Read East Ambae 1 KOREN 15 Bible Online

1 KOREN 15 - East Ambae bible

1 KOREN 15

¹Retueku ko irehaqeku, siserigi ngaha ineu nam tarani ve nain lado haqe na Roro Garea hi nau leie u dadari mei gimiu. Igimiu neu lei na Roro Garea ngaha ko nem labe siaga tuturedu lune.

²Ko gimiu nein mwaso ginie tare ve igimiu nem ladohogo tuturedugi na havagineu nau veve lawe gimiu. Tare ve igimiu nehe vai tea mwerehi, a nomiu ladohogo hatie iloilogi lune.

³Ineu nau bete hougi lawe gimiu a havagineu hi nau leie, ngehi u enhageliu garagara, ve i Kraes u mate huri na noda galegaleasi, mwerehi a Reve reve Gogona u veve

⁴vena, rau tuleginie ko ingeie u maraga taligu sulo mwaso lo rani gai toligi mwerehi a Reve reve Gogona u veve.

⁵Bita u lehe ko ira gaihora hangavulu domwagi gairue rau lehe vage.

⁶Lo tagugi hi, i Jisas u sereluae lawe na sinobu hi rau lado hogo ginie u sao dena vudolue vagalime lo tarogi tauhi. U sao garagara denire hi ram mwaso tau mosigei, nge lavasigi rau mate beno.

⁷Siu i Jemis u lehe ko lo tagugi hi ira gaihora doluegi rau lehe.

⁸Vagasigi ineu nau lehe, ineu nau mwere na tangaloi hi u vora utu vulana.

⁹Ira gaihora doluegi ngerehi rau lawua taligu denieu. Ineu nahe tatarise tea ve rain wareau ve a gaihora, a vevenagi ineu nau veivei na warelue noi God.

¹⁰Nge a hogo noi God u veieu nam dori gi tangaloi garea, ko a nona veivei garea laweau rahe sala tea vurogi. Ineu nau tabana uhuire denire gaihora doluegi, a hogo, hatie huri ve ineu nge a hogogi noi God nge hi mo toga luku.

¹¹Siu tare ve ineu nam waregi sere na roro lawe gimiu sige ira gaihora lavasigi ram waregi sere lawe gimiu, igamai doluegi gam waregi sere na gineu gatagale ko a gineu gi ngehi igimiu nem lado hogo lune.

¹²Siu siserigi ngaha igamai gam waregi sere ve i Kraes maraga dena mateana. ?Huri havagineu lavasigi dein gimiu ram veve huri ve a sinobu rain he maraga tea dena mateana?

¹³Tare a tangaloi he maraga tea dena mateana siu i Kraes he maraga tea dena mateana vage.

¹⁴Ko tare ve i Kraes he maraga tea, siu a nomai leo huhui hatie mavanagi lune, ko a nomiu ladohogo hatie gineu lune,

¹⁵ko vage, igamai gau vagasile, huri gam kali lo henai God, a vevenagi igamai gam veve ve a hogo ve ingeie u ragasi Kraes dena mateana. Nge tare ve a sinobu rahe maraga tea dena mateana, siu i God he ragasi Kraes dena mateana tea vohogi

¹⁶Tare irahine hi rau mate rahe maraga tea, siu i Kraes he maraga tea vage.

¹⁷Tare ve i Kraes he maraga tea, siu a nomiu ladohogo lune hatie mwasigi. Igimiu nem toga vau mosigei lo nomiu galegaleasi.

¹⁸Irahine hi rau mate beno lui Kraes, ingere rau sala.

¹⁹Tare ve a noda lado tare lui Kraes mo eno huri na mwasoana tagaqarigi hogosie, igide dain hahagavi vin liu na tangaloi wagiwegineu lolo ure.

²⁰Nge i Kraes ingeie a muegi hogo hi u maraga dena mateana, ko a mataleleogi ve irahine ram maturu lo mateana ingere rain maraga vage.

²¹A mateana u vanai a vevenagi a galegaleasi nona tangaloi gatagale, siu maraga taligu dena mateana u vanai dena tangaloi gatagale vage.

