Read East Ambae 1 KOREN 10 Bible Online

1 KOREN 10 - East Ambae bible

1 KOREN 10

¹Retueku ko irehaqeku ineu nam tarani ve nan vai ladotaligugi gimiu huri retubude doluegi rau dige lo vavai dodo ko rau dige turu lo wotoi tehi.

²Ngehi mo gigilegi huri ve ingere rau lei na garuhi gogona beno lo vavai ko lo wotoi tehi ko ingere ram huri Mosis.

³Ingere doluegi rau geni na hinaga talo Vui, inge tau hi

⁴ko ingere rau inu na wai, inge tau hi a wai talo Vui, ngehi u mwelue dena vatui Vui tau hi, a vatu ngehi u hurire. A vatu hi i Kraes sibona.

⁵Nge ingere rau sao rahe vai tea gineu ve na huri na domi God. Siu ingere rau mate lolo vanue vurogi.

⁶Ko a gineu ingere ngaha rau vei huri ve a mataleleogi lawe gide, ve na tugoro gide ve da mese tarani na gineu rau esi mwerehi a sinobu ngerehi rau vei.

⁷Igimiu nein mese hudugoro na tarabesi nunui gineu mwereire lavasigi hi rau vei. Mwerehi a Reve reve Gogona mo veve vena, “Ingere rau toga hivo ram gagani ko ram inuinu, ko ram maraga hage ram wetu mena nora taratarani esi ta lo tarabesire.

⁸Igide dain mese galegaleasi lo tarabeside, mwerehi ingere lavasigi rau vei. Lolo rani gatagale rau mate teri vaga ngavulu gairue domwagi gaitolu, a vevenagi rau galegaleasi.

⁹Igide dain mese vai lehi Kraes mwerehi ingere lavasigi rau vei, a mwata rau gesire ram mate.

¹⁰Igimiu nein mese singo tutubu mwerehi ingere lavasigi rau vei, a engsel noi God hi mo ue vagamate tangaloi u ue vagamatera.

¹¹A gineu ngerehi rau vei lawe na sinobu, ingerehi a mataleleogi. Ingere rau uli hivo huri vin huhui gide, a vevenagi igide dam toga lo tarogi hi ve a gineu ngerehi tatuei rau dadari beno lo qereqerenagi.

¹²Tare ve igimiu neu lado huri ve neu huire, igimiu nein leohuri vai teu nem soi.

¹³Vage a kalikeli hi u vonai lawe gimiu, ngehi mo eno lo tangaloi doluegi. Nge igimiu nein lado talui God, ngehi vin he siregi na kalikeli vin keli gimiu vin liu dena nomiu huireana. Nge lo taroi kalikeli ingeie vin bete na matahala ve nein bela, siu huri ve nein veilei ve nen labe goroe.

¹⁴Siu, ire tueku ko irehaqeku, igimiu nen toa dena lengai huduhudu goro na tarabesi nunui gineu.

¹⁵Ineu nam laqa lawe gimiu mwere na sinobu rau rongrong hogo gineu, igimiu sibomiu nein vilegi na havagineu hi nam vevera.

¹⁶Igide dam veve gareagi God huri na lahai veve garea hi, huri mo vai gide dam bulu gatagale lo dai Kraes. Ko a bereti hi dam vise vurivurie mo vai gide dam bulu gatagale lo betui Kraes.

¹⁷A vevenagi a bereti gatagale, igide hi dau sao dam bulu lo tarabesigi gatagale, a vevenagi dain bulu gatagale lo bereti gatagale.

¹⁸Igimiu nen lado taligu huri na sinobu hi a duvi Israel. Lo tarogi ira duvi Israel ram wehi na kakarue ram rugurugu ginie. ?Wa ingeie hi ingere rahe bulu gatagale tea lo tan tanoi rugurugu?

¹⁹Ineu nahe veve tea ve a bigi hi ram rugurugu ginie lawe na tarabesi nunui gineu, a mava mavanana lune. Ineu nahe veve tea ve a tarabesi nunui gineu, a gineu lune.

²⁰Nge nam veve huri a havagineu tea hi mo rugurugu ginie lawe na tarabesi nunui gineu, a rugurugu lawe na halai tamate doluegi, nge hatie lawe God. Ko ineu nahe tarani tea ve gimiu nein bulu lo gineu tea ngehi a duvigi lo halai tamate doluegi.

²¹Igimiu nein he inu lei tea lolo laha noi Huqe ko lolo laha nora tamate vage. Igimiu nein he bulu gatagale lai tea lo tanoi gaganie nona Huqe sige a tanoi gaganie nora tamate.

²²?Wa igide dam tarani ve da vai na Huqe na lolo gagasi? ?Wa igide dam lado ve da huire liue?

²³Lalavasigi dein gimiu ram veve vena, “Igamai gain vei lei na gineu doluegi,” nge hatie ve a gineu doluegi rau garea meieu ve nain veire. “Igamai gain vei lei na gineu doluegi,” nge hatie vea gineu doluegi ram bului na tangaloi ve a mwasoara na huire.

²⁴Igimiu nei mese matabibi na gineu huri gimiu hogosie, nge nein matabibi na gareana noi rahine wagineu vage.

²⁵Siu igimiu nein geni lei na bigi hi rau sogaginie lo mageti. Iniko goin mese hui ve gon ilo huri ve a bigi hi iniko gom lado ve he garea tea huri geni.

²⁶Iniko goin geni lei a vevenagi, “a ure a tanoi limei Huqe, ko a gineu doluegi lolona.”

²⁷Irahine rahe lado hogo tea rain nevuhigo lai ve nein gagani bubugi bulu, tare ve gom masinge ve goin vano, iniko goin geni na havagineu tea ram bete lawego, iniko goin mese hui huri ve goin ilo ve bataha he garea tea huri geni.

²⁸Nge tare ve ihine tea mo veve lawego ve, “A bigi hi u rugurugu ginie lawe na tarabesi nunui gineu,” iniko goin mese ganie. Goin mese ganie a vevenagi huri na tangaloi hi u veve lawego, ko a vevenagi, tare gom ganie, bataha a sinobu rain lado ve iniko gu vagasile.

²⁹Ineu nahe veve tea ve iniko gom lado ve he garea tea, nge a tangaloi tuegi bataha vin lado mwerehi. Iniko goin hui ve, ?Huri havai tangaloi wagineu vin vevegi leieu lolo domine huri na noku tarani tabetabegi?

³⁰?Tare ineu nam gani na hinaga gina lengai veve garea, ?Wa ineu nain lei na leo vevegi huri na gineu nau veve gareagi God huri?

³¹A gai duvigi ngehi tare ve gom gani sige gom inu, sige gom vai na gineu tea, iniko goin veire doluegi huri na roroa noi God.

³²Iniko goin he vai na gineu tea vohogi ngehi ve bataha vin vei rongesigi irahine wagineu, ira duvi Israel, sige ingere Krik sige a warelue noi God.

³³Mwere ineu vage, nam tarani ve nan vai havuhevu na tangaloi lo matahala doluegi. Ineu nahe vaileo tea vena vai na gineu na garea lawea, nge ingeie hi ve vin garea lawe na sinobu u sao siu huri ingere rain mwaso.