Read East Ambae 1 KOREN 11 Bible Online

1 KOREN 11 - East Ambae bible

1 KOREN 11

¹Igimiu nein vei leo ve nein huri lo taikeruku, mwerehi ineu nam huri lo taikerui Kraes.

²Ineu nam sageau huri gimiu, a vevenagi igimiu nem lado bibieu tamwere ko nem ronghuri na noku leo huhui hi nau bete lawe gimiu.

³Siu ineu nam tarani ve igimiu nein ilo vurugegi huri ve i Kraes mo lawua goro na mwera doluegi, a mwera mo lawua goro na vavine. Nge i God mo lawua goro Kraes.

⁴Ngehi a iloilogi huri ve tare a mwera mo tataro sige mo waregi sere na leo ligoligogi mo hunehune qatu gina gineu mo vaga maemaegi Kraes.

⁵Nge tare ve a vavine tea mo tataro sige mo waregi sere na leoi God lo nagora tangaloi he hunegi goro na qatune tea, ingeie mo vaga maemaegi na qatune sibona. Lune ingeie mo vaie mwerehi, ingeie u tatarise mwere na vavine hi u hiri vohogi na vulune lo qatune.

⁶Tare ve a vavine he hunegi goro na qatune tea, u garea ve vin bala vohogi na vulune. Nge huri a tanoi maemae lawe na vavine ve vin bala vohogi na vulune sige vin hiri mwasaragi na qatune, siu u tatarise lawea ve ingeie vin hunegi goro na qatune.

⁷Nge a mwera vin mese hunegi goro na qatune, a vevenagi ingeie mo haharagi na nunui God ko a nona roroa. Nge a vavine a roroa nona mwera.

⁸A mwera he vanai tea dena vavine, nge a vavine u vonai dena mwera.

⁹Ko i God he tau na mwera tea huri na vavine, nge u teu na vavine huri na mwera.

¹⁰U vovohoi huri ve a vavine vin hunegi goro na qatune, ngehi mo haharagi lawera engsel ve ingeie mo toga lo vavai leogoro noi tamai netune.

¹¹Nge lui Kraes, a vavine rahe labe gahera tea dena mwera, mwerehi vage, a mwera rahe labe gahera tea dena vavine.

¹²Nge ngaha a hogo, a vevenagi a vavine u vonai dena mwera, nge a hogo vage ve a mwera u vora den vavine. Nge a gineu doluegi rau vonai dein God hogosie.

¹³Igimiu nein ladolado lo gineu ngaha sibomiu. ?Wa u vovohoi huri ve a vavine vin siutangaroa lawe God lune he hunegi goro na qatune tea?

¹⁴Lo doridorinai tangaloi, tare ve a mwera mo siregi na vulune ram qaqaravu vin lei na tanoi maemae lawea sibona.

¹⁵Nge i God u bete na vulu qaqaravu lawe na vavine ve a gabune. Vage mwere na gai rorovi goro na qatune.

¹⁶A sinobu lavasigi bataha ram tarani ve ran vuigarogi tau mosigei lo gineu ngaha, nge ineu nam tarani ve nan veve bului vage, ve igamai sige a warelue noi God, gahe ilo na doridorinai huduhudu tea wagineu vage.

¹⁷Lo gineu ingere ngaha hi nam veve lawe gimiu siserigi ngaha, ineu nahe garigi gimiu tea, a vevenagi lune nem vonai tabulutegi nem huduhudu goro nem vai na gineu rau esi u liu dena gareana.

¹⁸Tomuegi, ineu nau rongo ve lune igimiu nem sone bubugi mwere na warelue, nge nem vai na vile wahe lawe gimiu sibomiu ko ineu nam lado hogo gina gineu ingere ngaha lavasigi.

¹⁹A hogo lengai vile wahe mo eno lolo livugemiu, siu huri ve irahine hi rau vovohoi lo nagoi God, u matamwasara huri ve dain lehire.

²⁰Lune igimiu nem sone bubugi, igimiu nehe gani na Gaganie vagasigi nona Huqe tea vohogi.

²¹Huri igimiu nem tauvuigi nem gagani tomue siu a sinobu rambei vanai vavagasigi dein gimiu ram mwaruruhi ko lavasigi ram torongo.

²²?Wa igimiu hatie valemiu sibomiu huri ve nein gagani ko nein inuinu aie? ?Sige nem siesie gina warelue noi God? ?Wa nem tarani ve nen vagamaemaegi na sinobu hi hatie nora gineu lure? ?Igimiu nem lado ve nain veve wuraha lawe gimiu huri na gineu ngaha? ?Sige nem lado ve ineu nain gerigi gimiu? Hatie, hatie vohogi.

²³A leo huhui hi nau bete lawe gimiu, a leo huhui nge tau hi nau leie dena Huqe. Ngehi lolo bongi, tomue siu mo sireginie ve rain uevagamatea, ingeie u lei na bereti,

²⁴mo vevegarea hurie. Siu mo vise vurivuri na bereti ko mo veve vena, “Nge ngaha a tarabesiku mo lai huri gimiu. Nein veie ngaha gina lado taligu hurieu.”

²⁵Lo tagugi hi a gaganie u rovo, ingeie mo wali na laha mo veve vena, “Nge ngaha a daiku ko gina daiku hi i God mo vai na waratau garaqa mei gimiu. Igimiu nein inu ngaha gina lado taligu hurieu.”

²⁶Nge ngaha a iloilogi huri ve vataha tarogi lune igimiu nem gani na bereti ngaha ko nem inu dena laha ngaha lo matahala he garea tea ram galegaleasi goro na tarabesi Kraes ko a daine.

²⁷Giniehi, irahine hi ram gani na bereti ko ram inu dena laha ngaha lo matahala he vovohoi tea, ingere ram galegaleasi goro na tarabesi Kraes ko a daine.

²⁸Giniehi, ihine tea mo tarani ve vin geni na bereti ko ve vin inu dena laha ngaha, ingeie vin leoleo vurugegi huri na mwasoana tomue.

²⁹Tare ve igimiu nehe leo hogosi na iloiloi tarabesi Kraes tea lune igimiu nem gani na bereti ko nem inu dena laha ngaha, igimiu nem lai na leo vevegi lawe gimiu sibomiu.

³⁰Giniehi, u sao dein gimiu ram sege, ram wiriwiri, ko u sao vage ram mate.

³¹Tare ve dam leoleo vurugegi huri gide siboda tomue, bataha dain he lai na leo vevegi tea.

³²Lune a Huqe mo vevegi gide, mo vaie huri ve na vovohoigi gide, nge lune a taro vin vanai, a Huqe vin veveginire hi rau sala, ko igide dain mwaso.

³³Retueku ko irehaqeku, lune igimiu nem vanai tabulutegi huri na gaganie noi Huqe, igimiu nein rarai ve doluegi rain dadari, siu nebei gagani bubugi

³⁴ko tare ve lavasigi dein gimiu ram mwaruruhi, u garea ve rain gagani lo tanora, siu huri igimiu nein he vanai tea lo vavai leo vevegi noi God lo taro hi nem sone bulutegi. Ineu nain veve na gineu lavasigi lawe gimiu lune nain vonai.