²²Lui Adam igide doluegi dau mate, lo matahalagi mwerehi teu, lui Kraes igide doluegi dain mwaso taligu.

²³Nge igide gagatalegi dain maraga sulo mwaso lo halagi vovohoi. I Kraes ingeie a muegi hi u maraga taligu. Lune i Kraes vin vanai taligu, irahine hi a nona, rain maraga sulo mwaso.

²⁴Siu lo tagugi hi, a taro huri na gineu doluegi rain rovo. Lo tarogi hi i Kraes vin vei vohoginire huqegi doluegi, a tangaloi ram hako huireana doluegi, ko ingeie vin bete na ute hi i God mo ratahigi lolona lawe mama.

²⁵I Kraes vin huqegi vin dadari vin teu na nona tavului vuro doluegi lo vavai tanoi nona leo goro.

²⁶A tavului vuro vagasigi hi ve vin vei vohoginie ngehi a mateana.

²⁷A Reve reve Gogona mo veve ve i God u teu na gineu doluegi lo vavai tanoi nona leogoro. Lune a Reve reve Gogona u veve ve a gineu doluegi ram eno lo tanoi nona leogoro, ngehi u matamwasara ve he valu bubugi God tea sibona.

²⁸Lo tagugi hi, a gineu doluegi rain eno lo vavai tanoi leogoro noi netune, siu i netune vin teu hivoginie sibona lo vavai tanoi leogoro noi God hi mo huqegi goro na gineu doluegi beno. Siu i God hogosie vin huqegi goro na gineu doluegi.

²⁹Tare ve irahine hi rau mate beno rahe maraga tea vohogi dena mateana, ?A sinobu rain vei mwerehilogo, huri rau lei na garuhi gogona lo henara? ?Tare irahine rau mate rahe maraga tea vohogi, huri havagineu nam garuhi gogona lo henara, Wuraha mei gide?

³⁰?Huri havagineu igide dam tau gide siboda lo mateana mavolo?

³¹A mateana mo dovoau vataha bongi. Ngehi a hogo, retueku ko irehaqeku, u mwerehi teu ve ineu nam sageau huri gimiu lui Jisas Kraes a noda Huqe.

³²Tare ineu nau qalo mena kakarue turu lo togagi venue lawua Evesas, gina ladotare nona tangaloi hogosie, nain he lai na gineu tea vohogi. Tare ve irahine hi rau mate beno rahe maraga tea, “Igide da gagani ko da inuinu a vevenagi mavugo dain mate.”

³³Igimiu nein mese vaga lengagi gimiu sibomiu. “A bulu bulu esi vin hara vohogi na doridori garea.”

³⁴Giniehi, igimiu nen tudori, nen vai vurugegi na domimiu ve ran vovohoi ko nen siregi na nomiu matahala hi rau esi. Lavasigi dein gimiu rahe ilo God tea. Ineu nam veve mwere ngaha ve na vaga maemaegi gimiu.

³⁵Nge lavasigi rain hui vena, “?Irahine hi rau mate beno, rain maraga mwerehilogo? A tarabesigi vin mwere na havagineu?

³⁶!Igimiu ira malalengagi! Lune igimiu nem rivu na toli, a toli vin mate lolo tano tomue siu mobei tubu ko mo mauri.

³⁷Ko lune igimiu nem rivu na toli gineu, bataha a toli kon sige a toli gineu tea wagineu, nge lune ram tubu a tarabesire rau wagineu.

³⁸I God u bete na tarabesigi hi u vei vagatai hurire ko u bete na tarabesigi lawe na toli gineu wagiwegineu hi ve vin voragi tarabesire sibona.

³⁹A gineu doluegi hi i God u teure lo vihigogi rahe tatarise tea. A tangaloi a vihigona u wegineu, a vihigoi kakarue u wegineu, a vihigoi manu u wegineu, ko a ige a vihigona u wegineu.

⁴⁰A gineu u sao lo mahava a tarabesire lure ko a gineu u sao lo tano a tarabesire lure vage. Ingere rahe tatarise tea. A gareanai gineu hi ram tino lo mahava rau wegiwegineu dena gareanai gineu ta lo tano.

