Read East Ambae 1 KOREN 2 Bible Online

1 KOREN 2 - East Ambae bible

1 KOREN 2

¹Retueku ko irehaqeku, lune ineu nau vonatu lobemiu huri ve nain waregi sere na hogo noi God hi mo toga hiligi lawe gimiu, ineu nahe laqa tea lo leo rau qaqaravu sige gina mataisao lawua.

²A hogo lune ineu nam toga mei gimiu, ineu nau lado utu ve nain geluvegi na gineu doluegi, huri ve a domiku na eno lui Jisas Kraes hogosie, ko hageliu a nona mateana lo gai saroutu.

³Siu lune ineu nau vanai lobemiu, ineu nau kekena ko nau matagu garagara ko nam ruru rurugi.

⁴Lo noku leo huhui sige a toretore ineu nahe laqa tea gina mataisao nona tangaloi vena revei na domimiu ve nen huri na havagineu hi ineu nam veve, nge nau veie gina huireana nona vui hogosie.

⁵Ko ineu nau veie mwere ngaha, huri ve a nomiu lado hogo vin eno lo huireana noi God, hatie lo mataisao nona tangaloi.

⁶Siu ineu nam laqa lo mataisao lawera hi a domire rau metue lo nora lado hogo. Nge a mataisao hi hatie dena ure ngaha sige denire hi ram huqegi goro na ure, a huqegi ngerehi a nora huireana mo tauvuigi mo salasala.

⁷Nam laqagi na gineu hiligiana talo mataisao noi God ngehi u teu hiliginie. Tomue siu a ure mobei tevuigi, i God u vei vagatai na matai sao ngaha huri ve vin vei roroagi gide.

⁸Ira lalawua goro talo ure ngaha rahe ilo vurugegi na gineu ngaha tea, ve rau ilo nase vai rain he toto vehavehagi na Huqe roroa tea.

⁹Nge mwerehi u uli lo Reve reve Gogona vena, “Hatie tangaloi gatagale ve u lehi na gineu ngaha, ko hatie tangaloi gatagale ve u rongo na gineu ngaha ko hatie tangaloi veu ilo ve a gineu ngaha vin vei.”

¹⁰Nge i God u haharagi na gineu ingere ngaha lawe gide lo Vui. A Vui mo hike wawahiligi na gineu doluegi ngerehi, hatie huri a gineu hiligiana hi mo eno lolo buei domi God.

¹¹?Ihine u ilo na domiana ngehi mo eno lo wai tangaloi. A tamateda hogosie ngehi mo toga lolo loloda u ilo na gineu doluegi huri gide, mwerehi vage a Vui noi God hogosie u ilo na gineu doluegi huri God.

¹²Nge i God u bete na nona Vui hi lawe gide. Giniehi, igide dahe domigi na gineu tea vena huri lo matahala gatagale mwerehi a sinobu talo ure ngaha ram domigi. Ngehi vage mo vai gide dam leo hogosi na vai garea ngerehi i God u bete lawe gide.

¹³A leo doluegi gam laqagi a Vui noi God u huhui gamai ginie, igamai gahe laqa tea lo mataisao nona tangaloi. Ko a Vui nge ngaha tau mo bului gamai gam huhui na sinobu ngerehi a Vui mo toga lure.

¹⁴A tangaloi a Vui he toga tea lune, he lai vurugegi na hogo tea ngerehi ram vonai dena Vui noi God. A tangaloi hi mo lado ve a gineu ngerehi rahe vovohoi tea ko ingeie vin he rong hogosie tea, a vevenagi a Vui hogosie vin veve huri ve rau vovohoi.

¹⁵Tare ve a Vui noi God mo toga lo tangaloi, ingeie vin ilo na hogo talo Vui, nge tare ve a Vui he toga tea lo tangaloi, ingeie vin he ilo na gineu ingere ngaha doluegi tea.

¹⁶Mwerehi a Reve reve Gogona mo veve vena, “?Ihine u ilo na domiana gogona nona Huqe? ?Ihine u vei lei ve vin huhuie?” Nge igide dam hakovi na domiana noi Kraes.