Read East Ambae 1 KOREN 12 Bible Online

1 KOREN 12 - East Ambae bible

1 KOREN 12

¹Retueku ko irehaqeku, siserigi ngaha neu nam tarani ve igimiu nein ilo na hogogi wagiwegineu dena Vui Gogona.

²Igimiu nein lado haqe na matahala hi neu toga lune tomue siu nebei lado hogo. Igimiu neu beragi lo matahala u sao sulo lengai hudu-hudugoro na tarabesi nunui gineu ngehi hatie mwasoara lure.

³Ineu nam tarani ve igimiu nein ilo vurugegi. Tare ve ihine tea a Vui noi God mo tomueginie, vin he veve lai tea ve i Jisas hate gineu lune. Nge tare ve a Vui noi God he toga tea lune vin he veve lai tea ve i Jisas ingeie a Huqe.

⁴A halai hogogi talo Vui rau wagiwegineu, nge ingere doluegi hi ram vanai dena Vui gatagale.

⁵A matahalai tabana sao rau wagiwegineu, nge a tabana ngerehi ram dovo na Huqe nge tau hi.

⁶Ko igide gagatalegi dain vei lei na gineu sao rau wagiwegineu. Nge a God ingeie tauhi mo kea lolo loloda doluegi ko mo bului gide lo gineu doluegi hi dam vaire.

⁷A Vui mo toga lude gagatalegi huri ve igide dain tabanagi lawera hine wagiwagineu.

⁸Lavasigi dein gide dain gato lai gina mataisao, siu lavasigi rain gato lai gina lolorani, nge a hogogi ingere ngaha ram vanai dena Vui hi teu.

⁹Lawera lavasigi, a Vui u bete na lado hogo lawua lawera sige a huireana ve rain vagamwasoire segesege,

¹⁰sige a huireana ve rain vei na vaigivui lalawua, lavasigi dein gide ingere a tangaloi ligoligogi, ko lavasigi dein gide dam leo hogosire ve a Vui noi God mo toga meire. Lavasigi ram gato lai lo leo rau wagiwegineu, ko lavasigi rau ilo na iloiloi leo ngerehi.

¹¹Nge a Vui gatagale tau hi mo vai na gineu ngerehi doluegi ko mo domiginie ve vin bete na hava hogogi tea lawe gide gagatalegi mwerehi ingerehi ingeie mo lado ve u vovohoi.

¹²A tarabesine tangaloi gatagale, nge a rosorosogi rau wagiwegineu. Hatie huri a rosorosogi u sao nge a tarabesigi gatagale hogosie. I Kraes u mwerehi vage.

¹³Lavasigi dein gide a duvi Israel, lavasigi ingere a Krik. Lavasigi dein gide ingere a tangaloi tabanagi vurogi, ko lavasigi ingere a tangaloi ram toga tabetabegi. Nge a Vui noi God u geruhi gogonagi gide gagatalegi, ko u vei gide dam bulu gatagale lo tarabesi Vui gatagale. Siu siserigi ngaha igide dain inu dena Vui gatagale tauhi.

¹⁴A tarabeside he hage dolue tea, a rosorosogi u sao lo tarabesigi gatagale.

¹⁵Tare ve a karu mo veve vena, “Ineu hatie lime siu ineu hatie duvi tarabesigi.” ?Wa karu vin he voragi na duvi tarabesigi hi tea?

¹⁶Sige ve a qero vin veve vena, “Ineu hatie mata, siu ineu hatie duvi tarabesigi.” ?Wa qero vin he voragi lai na duvi tarabesigi lai tea?

¹⁷Tare ve a tarabesigi gatagale movoragi na mata doluegi, ?Ingeie vin rogo na gineu mwerehilogo? ?Sige ve a qero a tarabesigi gahea, ingeie vin burongo na gineu mwerehilogo?

¹⁸Nge i God u teu bulutegi na duvi tarabeside sulo tarabesigi gatagale. Lo matahala mwerehi mo lado ve u garea ko u vovohoi.

¹⁹A tarabesigi vin hatie, tare a duvi tarabesi doluegi rahe bulu tea sulo duvi tarabesigi gatagale.

²⁰Siu a tarabesigi gatagale, nge a rosorosona u sao.

²¹Vage a mata vin he veve lai tea lawe na lime vena, “Ineu hatie noku tarani lumu,” sige a qatu vin he veve lai tea lawe na lime vena, “Ineu hatie noku tarani lumu.”

²²A hogo, igide dain he tabanagi lei tea tavala varea dena duvi tarabeside. Nge a duvi tarabeside hi rau kekena rau enhageliu.

²³Nge a duvi tarabeside lavasigi ngerehi dam lado ve rahe raka tea, igide dam lado tatabeginire u liu. Ko a duvi tarabeside ngerehi dam maemae meire dam luqegi gorora.

²⁴Nge a duvi tarabeside ngerehi dahe maemae tea meire dam sireginire ram eno mwerehi. I God u vei rarai na domiana hurire beno huri na duvi tarabeside ngerehi. Siu a duvi tarabeside ngerehi dam lado ve hatie gineu lure, nge i God u bete na tabana lawera u tatarise meire gagatalegi.

²⁵Giniehi, a duvi tarabeside rain he vilewahe lai tea, nge ram rarai lolo mwamwavi ve rain vui buluire gagatalegi.

²⁶Tare ve a duvi tarabeside gatagale mo rongesi, a duvi tarabesi doluegi rain rongesi. Tare ve a tangaloi tea mo vevegareagi na duvi tarabeside, nge a tarabeside doluegi vin havuhevu.

²⁷Siu igimiu doluegi a tarabesi Kraes, nge igimiu gagatalegi a duvi tarabesi hi.

²⁸Lolo warelue i God u teu na gineu doluegi mo huri na tanora. Tomuegi ira gaihora, tuegi ira tangaloi ligoligogi, ko gaitoligi ira huhui, siu ingere hi ram vai na vaigi Vui, mo eno lawera vage hi u bete na huireana lawera ve rain vagamwasoire segesege sige rain bului irahine wagineu sige rain tomueginire sige rain laqa lo leo rau wagiwegineu.

²⁹Ingere doluegi hatie gaihora, sige ingere doluegi hatie tangaloi ligoligogi, sige ingere a huhui. Hatie ve ingere doluegi ram hako managi ve rain vei na vaigivui,

³⁰sige ve rain vagamwasoire segesege, sige rain laqa lo leo rau wagiwegineu, sige ve rain veve matamwasaragi na iloiloi leo ngehi lawera sinobu ve ran ronghogosire vurugegi.

³¹Igimiu nen tau na loloi taqangimiu lo hogogi hi rau lalawua. Ineu nam tarani ve igimiu nen tau na lolo lolomiu a muei hogogi. Siserigi ngaha ineu nain haharagi na matahala tuegi vage lawe gimiu ngehi u garea garagara denire doluegi.