Read East Ambae ROM 7 Bible Online

ROM 7 - East Ambae bible

ROM 7

¹Retueku ko i rehaqeku, igimiu doluegi neu ilo na Leohora noi mosis. Siu igimiu neu ilo vage ve a Leohora mo mamalu goro na sinobu lo taro hi ram mwaso tau mosigei.

²A mataleleogi mwere ngaha, a vavine u legi vin toga gogona mei tamai netune lo tarogi hi mo mwaso. Nge tare ve i tamai netune mo mate, ingeie he toga vau tea lo tauleo huri na lagiana.

³Nge tare ve a vavine mo lagi mena mwera wagineu lo taro hi i tamai netune mo mwaso mosigei, tauleo hi mo veveginie huri ve u vagasile. Nge tare ve i tamai netune mo mate, ingeie u meriqe dena tauleo huri na lagiana. Siu tare ve a vavine hi mo lagi mena mwera wagineu, ingeie he vagasile tea lo tauleo huri na bakabaka.

⁴Siu lo matahala mwere hi, retueku ko i rehaqeku igimiu neu mate, ko nem mariqe dena tauleo lo tarabesi Kraes. U vei mwere ngaha huri igimiu nein toga lo vavai tangaloi wagineu. A tangaloi i Jisas nge hi u maraga taligu dena mateana, ko huri ve igide dain tabanagi lei lo tabana noi God.

⁵Tuei lune igide dau toga lo doridorinai tangaloi hogosie. A tauleo hi mo vai gide dam tarani garagaragi na gineu esi ingere hi a domide mo taranire, giniehi, a lalakogi mwere hi mo tomuegi gide sulo mateana.

⁶Tuei a tauleo u wiribibi gide mwere na tangaloi hi ram toga lo garo vauveu, nge a doridori tatuei hi u mate, igide dam mariqe dena tauleo hi. Siu siseri ngaha igide dam tabana lawe God lo matahala garaqa mena Vui ko hate lo tauleo tatuei hi rau uli bibire

⁷Bataha igimiu nem lado ve ineu nam veve huri ve a tauleo mena galegaleasi ingere a gineu gatagale. Nge hi hatie hogo. Nge a tauleo a matahala hogosie mo vaieu nam ilo na domianai galegaleasi, ineu nain he ilo na iloilogi tea huri ve nain vei huri na gineu nona tangaloi wagineu, ve mwere a tauleo he veve tea vena, Goin mese vai huri na gineu noi rehavamu.

⁸Nge a vevenagi a Leohora hi, a galegaleasi mo haqe na turegi ve na hibi raga na taratarani esi doluegi lolo loloku. Ko tavala varea dena Leohora a galegaleasi hatie nona huireana. Tavala varea dena Leohora, a galegaleasi a gineu mategi.

⁹Ineu nam mwaso tavala varea dena Leohora, nge lune a Leohora u vanai a galegaleasi mo tavuigi mo mwaso.

¹⁰Siuineu nau mate. A Leohora hi huri ve vin lei na mwasoana, nge mo bete na mateana.

¹¹Lo Leohora hi, a galegaleasi mo haqe na matahala ve na kalieu ko na uevagamateau.

¹²Siu a Leohora u gogona, ko a Leohora mo veve u garea, u vovohoi ko u garea.

¹³?Wa ngaha a iloilogi huri ve a gineu garea mo bete na mateana laweau? Hatie, nge a galegaleasi mo dorigi na gineu nge hi u garea vena bete na mateana laweau? Mo vai mwere ngaha huri ineu nain leo vurugegi na galegaleasi ve u mwere na havai. A Leohora mo domiginie vena haharaginie huri ve a galegaleasi u esi garagara.

¹⁴Igide dau ilo huri ve a Leohora a gineu talo Vui, nge ineu hatie talo Vui huri a galegaleasi mo huqegi goroau mwere ve ineu a nona tangaloi tabana vurogi.

¹⁵Ineu nahe ilo vurugegi na gineu tea ngerehi nam vaire. Nahe vai na gineu tea ngerehi nam tarani ve na vaire.

¹⁶Siu tare ve ineu nahe tarani tea ve nain vei na gineu esi ngerehi nau veire, ngehi a iloilogi hurive nam lado bubugi mena Leohora huri ve u garea.

¹⁷Nge hate hogo ve ineu nam vai na gineu esi ingere ngaha, a galegaleasi hi mo toga luku ingeie hi mo vai na gineu ingere ngaha.

¹⁸Io, ineu nau ilo vurugegi ve a gineu garea he toga te luku. Nam veve mwere ngaha ve a gineu garea he toga te luku a vevenagi nam toga lolo urei galegaleasi. Ineu nam tarani ve nan vai na gineu ngerehi rau garea, nge nahe vaire tea.

¹⁹Ineu nahe vai na gineu garea tea ngerehi nam tarani ve nain veire, nge nam vai na gineu esi ngerehi nahe tarani tea ve nain veire.

²⁰Tare ve nam vai na gineu ngerehi nahe tarani tea ve nain veire, siuineu nahe vaire tea. Nge a galegaleasi hi mo toga luku mo vai na gineu ngerehi.

²¹Ineu nau lado hikehike lo Leohora ngaha, lune nam tarani ve na vai na gineu garea, a galegaleasi nge tahi mo toga meieu.

²²Lolo domiku, ineu nam havuhevu mena Leohora noi God.

²³Nge ineu nam lehi na tau leo tuegi mo tabana meieu ngehi mo vuro lolo domiku. A tauleo ngaha mo qoragi na vuro. Mo vaieu nam voragi tangaloi tabana vurogi lawe na galegaleasi hi mo toga lolo loloku.

²⁴Ineu a tangaloi toga hahagavi? Ihine vin vagamwasoieu dena tarabesigi ngaha mo bete na mateana laweau?

²⁵Ineu nam veve gareagi God huri u vagamwasoieu lui Jisas Kraes noda Huqe. Siu lolo domiku ineu a tangaloi tabana vurogi lawe na Leohora noi God, nge lo noku galegaleasi siboku, ineu nam voragi tangaloi tabana-vurogi lawe na tauleo nona galegaleasi.