Read East Ambae 1 KOREN 14 Bible Online

1 KOREN 14 - East Ambae bible

1 KOREN 14

¹Igimiu ve nein hike wawahiligi na tabetabe, igimiu nein veileo ve nein tarani na hogogi ngerehi talo Vui, hageliu a hogogi huri waregi sere na leoi God.

²Ineu nain veve vin matamwasara ve irahine hi ram hakovi na hogogi huri ve rain laqa lo leo wagiwegineu, rahe laqa tea lawe na sinobu, nge ingere ram laqa lawe God hogosie. Hatie tangaloi ve mo ronghogosi na nora leo, ingere ram laqagi na gineu ngerehi ram toga hiligi lo Vui.

³Nge irahine hi ram waregi sere na roro huri God lawe na sinobu vena vai siagaginire, vena vaga mwamwaviginire ko vena vai mesuriginire.

⁴Irahine hi ram laqa lo leo wagiwegineu ram buluire taligu sibora hogosie, nge ira hine ram waregi sere na leo huri God ingere ram bului na warelue doluegi.

⁵Ineu nam tarani ve igimiu nen hakovi na hogogi ve nein laqa lo halai leo sao rau wegiwegineu, nge hageliu, ineu nam tarani ve nein waregi sere na roro. Irahine hi ram waregi sere na roro, rau lawua denire hi ram gato lo leo wagiwegineu, sige tare ve ihine tea mo matamwasaragi na havagineu hi rau veve huri vin bului na warelue doluegi.

⁶Retueku ko irehaqeku, ?Tare ve ineu nam vanatu lobemiu nam gato lo leo wagiwegineu, ineu nain bului gimiu mwerehilogo? Tare ve ineu nain haharagi na gineu garaqa tea lawe gimiu, ngehi i God u haharaginie laweau, sige nain he veve na leo mataisao tea lawe gimiu, ngehi he garea tea, tare ineu nain he veve sere na leo tea ngerehi i God u haharaginire laweau ko nahe huhui gimiu tea ginire, ineu nain he bului gimiu tea vohogi.

⁷U tatarise mwere na gineu ngerehi hatie mabuhire lure, ram tatangi hogosie. Nein domiginire mwere na bue uviuvi mena singsingi. A gineu ngerehi hatie mabuhire, nge a tangaloi hogosie ram vaire ram tatangi, nge tare ve ram tatangi a dilora he vovohoi tea, igimiu nein he ilo tea ve a hava ahi hi ram hurire.

⁸Siu lo taroi vuro, tare ve a tavue mo tatangi he vovohoi tea, a sinobu rain he ilo tea ve a vuro.

⁹Mei gimiu, u tatarise mwerehi vovohoi. Tare ve a nomiu leo rahe matamwasara tea a vevenagi nem laqa lo leo wagiwegineu ngerehi, a tangaloi rain he ilo tea ve nem veve na havagineu. A nomiu leo hatie iloilogi lune.

¹⁰A hogo huri ve a leo wagiwegineu u sao lolo ure, nge a leo ngerehi gagatalegi a iloilogi lune.

¹¹Nge tare ve ineu nahe ilo na iloiloi leo tea ngerehi, ngehi mo haharagi ve ingere a halavano laweau ko ineu a halavano lawera.

¹²Ngehi u mwerehi vohogi mei gimiu. Huri igimiu nem tarani garagaragi na hogogi ngerehi talo Vui, igimiu nein vei leo ve nein hako siagaginire hi ram bului na warelue vena mwaso.

¹³A tangaloi mo laqa lo leo wagiwegineu, siu ingeie vin tataro huri na hogogi hi, huri vin matamwasaragi na leo hi mo laqagi.

¹⁴Tare ineu nam tataro lo leo wagineu, a tamateku mo tataro, nge a domiku he vai na gineu tea.

¹⁵?Siu ineu nain vei mwerehilogo? Ineu nain tataro gina tamateku, nge nain tataro gina domiku vage. Ineu nain huri ehi gina tamateku, nge nain huri vage gina domiku.

¹⁶Tare ve iniko gom waregareagi God gina tamatemu, irahine tahi rahe rongo hogo tea rain he Amen tea lawe na nomu tataro vevegarea, a vevenagi ingere rahe ilo tea ve gom veve na havagineu.

¹⁷Bataha iniko gom vevegareagi God lo matahala u garea, nge he bului na tangaloi tea wagineu.

¹⁸Ineu nam vevegareagi God huri ineu nam laqa lo leo wagiwegineu u liu taligu dein gimiu doluegi.

¹⁹Lo nagora tangaloi warelue u garea ve nain laqa lo leo qatu gai lime hogosie ngehi nau ilo vurugegi na iloilogi, ngehi ve a leo huhui lawera tangaloi wagineu, u garea taligu denie hi ve nain laqa lo leo teri vatu saosao lo meara tangaloi wagiwegineu.

²⁰Retueku ko irehaqeku, igimiu nein mese mwere maresu wuwerigi lo nomiu ladolado. Lo gineu rau esi igimiu nen mwere na maresu wuwerigi, nge nen mwere na mwalakelo lo nomiu ladolado.

²¹A Reve reve Gogona mo veve vena, “Ineu nain laqa lawe na sinobu ngerehi ram gato lo leo wagiwegineu. Ingere rain he ronghuri na leoku tea.”

