Read East Ambae 1 KOREN 16 Bible Online

1 KOREN 16 - East Ambae bible

1 KOREN 16

¹Ineu nain uli na leta huri mane hogogi hi ve vin vano lawe na sinobu noi God. Igimiu nein vei mwerehi nau veve lawe na warelue ta Kalatia ve rain vei.

²Vataha na Sande igimiu nein teu mavumevusui mane vatavatahagi gimiu, a duvi mane hi nem lai lo duvi nomiu tabanagi garea. Tare igimiu nem vaie mwere ngaha, igimiu nein tatu tea ve nein vile na mane lo tagugi hi ineu nau dadari mei gimiu beno

³Lune nain dadari, ineu nain hora rahine hi neu leowahera ve rain vano mena nomiu hogogi a Jerusalem. Ineu nain horara mena leta vage hi mo haharagi ve igimiu neu leowahera beno.

⁴Tare mo garea ve ineu nain vano vage, ingere rain bulu meieu.

⁵Ineu nain vanai lobemiu lo tagugi hi nau vano Masedonia, huri lo matahalaku, nau lado rarai ve nain vano turu Masedonia tomue.

⁶Bataha ineu nain toga mei gimiu mahogi tea qilodo, sige nain toga mei gimiu vin dadari a rara vin rovo. Siu huri igimiu nein bului leieu lo matahalaku lune nain dige.

⁷Ineu nahe tarani tea ve nain lehi gimiu lune nam dige utu. Nau domigi vagatai ve nain toga mei gimiu vin malaqaravu, tare ve a Huqe mo lado siregi mwerehi.

⁸Ineu nain toga Evesas vin dadari a bongi Bentekos.

⁹A vevenagi a taro lawua mo waga laweau, ve nain vei tea tabana aiehi. Nge a sinobu u sao vage rain qalo meieu.

¹⁰Tare ve i Timoti mo vantu lobemiu, nein vei leo ve nein vei mesuriginie, a vevenagi ingeie mo tabana lawe na Huqe mwereieu siboku.

¹¹Ihine tea dein gimiu vin mese leohivoginie, igimiu nein buluie ve na dige lo tamwata huri ve ingeie vin dadari meieu. Ineu nam ladotare ve ingeie vin dadari meire reretehigi.

¹²Vage huri Apolos, ineu nam vaga mwamwavigi siagagi na domine ve ingeie meire reretehigi ran siro gimiu. Ingeie he tarani tea ve vin vanatu lo tarogi ngaha, nge ingeie vin vanatu lune vin haqe na tarogi

¹³!Igimiu nein leohuri! Nein labe siaga tuturedu lo nomiu ladohogo. Igimiu nein mese matamatagu ko a domimiu vin huire tamwere.

¹⁴Igimiu nen vai na gineu doluegi lo dom tabetabe.

¹⁵Igimiu neu ilo beno huri ve i Stevanas mei renetune rau ilo Kraes gitomue lo qatui venue Akaea ko ingere rau tabana u huire huri ve rain bului na sinobu noi God.

¹⁶Retueku ko irehaqeku, nam navu siaga dein gimiu ve nein huri na tomtomuegi mwereire ngaha ko vage ira hine wagineu ram bului lo tabana.

¹⁷Ineu havuhevu huri Stevanas, Votunatus ko i Akaekas rau dadari. Lune igimiu hatie tangaha, ingere ram lai na tanomiu.

¹⁸Ko ingere rau havuhevugieu, lo matahala mwere tauhi rau vei havuhevugi gimiu.

¹⁹Veve garea lawe gimiu dena warelue doluegi lo qatui venue lawua Esia, Akwila tona Brisila rom hora nora veve garea lo henai Huqe ko ira hine doluegi hi ram sone bubugi vataha bongi lo valera.

²⁰Ira reretehigi hano ram hora nora veve garea. Igimiu nein lai vurugegi gimiu gagatalegi gina sungsunguni gogona lune igimiu nem vuihaqe.

²¹Ineu Bol nam uli leo veve garea ingere ngaha gina limeku siboku.

²²Tare ve ihine he tabe na Huqe tea, ingeie vin vilewahe dena God ko vin sala vagi tuei. Huqe gon vanai.

²³A hogogi noi noda Huqe i Jisas Kraes na toga mei gimiu.

²⁴A noku tabetabe na toga mei gimiu doluegi lui Jisas Kraes.