Read East Ambae ROM 5 Bible Online

ROM 5 - East Ambae bible

ROM 5

¹Siu siserigi ngaha u vei gide dam vovohoi lo nagoi God lo noda ladohogo. A tamwata noi God mo toga mei gide lo henai noda Huqe Jisas Kraes.

²Nge hi u lei gide dam ahu sulo vai garea talo hogogi noi God nge hi mo vai gide dam rongarea. Ko igide dam havu hevu a vevenagi igide dam ladotare ve dain bulu mei God lo nona roroa.

³Lune a gineu esi ram hogosi gide, igide dain hevuhevu huri na gineu esi hi mo vai gide dam labe mo siaga, ko mo vai gide dam rongribi.

⁴Lune igide dam rongribi, dam lai na doridori garea. A doridori garea hi mo bete na tarantare lawe gide.

⁵A lado tare vin he vaga maemaegi gide tea, a vevenagi i God u lingi na nona dom tabetabe sulo lolo loloda lo managi noi Vui Gogona ingeie a hogogi noi God lawe gide.

⁶Lune igide dahe bului lei gide te siboda, i God u leo wahe na taro gatagale ve i Kraes vin mate hurire tangaloi rahe vovohoi tea.

⁷U mala gona huri ve a tangaloi vin mate lai huri na wai tangaloi. Bataha a tangaloi tea ve vin vei lei vena mate huri na tangaloi garea.

⁸Nge i God u haharagi na nona tabetabe lawua huri gide lo matahala mwere ngaha. I Kraes u mate huri gide lune dam toga mosigei lo noda galegaleasi.

⁹Siu igide dain mwaso dena lolo gagasi noi God lui Kraes hogosie, a vevenagi igide dam vovohoi lo nagoi God gena dai Kraes ko a nona mateana.

¹⁰Lune igide dau tino mwerena nona tavului vuro, ingeie u vei buluana mei gide lo mateana noi netune. Nge ngaha a hogo, igide dam voragi nona buluana, ingeie vin vaga mwasoi gide gena mwasoai netune.

¹¹Ko hate hogosie hi, nge siserigi ngaha igide dam havuhevu lui God lo henai Jisas Kraes. Lui Kraes hi igide dam voragi buluana noi God taligu.

¹²Siu a galegaleasi u vonai lolo ure lo lalakogi noi tangaloi gatagale, ko gina galegaleasi hi a mateana mo vonai. Giniehi, a tangaloi doluegi rain mate, a vevenagi ingere doluegi rau galegaleasi.

¹³A galegaleasi u eno lolo ure tomue siu a Leohora noi Mosis mo bei vonai. Nge i God he valu velu te bugui nora galegaleasi, huri a Leohora he vai te mo sigei.

¹⁴Nge lo taro i Adam mo dadari lo taroi Mosis, a tangaloi doluegi rain mate, hate huri ingere rahe galegaleasi tea lo matahala mwere hi Adam u veie, lune u lalakogi vagasile lo tau leo noi God.

¹⁵A hogogi tabetabegi noi God he mwere na galegaleasi noi Adam tea. A sinobu u sao ram mate a vevenagi a galegaleasi nona tangaloi gatagale. Nge a hogogi noi God u lawua sileti, a tangaloi ram lai na hogogi noi God lo dom tabetabe lawua nona tangaloi gatagale, i Jisas Kraes.

¹⁶Siu lo tangaloi hi i Adam u galegaleasi, u lei na leo vevegi. Nge a hogogi noi God u wegineu. A hogogi tabetabegi noi God u vonai lo tagui galegaleasi u sao, ko mo vai na tangaloi ram vovohoi lo nagoi God.

¹⁷Ko a galegaleasi nona tangaloi gatagale hi, a mateana mo mamalu goro na tangaloi doluegi a vevenagi a tangaloi gatagale hi. Nge siserigi ngaha a sinobu ngere hi rau lei na hogogi noi God ko a nona hogohogo tabetabegi, ingere ram vovohoi lo nagoi God. Ingere rain lei na mwasoana hogo ko rain huqegi lo henai Jisas Kraes.

¹⁸Siu mwere hi, a tangaloi doluegi rain lei na leo vevegi a vevenagi a galegaleasi noi Adam. Nge i God u lei vurugegi gide ko mo bete na hogogi mwaso lawe gide lo gineu gagareagi ingere hi i Kraes u veire.

¹⁹A tangaloi u sao ram galegaleasi a vevenagi a tangaloi gatagale u kalokalo lo leoi God, a tangaloi gatagale u rong huri God, ingeie vin vei na tangaloi u sao rain vovohoi lo nagona.

²⁰A Leohora u vonai huri ve vin vei na galegaleasi vin esi vin liu. Nge lune a galegaleasi mo asiesi lawua, a tabetabe noi God mo mauri mo hage hage vage.

²¹A galegaleasi mo vai na mateana vena mamalu goro gide, nge i God u bete na nona hogogi lawera tangaloi huri ve a hogogi hi vin huqegi lo mwasoara, ko vin veire rain vovohoi lo nagona. Ko nge ngaha vin lei na mwasoana tavagituei lo henai Jisas Kraes a noda Huqe.