²²Siu mwerehi, a hogogi hi mo vai na tangaloi mo laqa lo leo wagiwegineu, ngehi a gigilegi mo eno lawera hi rahe ladohogo tea gi God, nge he eno tea lawera hi rau lado hogo beno, nge a hogogi huri waregi sere na leoi God, ngehi a gigilegi mo eno lawera hi rau lado hogo beno, nge he eno tea lawera hi rahe lado hogo tea.

²³Tare ve a sinobui warelue doluegi ram vanai tabulutegi ko ingere ram laqa lo leo wagiwegineu. Tare ve a sinobu wagineu ram bulu mei gimiu rahe ronghogo tea sige rahe lado hogo tea, ingere rain lado ve igimiu nem lenga.

²⁴Nge tare ve igimiu doluegi nem waregi sere na leoi God a tangaloi tea mo ahu vanai ngehi he lado hogo tea sige he ronghogo tea, Tare igimiu doluegi nem waregi sere na leoi God, ingeie vin leo lai na nona galegaleasi, a domine vin veveginie lo havagineu hi u rongoe.

²⁵A gineu hiligiana hi ram toga lolo taqangine, vin vosangire lo ute lawua, siu huri ingeie vin teigi hivo mo hudu goro God ko mo veve vena, “A hogo, i God mo toga mei gimiu.”

²⁶Retueku ko irehaqeku, a leo hi nau vevera a iloilogi mwere ngaha. Lune igimiu nem vanai bulutegi huri huduhudu goro, igimiu gagatalegi a nomiu tabana huri ve nein vei. Bataha ihine tea u huri lei ahi, sige tuegi u huhui lei, tuegi mo rarai ve vin haharagi na gineu garaqa ngerehi i God u haharaginire lawea, tuegi vage mo rarai ve vin laqa lo leo wagiwegineu ko gatagale mo rarai ve vin matamwasaragi na leo ngerehi. Nge igide doluegi dam tabana huri na tanoi dovodovo gatagale hogosie, ve da vai na tangaloi lolo warelue ve ran huire.

²⁷Lune a sinobu ram laqa lo leo wagiwegineu, u garea ve a tangaloi gairue sige gaitolu hogosie rain laqa. Ko lune ihine tea mo laqa, vin laqa tamwere hi vin dadari a nona leo vin rovo. Siu lo tagugi a tangaloi wagineu mobei laqa. Ko tare ihine tahi ve vin mwatamwasaragi na leo ngerehi, huri ve a sinobu rain rongo hogosire.

²⁸Nge tare ve hatie tangaloi tea ve vin matamwasaragi na laqaana ngaha, a tangaloi mo laqa lo leo wagiwegineu vin toga rorongo lo nagora sinobui warelue. Ingeie vin laqa lai lo leo wagiwegineu ngerehi, vin laqa lai meie sibona ko vin gato lai mei God vage.

²⁹Tare ve a tangaloi gairue sige gaitolu ram laqa, ingere hi ve rain waregi sere na roro ngehi i God u bete lawera, ngehi u garea. Nge a sinobu rain gigile na gineu ngerehi ve rau garea sige rau esi.

³⁰Tare ve a roro dein God mo vanai lawe na tangaloi wagineu mo toga tahi, a tangaloi hi u laqa tomue vin siregi.

³¹A tangaloi mo laqa vin laqa vin dadari hi a nona leo vin rovo, siu a tangaloi tuegi mobei laqa. Lo matahala mwerehi, a sinobu rain lei na leohuhui ko vin vaga mwamwavigi na domire.

³²A tangaloi hi mo ligogi na leo vin mesinge vena siregi na taro lawe na tangaloi tuegi vena laqa.

³³Huri God, ingeie hatie God talo vai luguregi, nge ingeie hogosie a vui tamwata. Siu igimiu nein huri lo taikeru nge tauhi a sinobu noi God lolo warelue doluegi ram hurie.

³⁴A vavine ram toga rorongo lolo sonebubugi nona warelue. Hatie leo siregi lawera ve rain laqa, nge rain lado mava vin hurie mwerehi a tauleo noi Mosis mo veve.

³⁵Tare ingere ram tarani ve rain huri na havagineu tea. Ingere rain huri tamai neture sibora lo valera. Tare ve a vavine ram laqa lo sonebubugi nona warelue, a tanoi maemae lawua lawera.

³⁶!A havagineu mo vai! ?Wa leo noi God u vanai dein gimiu? ?Sige bataha nem lado ve u vanai lawe gimiu hogosie?

³⁷Irahine hi ram lado ve ingere a tangaloi ligoligogi, sige ingere a tangaloi hi a vui mo tomueginire rain ilo vurugegi ve ineu nam uli na leta ngaha lawe gimiu mo huri na leohora nona Huqe.

³⁸Irahine hi rahe rorongtagi na gineu ingere hi tea, i God vin he rong hurire tea.

³⁹Siu iretueku ko irehaqeku, igimiu nen vai na domimiu na siaga nen waregi sere na roro huri God. Ko nein mese tugorora hi ram gato lo leo wagiwegineu.

⁴⁰Igimiu nein vei na gineu doluegi vin huri na matahala vovohoi.