⁴¹A leleoi aho u wegineu, a leleoi vule u wegineu ko a visiu a leleora hala wagiwegineu denire gagatalegi.

⁴²A gineu vin vei mwere ngaha, lune ingerehi rau mate beno rain maraga sulo mwaso.

⁴³Lune igide dam tulegi na tarabesigi u ngangasi ko u kekena, nge lune vin maraga vin huire ko vin raka garagara.

⁴⁴A tarabesigi hi dam tuleginie, ngehi u mwaso lolo ure ngaha hogosie, nge tarabesigi hi ve vin maraga taligu vin voragi tarabesigi talo vui. A tarabesigi talo ure ko a tarabesigi talo vui vage.

⁴⁵Mwere u uli lo Reve reve Gogona vena, “A tangaloi muegi i Adam u vora a tangaloi mwaso.” Nge i Adam vagasigi ingeie a vui ngehi mo bete na mwasoana.

⁴⁶Igide dam leo ve ihine hi a tarabesine talo vui he vanai tea tomue, nge ingeie a tarabesine u mate vin vanai tomue siu mobei tarabesi talo vui.

⁴⁷I Adam tatomue i God u boloe dena tano, nge i Adam tuegi u himei dena eulu.

⁴⁸Ira natui ure, rau mwereie hi i God u boloe dena tano. Nge ira natui ute ta eulu, rau mwereie hi u himei den eulu.

⁴⁹U mwerehi vohogi ve igide dam sarugoro gide gina nunui tangaloi hi i God u boloe dena tano. Siu siserigi ngaha igide dain serugoro gide gina nunui tangaloi hi u himei den eulu.

⁵⁰Retueku ko irehaqeku, ineu nam veve ngaha lawe gimiu, ve a vihigogi ko a dai hatie mahogi hurire lolo ute hi i God mo ratahigi lolona. A gineu ngehi vin mada vin bulu bubugi tea mena gineu hi vin he mada lai tea.

⁵¹!Igimiu nen leo! Ineu nam veve sere na gineu hiligiana ngaha lawe gimiu. Hatie ve igide doluegi dain meturu lo mateana, nge igide doluegi dain dori.

⁵²A gineu ngaha vin vei vin siseri vin liu denie hi a mata mo teruterugi. Lune a tavue vin tatangi ko lune vin uvi na tavue vagasigi irahine hi rau mate rain maraga ve rain toga vagituei. Igide doluegi dain dori.

⁵³A tarabesigi hi vin mada vohogi vin serugoroe gina gineu hi vin he mada lai tea. A tarabesigi ngehi vin mate vin seru goroe sibona gina gineu hi vin he mate lai tea.

⁵⁴Lune a tarabesigi hi vin mada vohogi vin serugoroe gina gineu hi vin he mada lai tea ko lune a tarabesigi ngehi vin he mate vin serugoroe sibona gina gineu hi vin he mate lai tea, siu a gineu ngaha vin vei vena vagahorongi na havagineu hi a Reve reve Gogona u veve a hogo ve, “!Mateana, i God u vei vohoginigo beno. Ingeie u qoraginigo beno!”

⁵⁵“?!Mateana, iniko goin qoragi lei mwerehilogo? ?Iniko goin vei vohogi gamai mwerehilogo?”

⁵⁶A mateana u lei na nona huireana dena galegaleasi vena vai gagarasigi, ko a huireanai galegaleasi mo vanai dena Leohora noi Mosis.

⁵⁷Nge igide da veve gareagi God. Huri u bete na huireana ve dain qoragi na vuro lui Jisas Kraes a noda Huqe.

⁵⁸Siu retueku ko irehaqeku, igimiu nen labe siaga lo nomiu ladohogo. Igimiu nen mese siregi ve a havagineu ve na leahi na taqangimiu. Igimiu nen siregi gimiu sibomiu huri na tabanagi nona Huqe gina taqangimiu doluegi. Igimiu nein ilo huri ve a havagineu tea hi nem vaie lo henana rain wei mwasigi vin sao.