Read East Ambae ROM 9 Bible Online

ROM 9 - East Ambae bible

ROM 9

¹Ineu nam veve hogo. Ineu a tangaloi noi Kraes, ko ineu nahe kali tea. A Vui Gogona mo huqegi goro na rongrongoku, ko mo veve laweau ve nahe kali tea.

²Lune nam veve huri ve noku hahagavi u lawua, a gagarasi lolo loloku he mala mautu tea.

³Ineu nam tarani ve na buluire duvi Israel hi, ire tueku ko ire haqeku vohogi. Ineu nam tarani ve nan lai na leo vevegi ko na tai utuhieu dein Kraes, tare ve vin buluire lai mwerehi.

⁴Ingere a sinobu a duvi Israel hi i God u leowahera gi renetune. Ingere rau lehi na roroa noi God ko ram hakovi na lado bubugi ngehi i God u veie lo livugara, ingeie sibona ko ira nona sinobu. I God u bete na Leohora noi mosis koa turegi vovohoi huri na hudu-hudugoro ko a nona waratau.

⁵Ingere a duvi retubude tatuei ingere a garoi tangaloi talo ure ngehi i Kraes u vora lune ingeie a God mo mamalu goro gide doluegi. Waregarea ginie vagi tuei Amen.

⁶Ineu nahe veve tea ve a waratau noi God vin he eno tea lune, huri hatie duvi Israel doluegi ve ingere a sinobu noi God.

⁷I Ebraham a duvine hatie ve ingere doluegi ira netui God. I God mo veve lawe Ebraham vena, “Iniko goin lei na waratau hi nau waratauginie lo duvi Aesak.”

⁸Nge ngaha a iloilogi huri ve ira duvi Ebraham hatie huri ve ingere doluegi ve ira netui God hogo. Ira netui Ebraham hogo ngerehi ram voragi netui God a vevenagi a waratau hi i God u veve lawe Ebraham.

⁹A waratau noi God lawe Ebraham mo veve mwere ngaha, lo tarogi vovohoi ineu nain vanai taligu, ko i Sera vin bava na maresu mwera.

¹⁰Nge hatie hogosie hi, i Rebeka i netune a mwera gairue i tamara nge tauhi, i tamada Aesak.

¹¹Nge tomue siu a mwalakelo gairue hi rom vora, i God u veve lawe Rebeka vena, “I netumu a togagi vin tabana lawe tehine.” Nge ngaha u vei tomue siu a mwalakelo ngerehi rom bei vei na gineu garea sige a gineu esi. Lo doridori hi i God mo leo wahe na tangaloi, he warera tea huri na nora tabanagi, nge mo warera huri na nona tarani hogosie

¹³Mwere a Reve reve Gogona mo veve vena, “Ineu nau tabe Jekob, nge nau leomasi Iso.”

¹⁴Siu igide dain veve wuraha huri na gineu ngaha? Wa i God u lamalamagi na tangaloi? Hatie vohogi.

¹⁵I God mo veve lawe Mosis vena, “Ineu nain veivei garea lawe hine nam tarani ve nain veivei garea lawea. Ineu nain hagavi hine tea hi nam tarani ve nain hagavie.”

¹⁶Siu i God vin leowahe hine tea ngehi mo tarani ve vin hagavie, a nona leowahe he eno tea lo gineu ngehi a sinobu ram tarani sige ram vaileo ve ran vaie.

¹⁷A Reve reve Gogona mo veve lawe na ratahigi ta Ijib vena, “Ineu nau veigo gom ratahigi huri na gineu ngaha, huri ve vin haharagi na noku huireana lumu, ko a tangaloi rain waregi sere na henaku lo qatui ureure doluegi.”

¹⁸I God mo haharagi na nona hahagavi lawe hine tea hi, mo tarani ve vin hagavie, ko ingeie mo vai na qatu siaga lawe na sinobui mo tarani ve vin vei na qature vin siaga.

¹⁹Siu a tangaloi gatagale vin huieu vena, “God mo tau na bugui nomai galegaleasi lumei huri hava gineu? Ihine vin qalo lai mena nona tarani?”

²⁰Ira noku buluana, igimiu ira hine ve nein duvi goro God? A gineu bolobolo vin he hui lei na tangaloi tea hi u gihie vena, “Iniko gu gihie mwere ngaha huri havai.

²¹A tangaloi bolobolo gineu lo tano bulubulu, vin bolo na gineu vin huri na nona tarani, ko ingeie vin bolo na susuveni gairue dena tano bulubulu hi teu, tuegi hi u rovo ram gugu lolona a tanogi lune, tuegi ram gugu lolona vataha bongi.

²²Siu i God ingeie u mwere hi vohogi. Ingeie u tarani vena haharagi na nona lologagasi ko mo siregi ve a sinobu ran lehi na nona huireana. Nge ingeie mo rongoribi mena sinobu ngerehi mo lologagasi ginire. A sinobu ngerehi ram vagatai ve ran mate-salaradu.

²³Ingeie mo rarai gina rongoribi huri vin haharagi na nona tanoi roroa lawe na sinobu ngerehi rau lei na nona hahagavi. Ingeie u vagatai na sinobu ngerehi huri ve rain lei na nona tanoi roroa,

²⁴ko igide ira sinobu hi i God u ware gide. He ware gide tea den duvi Israel hogosie, nge mo ware gide vage dena sinobu hate duvi Israel

²⁵Mwere a Reve reve Gogona mo veve lui Hosea vena, “Ineu nain veve vena, ‘igimiu ira noku sinobu.’ Lawe rahine nam warera ve, ‘hate noku sinobu.’ Ko nain haharagi na noku tabetabe lawe na sinobu ngerehi nahe tabera tea.

²⁶Ko lo tanogi vovohoi ngehi Ineu nau veve lawera vena, ‘Igimiu hate noku sinobu, ineu nau veve lawera vena, ineu i God nam mwaso nam toga vagituei, ko igimiu ire netuku.”

²⁷Ko i Aesaea mo waregi sere na leo huri na duvi Israel vena, “A sinobu a duvi Israel rau sao, mwere na one lobei tehi. Nge te gaivihe tea rain maso.”

²⁸A vevenagi a Huqe vin vevegi na sinobu doluegi talo ure vin siseri.

²⁹I Aesaea u veve vena, “A Huqe u muremure mo siregi ve a duvimei biti hogosie vin mwaso.” Vaiteu igamai doluegi gai mate sala radu. Mwere na qatui venue lalawua gairue hi Sodom ko Komora. Ira duvi Israel ram rongo na Roro Garea

³⁰Siu igide dam veve ve a sinobu hi ingere hate duvi Israel rahe vaileo tea ve rain vovohoi lo nagoi God, nge ram vovohoi lo nagona lo nora ladohogo.

³¹A sinobu leowahe noi God, ngerehi ram hikehike lo tauleo huri ve vin veire rain vovohoi lo nagoi God, rahe haqea tea.

³²?Ko huri havai? A vevenagi ingere rahe lado tea talo nora ladohogo, nge ram lado talo gineu ngerehi ram vaie. Ingere ram taturegi lo vatu hi mo vai na sinobu ram taturegi lune.

³³Mwere u uli lo Reve reve Gogona vena, “Ineu nain teu na vatu lo vanue Jerusalem ngehi vin vei na sinobu rain taturegi ko a vatu toga ngehi vin veire rain soi. Nge ihine tea mo ladohogo ginie vin he maemae lai tea.”