Read East Ambae ROM 6 Bible Online

ROM 6 - East Ambae bible

ROM 6

¹?Siu igide dain vei wuraha? Wa dain vano tuturedu lo galegaleasi huri God vin bete na nona hogogi lawe gide?

²!Hatie vohogi! Igide dau mate lo galegaleasi tatuei, ?Siu igide dain vano tuturedu lo noda galegaleasi mwerehilogo?

³?Wa neu geluvegi ve igide doluegi ngaha dau voragi na rosorosoi Kraes lune dau lei na garuhigogona? Igide dau bulu lo nona mateana lune dau garuhigogona.

⁴Lune dam lai na garuhigogona, mo tulegi bubugi gide meie, dam bulu gatagale meie lo nona mateana. Siu mwerehi, i Kraes u maraga taligu lo huireana noi Mama, igide vage dain toga lo mwasoana garaqa.

⁵Siu igide dau bulu bubugi meie lo noda mateana mwerehi ingeie u mate, ko ngaha igide dain maraga taligu dena mateana, mwere hi ingeie u maraga taligu.

⁶Ko igide dau ilo huri ve a mwasoada tatuei hi u mate bubugi mei Kraes lo, nona gai saroutu huri na noda galegaleasi vin he huire te lai ve na huqegi goro gide, siu igide dain he toga vau tea lo galegaleasi.

⁷Lune igide dam mate, dam mariqe dena huireanai galegaleasi.

⁸Tare ve dam mate mei Kraes, igide dam ilo vage ve dain mwaso meie.

⁹Siu i Kraes u maraga taligu dena mateana, igide dau ilo huri ve vin he mate lai tea taligu. A mateana vin he qoragi laie tea

¹⁰Io, lune i Kraes u mate, u mate huri ve vin qoragi na huireanai galegaleasi vagatagale hogosie, u tatarise mena taro doluegi. Siserigi ngaha ingeie mo toga lo mwasoana garaqa, ko a nona mwasoana garaqa hi mo toga mei God.

¹¹Siu lo matahala mwerehi, igimiu nein lehi gimiu taligu sibomiu ve igimiu neu mate lo huireanai galegaleasi, ko nem mwaso mei God lui Jisas Kraes.

¹²Siu nein mese siregi ve a galegaleasi vin huqegi goro na mwasoamiu lo ure huri ve goin vei na gineu ingere hi a nomu taratarani esi mo taranie.

¹³Nein mese siregi na tarabesimiu ve na vai na galegaleasi, mwere lo gineu ingere hi rau esi. Nge igimiu neu siregi gimiu lawe God mwere na sinobu ingere hi rau mate ko siserigi ngaha ingere ram mwaso. Nen siregi na tarabesimiu lawe God ve na vai na gineu rau garea.

¹⁴A galegaleasi vin he huqegi goro gimiu tea a vevenagi igimiu nehe toga tea lo vavai Leohora, nge nem toga lo vavai dom tabetabe lawua noi God.

¹⁵?Siu igide dain vei mwerehilogo? ?Wai gide dain galegaleasi huri hi dahe toga tea lo vavai Leohora, nge dam toga lo vavai dom tabetabe lawua noi God? !Hatie vohogi!

¹⁶Igimiu neu ilo vurugegi huri neu siserigi gimiu sibomiu mwere na tangaloi tabana vurogi ve na ronghuri hine tea, siu a hogo igimiu a tangaloi tabana vurogi lawe na tangaloi hi. Igimiu nein huri na galegaleasi, ngehi a mwasigi a mateana talo Vui sige a ronghuri, a mwasigi nge hi a tangaloi ram vovohoi lo nagoi God.

¹⁷Tuei igimiu neu tabana vurogi lawe na galegaleasi, a galegaleasi u huqegi goro gimiu. Nge a veve garea lawe God, huri neu tabe vurugegi na Leohuhui huri na gineu ingere hi u betera lawe gimiu.

¹⁸Siu igimiu neu meriqe dena galegaleasi, ko siserigi ngaha igimiu a tangaloi tabanagi lawe na gineu garea.

¹⁹Ineu nam vai na mataleleogi ngaha a vevenagi u gona huri ve igimiu nein rongo hogosie. Tuei igimiu neu siregi na tarabesimiu ve na tabanagi vurogi lawe na galegaleasi ko a gineu rau esi, nem toga huri na asigi hogosie, siu lo matahala mwere tau hi igimiu nein siregi gimiu sibomiu ve nein tabana vurogi lawe na gineu garea.

²⁰Lo taro tuei igimiu neu tabana vurogi lawe na galegaleasi, ko a gareana he huqegi goro gimiu tea.

²¹Igimiu neu vei na gineu rau esi, ko siserigi ngaha igimiu nem maemae huri. A gineu ingere hi a mateana lure.

²²Nge siserigi ngaha igimiu neu meriqe dena galegaleasi ko igimiu ira tangaloi tabanagi noi God. A mwasoamiu doluegi neu betera lawe God, a mwasigi nge hi a mwasoana tavagituei.

²³Lune a sinobu ram galegaleasi ram lai na gaitawe nge hi a galegaleasi mo betea, a gaitawe hi a mateana. Nge i God a nona hogogi lawe gide nge hi a mwasoana tavagituei lui Jisas Kraes a noda Huqe.