Read East Ambae ROM 8 Bible Online

ROM 8 - East Ambae bible

ROM 8

¹Siserigi ngaha a leo vevegi hatie lawe rahine ram toga lo bulu gatagale mei Jisas Kraes.

²Huri a huireana talo Vui mo lai na mwasoana lo bulu gatagale mei Jisas Kraes lawe gide. Mo vaieu nam mariqe dena huireanai galegaleasi ko a mateana.

³A Leohora noi Mosis vin he vaga mwasoi lai gide tea, a vevenagi a doride tangaloi u galegaleasi. Nge i God u teu na matahala wagineu huri ve vin vagamwasoi gide. Ingeie u hora netune gatagale vohogi lo tarabesi tangaloi mwere igide, hogosie igide a tarabeside u galegaleasi. I God u vei vohogi na galegaleasi ngehi u gagau bibi gide, giniehi, mo siregi netune mo voragi na rugurugu huri na noda galegaleasi.

⁴Ingeie u veie mwere ngaha huri ve vin vagahorongi na taraniana ngehi a Leohora u taranie. Siserigi ngaha igide dahe toga tea lo noda galegaleasi, nge dam toga mo huri na taraniana nona Vui.

⁵Irahine hi ram toga mo huri na nora galegaleasi ngehi a domire mo taranie. A domire u virigi siaga lo doridori esi hi. Nge irahine hi ram vai na gineu garea ngerehi a Vui Gogona mo tarani a domire mo virigi siagagi lo doridori garea ngehi a Vui Gogona mo tarani.

⁶Tare ve a sinobu a domire mo virigi lo domianai galegaleasi talo tarabesigi, ngehi a mateana lune. Nge tare ve a domire mo virigi lo gineu talo Vui, ngehi a mwasoana ko a tamwata lune.

⁷Lune a sinobu a domire mo virigi lo nora galegaleasi, ingere ram qalo goro God, a vevenagi ingere rahe masinge tea ve rain ronghuri na Leohora noi God ko a hogo ingere rain he vai lei tea ve rain rongo huri na Leohora noi God.

⁸Giniehi, rahine hi ram toga mo huri na taraniana lo tarabesire sibora, rain he vai lei tea ve rain vei God ve na havuhevu.

⁹Igimiu nehe toga tea lo taraniana talo tarabesimiu. Igimiu nem toga mo huri na taraniana noi Vui Gogona. A hogo, a Vui Gogona noi God mo toga lumiu. Ihine tea a Vui noi Kraes he toga tea lune ingeie hate meie.

¹⁰Siu a tarabesimiu vin mate tamwere, a vevenagi a galegaleasi. Nge tare ve i Kraes mo toga meigo, siu a Vui Gogona mo bete na mwasoana lawego, a vevenagi i Kraes u veigo gom vovohoi lo nagoi God.

¹¹I God u vei ragasi Jisas dena mateana, ko tare ve a Vui noi God mo toga lumiu, ingeie vin bete na mwasoana lawe na tarabesimiu hi rau mate vage. I God, ingeie hi u ragasi Kraes dena mateana, ingeie vin bete na mwasoana vin huri na nona Vui ngehi mo toga lumiu.

¹²Siu retueku ko i rehaqeku, igide dai mese siregi ve a tarabeside hi u galegaleasi ve na huqegi goro gide, sige dam toga mo huri na taraniana talo tarabeside.

¹³Tare ve dam vai na gineu rau esi gina tarabeside, igide dain mate lo Vui. Nge tare ve gom siregi ve a Vui na buluigo ve gon siregi gon mese vai na gineu rau esi gina tarabesimu, iniko goin lei na mwasoana hogo.

¹⁴Ira netui God hogo, i ngerehi ram siregi ve a Vui noi God vin tomue ginire.

¹⁵Siu a Vui hi dau leie he vai gide tea ve da toga vau lo matagute taligu, nge mo vai gide dam voragi netui God, gina huireana nona Vui hi mo vai gide dam ngaragi lawe God vena, “Baba, i Tamaku.”

¹⁶Ko a Vui hi sibona mo bulu mena tamateda mo vai gide dam voragi netui God.

¹⁷Tare igide ira netui God, igide dain lei na vai garea u sao dei God bubugi mei Kraes. Nge dain gagarasi mwerehi i Kraes u lei na roroa.

¹⁸A gagarasi hi dam walie gaqarigi dain he tatarisegi leie tea mena roroa lawua hi vin haharaginie lawe gide.

¹⁹Siserigi ngaha, a gineu doluegi hi i God u teure ram rarai gina hahavusiana huri ve i God na haharagi renetune.

²⁰Siu a gineu teu doluegi rain vurogi, hate ve mo huri na taraniana i ureure, nge mo huri na taraniana noi God. A lado tare noi God mo eno mo sigei.

