Read East Ambae 1 KOREN 6 Bible Online

1 KOREN 6 - East Ambae bible

1 KOREN 6

¹?Igimiu hi nem huri Kraes, tare a nomiu rongesi mei tuemiu tea, igimiu nein lei gimiu sibomiu vin vano lawe na vevegi ngehi rahe vovohoi tea lo nagoi God mwerehilogo? ?Huri havagineu nehe lado tea ve a sinobu noi God ran vevegi na nora vai vagasile sibora?

²A hogo, igimiu neu ilo ve a sinobu noi God rain vevegi na ure. Siu tare ve igimiu nein vevegi na ure, ?Wa igimiu nein he vai lei tea ve nein vevegi na rongesi hi rau biti?

³Lo taro mo vanai mosigei, igimiu neu ilo ve igide dain veveginire engsel, siu a hogo igide dain vevegi lei na gineu rau biti lo mwasoana ta gaqarigi ngaha.

⁴Tare ve a nomiu rongesi tea ve rain vano lo leo vevegi, ?Wa igimiu nein leo wahe na tangaloi tavala varea ngerehi rahe ilo na warelue tea?

⁵Ineu nam veve mwere ngaha ve na vaga maemaegi gimiu. A hogo a tangaloi tea mei gimiu u mataisao ve vin vevegi na rongesi hi mo eno lo livugara tangaloi lado hogo.

⁶Nge he garea tea ve a tangaloi lado hogo gatagale mo lai na tangaloi lado hogo tuegi mo vano lo kot ve a vevegi ngerehi rahe lado hogo tea gi God ve ran veveginie.

⁷Lune gatagale dein gimiu mo lai tuana vano lo kot, mo haharagi huri ve igimiu doluegi neu vagasile beno. U garea ve nen siregi ve ran lama gimiu ko ran balu nomiu vivilakogi.

⁸?Igimiu a hava tangaloi? Nem vui tuetue nge nehe bulu garea tea mei gimiu, vage igimiu nem balu dein gimiu sibomiu.

⁹?Wa igimiu nehe ilo tea ve a sinobu hi rau galegaleasi rain he lai na vai garea tea hi lolo ute noi God?

¹⁰Igimiu nein mese vagalengagi gimiu sibomiu. A mwera ram maturu mena vavine wagiwegineu, lavasigi ram huduhudu goro na god wagineu, a mwera rahe toga gogona tea lo nora lagiana sige a vavine rahe toga gogona tea lo nora lagiana, a mwera ram sogagi beture lawe na mwera taligu, a mwera ram maturu mena mwera taligu, ngerehi ram balubelu, ram lado lawua, ram torongo, ram veve leo kalikeli vovohoire lavasigi, a sinobu ngerehi rain he lai hougi na ute noi God tea.

¹¹Tuei beno igimiu lavasigi neu mwerehi, nge siserigi ngaha neu solo mwasaragi gimiu. U vei gogonagi gimiu, ko neu vovohoi lo nagoi God lo henai Huqe i Jisas Kraes ko a Vui noi noda God.

¹²Lalavasigi dein gimiu ram veve vena, “Igamai gain vei lei na gineu doluegi,” nge hatie ve a gineu doluegi rau garea meieu ve nain veire. “Igamai gain vei lei na gineu doluegi,” nge nain he siregi tea gineu ve na huqegi goroau.

¹³Igimiu nem veve vage vena, “A hinaga mo eno huri na taqangide ko a taqangide mo eno huri na hinaga.” Nge nam veve lawe gimiu i God vin vei vohoginire vunu. Igide dain he vai gineu esi tea gina tarabeside. Igide ve dain vei tabana ginire lawe na Huqe ngehi mo leo goro na tarabeside.

¹⁴I God vin vei ragasi gide sulo mwaso dena mateana gina managi hi teu, ngehi u ragasi na noda Huqe sulo mwasoana.

¹⁵?Wa igimiu nehe ilo tea ve a tarabesimiu a duvi tarabesi Kraes? ?Wa u garea meieu ve nain bulu bubugi na tarabesi Kraes talo tarabesi vavine hi mo sogagi tarabesine huri mane? Hatie. Hatie vohogi.

¹⁶Igimiu nein ilo ve ihine tea mo maturu mena vavine hi mo sogagi na betune huri mane ko mo bulu bubugi meie lo tarabesigi. Mwerehi a Reve reve Gogona mo veve vena, “Ingere gairue rom bulu bubugi rom voragi na tarabesigi gatagale.”

¹⁷Nge ihine tea mo bubugi mena Huqe, mo bulu bubugi meie lo Vui.

¹⁸Siu igimiu nen tino vagahao dena halai galegaleasi talo tarabesigi. A galegaleasi lavasigi hi a sinobu ram vaire tavala varea dena tarabesire, nge irahine hi ram galegaleasi gina tarabesire, ram galegaleasi gorora sibora.

¹⁹Igimiu nein ilo huri ve a tarabesimiu a vale mo eno lawe na Vui Gogona, ngehi mo eno lolo lolomiu. Igimiu neu lei na Vui Gogona dein God, siu igimiu nehe huqegi goro na tarabesimiu tea sibomiu, nge i God.

²⁰A vevenagi i God u voli tuguhi gimiu. Siu igimiu nein lado mava ginie gina tarabesimiu.