohoi lo nagona a vevenagi a nona ladohogo.

⁶I Devet u veve na gineu mwerehi teu, huri ve i God mo lehi na tangaloi ve u vovohoi lo nagona, hatie lo tabanagi u veie, nge lo nona ladohogo, a tangaloi hi vin hevuhevu.

⁷“U veve vage vena, a sinobu ngerehi i God u lado vohogi na bugure ko mo galuvegi na nora galegaleasi ingere rain hevuhevu.

⁸Havuhevu lawe na tangaloi ngehi i God he valu velu tea bugugi huri na nona galegaleasi.”

⁹A tevegigilegi ngaha hi i Devet mo laqagi hurie, ?Wa mo eno lawera hi rau lei na tevegigilegi hogosie?” Hatie, nge mo eno lawera hi rahe lai na tevegigilegi tea vage. Igamai gau laqagi na Reve reve Gogona, “I Ebraham u ladohogo lui God, ko a vevenagi huri na nona ladohogo, i God mo lai vurugeginie ve u vovohoi.”

¹⁰?A gineu ngaha u vei tagaha? U vei tomue sige lo tagugi lune hi u lei na tevegigilegi? Tomue, hatie atagu.

¹¹I Ebraham u lei na tevegigilegi mo haharagi huri ve ingeie u vovohoi lo nagoi God tomue siu mobei lei na tevegigilegi. Siu i Ebraham ingeie a tama lawe rahine doluegi hi rau ladohogo nge rahe lai na tevegigilegi tea ingeie vage a tama lawe rahine doluegi hi rau ladohogo ngehi i God u lei vurugeginire ve rau vovohoi lo nagona.

¹²Nge i Ebraham vage a tama lawe gide hi dau lei na tevegigilegi beno. Ko dam toga mo huri na ladohogo ngehi i tamada Ebraham u toga lune tomue siu mobei lei na tevegigilegi.

¹³I God u vei na nona waratau mei Ebraham ko meire duvine, huri ve a ureure doluegi vin voragi nora. A waratau u vei hatie huri hi ve i Ebraham u ronghuri na Leohora. Nge a vevenagi a nona ladohogo ngehi mo vaie mo vovohoi lo nagoi God.

¹⁴Nge tare ve a sinobu ram lai na gineu ngerehi i God u waratau ginire, tare lo domianagi huri ve ingere ram huri lo leo mwerehi a Leohora mo tarani, siu a ladohogo hatie iloilogi lune. Ko a waratau noi God hatie mavanagi lune, hatie gineu lune.

¹⁵A vevenagi hi a Leohora mo vai na lologagasi hogosie. Nge ve mwere a Leohora hatie, sevai hatie gineu huri ve dain kalokalo leo lune.

¹⁶Siu a sinobu ram lai na waratau noi God lo nora lado hogo. U vei mwere ngaha huri a waratau hi vin voragi hogohogo vurogi lawe na tangaloi. Siu huri ve ira netui Ebraham doluegi rain lei na waratau hi. Hatie lawe rahine ram toga lo vavai Leohora noi Mosis hogosie, nge lawe rahine doluegi hi ram toga lo ladohogo, mwerei Ebraham nge hi igide doluegi i tubude.

¹⁷Mwerehi u uli lo Reve reve Gogona vena, “Ineu nam vaigo goin voragi na tama lawe na vanue u sao.” Nge ngaha a hogo tomue i God, a God ngehi i Ebraham u lado hogo lune, ingeie a God hi u bete na mwasoana lawera hi rau mate beno ko a nona leo mo vai na gineu ngehi he eno tea tahi

¹⁸I Ebraham he lado tare tea vohogi ve i renetune vin sao. Nge i Ebraham u lado hogogi God ko mo labe tuturedu lo nona ladotare, ko ingeie a tama lawe na vanue lalawua u sao. Mwerehi God u veve lawea vena, “A duvimu vin sao ve a tangaloi vin he valu leire tea.”

¹⁹I Ebraham a higaona u kakarani ve na vudolue, u tamaragai vohogi huri ve vin vagavora renetune, ko i Sera u tubui ve vin he bava lai na maresu tea. I Ebraham mo ladolado lune, nge a nona ladohogo lui God he wiriwiri tea.

²⁰Ingeie u labe siaga lo nona ladohogo, ko he lado gairue tea gina waratau noi God, a nona ladohogo u horo gina huireana, ko ingeie u waregareagi God.

²¹I Ebraham u rongo utu lolo lolona huri ve i God u vei lei ve vin vei na gineu ingere hi u waratau ginire

²²Siu,” I God mo lai vurugegi Ebraham lo nona ladohogo, ko a ladohogo hi mo vaie mo vovohoi mei God.

²³A leo ngerehi mo veve ve, “I God u lei vurugegi Ebraham huri ve ingeie u vovohoi, a revereve hi hatie lawe Ebraham hogosie.”

²⁴Nge a revereve hi mo eno lawe gide doluegi vage, i God vin lei vurugegi gide ve dau vovohoi, igide hi dam ladohogo ginie ve ingeie u vei ragasi Jisas a noda Huqe dena mateana.

²⁵I God u sireginie ve na mate a vevenagi a bugude, ko mo ragasie taligu sulo mwaso hurive vin vei gide dain vovohoi lo nagoi God.