²¹A gineu ngerehi i God u teure ram toga lo leo vevegi ko ram mabobo. Nge lo rani hi i God vin vei renetune rain meriqe, rain he galegaleasi tea taligu, a leo vevegi hi vin rovo. Siu a gineu ngerehi i God u teure rain meriqe mwere iranetune.

²²Igide dau ilo huri ve a gineu doluegi hi i God u teure rau rarai mo dadari bagataha lo gagarasi, mwerena vavine mo bava maresu.

²³Hate huri ve a ure hogosie, nge igide vage dai rarai lo gagarasi lolo loloda. Igide dau lei na Vui noi God ngehi a gineu muegi lo nona waratau. Siu igide dau rarai ve i God na vagasiginie na vai gide da voragi renetune sibona, ngehi a iloilogi huri ve a tarabeside rain meriqe.

²⁴Siu igide dau mwaso, ko dam hakovi na lado tare ngaha. Tare ve igide dam lehi na gineu hi dam raraie, ngehi hate lado tare hogo. A sinobu rahe lado tare na gineu tea ngehi a nora beno

²⁵Igide dam lado tare na gineu ngehi hate noda mosigei, ko igide dam raraie gina rongoribi.

²⁶Vage a Vui mo bului gide lo noda wiriwiri. Igide dahe ilo tea ve dain tataro mwerehilogo. Nge a Vui sibona mo laqa lawe God huri gide, mo navu dein God gina domiana u bue hate leo ve vin mata-mwasaraginie.

²⁷I God mo leo lai na gineu mo toga hiligi lolo taqangire tangaloi. Ko u ilo na domiana nona Vui, a vevenagi a Vui mo laqa lawe God huri na nona sinobu lo matahala mwerehi i God mo tarani.

²⁸Igide dam ilo huri ve lo gineu doluegi i God mo tabanagi huri gareana noi rahine hi ram tabea. I ngerehi a sinobu u warera, a vevenagi mo huri na nora lado rarai

²⁹I God u ilora tomue siu mo bei teu na ure, ko u domiginie huri ve rain mwerei Netune, siu huri ve i Jisas ingeie a natu togagi lawera reretehigi.

³⁰I God u lado rarai hurire ve rain mwerei Netune, ingeie u warera vage, ko i rahine hi u warera, u veire ram vovohoi lo nagoi God, i rahine hi rau vovohoi lo nagona, u vei roroa ginire vage.

³¹Siu igide dain veve wuraha huri na gineu ngaha? Tare ve i God mo toga mei gide, ihine tea vin he qoragi lai gide tea.

³²Ingeie he wirisigigi Netune tea, nge u sireginie huri gide doluegi. Siu mei Jisas, a hogo, i God vin bete na gineu doluegi lawe gide.

³³Ihine hi vin veve lai vena, “A tangaloi ngerehi i God u leo wahera rahe vovohoi tea”? I God sibona u veve beno huri ve dau vovohoi lo nagona.

³⁴Ihine tea vin veve lai ve a sinobu noi God rau vagasile? Hatie tangaloi gatagale vohogi, a vevenagi i Jisas Kraes u mate, nge u maraga taligu dena mateana vage, ko siserigi ngaha mo toga lo matuei God, mo navunevu huri gide lawe God.

³⁵Wa havagineu tea vin vile wahe lai gide dena tabetabe noi God? Wa gineu esi sige a bugui domiana tea, sige a gagarasi sige a mwaruruhi sige a mahogiana sige a matagute sige a mateana gagarasi?

³⁶Mwere u uli lo Reve reve Gogona vena, “God, huri na henamu, gesegi, vataha rani, a tangaloi ram tarani, ve ran uwevagamate gamai. A tangaloi ram lehi gamai mwere na sibsib ngerehi hurive rain uevagamatera hogosie.” “Huri igamai a mateana mo dovo gamai vataha na rani.”

³⁷Siu i Kraes hi u tabe gamai mo vai gamai gam qoragi na gineu ngerehi doluegi.

³⁸Ineu nau ilo vurugegi huri ve hatie gineu vohogi ve vin vilewahe lai gide dena tabetabe noi Kraes, hatie huri tare dam mate sige dam mwaso. A engsel lo eulu sige a huqegi lo mahava, sige a huireana lo mahava, rain he vai lei tea. A gineu ngerehi rau vonai beno sige i ngerehi rain vonai tetarogi.

³⁹Hatie gineu namawe lo ulude, hatie gineu vage lo vavada, hatie gineu vage lolo ureure doluegi ve vin vile wahe lai gide dena tabetabe noi God ngehi mo eno lui Jisas Kraes a noda Huqe.