Read East Ambae 1 KOREN 5 Bible Online

1 KOREN 5 - East Ambae bible

1 KOREN 5

¹Ineu nau rongo na roro huri gimiu lavasigi rau esi u liu. A hogo, igimiu nem vai gineu rau esi u liu denire hi hatie duvi Israel. A tangaloi mo maturu mei gahorai tamana sibona.

²Igimiu nem sagesage gimiu nein haharagi, huri ve igimiu nei rongesi ko nein livu vohogi hine tea hi mo vai na gineu mwerehi.

³Ineu nahe toga tea mei gimiu lo tarabesigi. Nge nam toga mei gimiu lo Vui, ineu nau vevegi na tangaloi hi beno, ngehi u vei na galegaleasi hi mwerehi ve ineu tahi mei gimiu.

⁴Siu lune igimiu nem sone bubugi lo henai Huqe Jisas Kraes, ineu aiehi vage lo Vui ko a huireana noi Huqe Jisas Kraes.

⁵Igimiu nein siregi na tangaloi hi lawe Setan. A tarabesine vin sala, nge a tamatena vin mwaso lune a Huqe Jisas vin vanai taligu.

⁶Igimiu nein mese sagesage gimiu. ?Wa igimiu nehe ilo tea ve a Isi biti mo vai na fulaoa mo maraga?

⁷Igimiu nein tuli vohogi na Isi tatuei, siu huri igimiu nein mwere na bereti garaqa ngehi hatie Isi lolona ko ngehi a doridori nem toga lune siserigi ngaha. A noda natui sibsib huri na hale gagaliu i Kraes, ngehi u rugurugu ginie sibona beno.

⁸U garea ve igide da vai havuhevugi na rani hi. Nge tare a noda galegaleasi ko a doridoride hi rahe vovohoi tea, ram eno lude mosigei, ngehi mo haharagi ve igide dam mwere na bereti a Isi tatuei mo eno lolona. Igide da vai havuhevugi na rani hi gina bereti garaqa ngehi hatie Isi lolona, a bereti hi a togaana mwasara ko a hogo.

⁹Siu lo leta nau uli lawe gimiu, nau veve lawe gimiu ve nein mese virigi mena tangaloi ngerehi a doridorire rahe vovohoi tea mena vavine,

¹⁰Nge ineu nahe veve tea ve nein mese bulu mena tangaloi ngerehi rahe ilo Kraes tea, ram vai na doridori esi mena vavine, ram tarani na gineu vatahae, ram balubelu, vage ram huduhudu goro na tarabesi nunui gineu. Nge igimiu nein he vano beragi lai denire tea. Tare igimiu nem vai mwerehi, igimiu nein vano dena ure ngaha sibomiu.

¹¹Nge a iloiloi noku leo ingeie ngaha, ve nein mese bulu mei rahine tea ram veve huri ve ram ladohogo lui Kraes, nge ram galegaleasi mena vavine sige ram lado lawua, sige ram huduhudu goro na tarabesi nunui gineu sige ram balubelu, sige ram veve leo asi vovohoi na tangaloi, sige ram torongo. Igimiu nein mese toga ve nen gagani bubugi mena tangaloi mwerehi.

¹²Nge ineu hatie leogi meieu ve nain veveginire hi ram tino tavala varea dena warelue. I God vin veveginire. Nge igimiu nein vevegi lei na tangaloi lolo nomiu burigi hi ram galegaleasi lo matahala mwere ngaha? Mwerehi a Reve reve Gogona mo veve vena, “Nen tau vohogi na tangaloi galegaleasi den nomiu burigi.”