Read East Ambae 1 KOREN 9 Bible Online

1 KOREN 9 - East Ambae bible

1 KOREN 9

¹Ineu nau meriqe, nahe toga tea lo garovau. Ineu a gaihora. Ineu nau lehi Jisas a noda Huqe gina mataku siboku. Igimiu ra sinobu doluegi a mataleleoi noku tabana lawe na Huqe.

²Tare ve irahine tea wagineu bataha rain lado hogo tea ve ineu a gaihora, nge igimiu nein he vai lei tea mwerehi. Lune ineu nau waregi sere na Roro Garea lawe gimiu igimiu neu lado hogo lui Kraes, ko ngehi mo haharagi ve ineu a gaihora.

³Siu a tangaloi lavasigi ram tarani ve ran vevegieu, ineu nam duvi lawera mwere ngaha,

⁴?Wa hatie leo siregi lawe gamaru ve gori gagani sige gori inu tea gineu?

⁵?Wa hatie leo siregi lawe gamaru ve gori lei te vavine hi rau lado hogo gi gahoramaru ve gai dige bulu mwerehi ira gaihora lavasigi ram vai ko ira tuei Huqe ko i Bita?

⁶?Wa i gamaru toku Banabas hogosie hi ve gori tabana huri na gamaru hinaga?

⁷A soldia tea hi mo tabana lolo vuro, vin volie sibona. ?Wa tangaloi tea hi ve mo rivu na gineu huri ve vin he lai na mwasigi tea? Wa a tangaloi hi mo leo goro na kakarue lolo ara huri vin he ue lai tea ve na gani?

⁸Ineu nam veve ngaha, hatie lo huireana nona tangaloi, nge i God a nona Leohora mo veve mwerehi vage.

⁹U uli lo Leohora noi Mosis vena, “Lune a bulugi mo bile rasuresugi na toli wit nein mese vau bibi na singona, nein sireginie vin geni tea mwasi wit hi.” ?Wa i God u veve na leo ngaha u lado huri na bulugi hogosie? !Hatie!

¹⁰Ingeie u laqagi na leo ngaha garagaragi huri gide. Io, a Reve reve Gogona hi u ulie huri gide, a vevenagi mo veve vage vena, “Ihine mo rivu na talu ko ihine hi mo lai na mwasi hinaga lolo talu, ingere vunu roin lado tare ve roin lei na mwasigi huri na nora tabana.”

¹¹Lo nomai tabanagi u mwerehi ve gau rivu na toli Vui talolo talumiu, siu a mwasigi ngehi a nomiu togaana garea lui Kraes. ?Wa u gona mei gimiu huri ve nein betei na mwasi rivurivu lolo talumiu hi dam gani vataha bongi lawe gamai vena voragi gamai hinaga?

¹²Bataha a tangaloi lavasigi rau tatarise ve rain lei hinaga mwere ngaha dein gimiu, nge igamai gam lado ve gau tatarise u liu taligu denire. A hogo, huri ve u tatarise huri ve gain lei gineu dein gimiu, nge gahe vai tea. Huri gahe tarani tea ve gain tugoro na Roro Garea noi Kraes. Giniehi, hava gineu mava tea mo vanai, nge igamai gam rongribi meie.

¹³Igimiu neu ilo vurugegi huri ve irahine hi ram tabana lolo Valei God, a gara hinaga mo vanai dena vale hi ko irahine hi ram lalakogi lo tanoi rugurugu, ram lai na duvi gineu ngehi ram rugurugu ginie lo tanoi rugurugu.

¹⁴Lo matahala mwerehi teu, a Huqe u veve siaga ve irahine ram waregi sere na Roro Garea, rain lei na gara hinaga dena tabana hi.

¹⁵Ineu nahe lai na gineu tea vohogi deni gimiu, hatie huri u vovohoi meieu ve nain lei na gineu siu ineu nahe uli tea lawe gimiu siserigi ngaha ve nain lei na gineu. Ineu nam sageau huri na gineu gatagale hogosie, nge u garea ve ineu nain mate denie ve nain siregi ve ihine tea na lai vohoginie denieu.

¹⁶Nam waregi sere na Roro Garea hatie gineuhigi ve vin veieu nain sageau huri. Nam waregi sere na Roro Garea ngehi a muei noku tabana, huri ve nai veie vin he vagasile tea. Ko u esi garagara laweau tare ve nain he waregi sere na Roro Garea tea.

¹⁷Tare ve nam waregi sere na Roro Garea mo huri na noku tanoi leo wahe, a gaitawe mo eno hurieu, nge tare nam waregi sere na Roro Garea he huri na noku tanoi leo wahe tea, ngehi ineu nam vai na tabana mo huri mwerehi a leo u veve laweau hogosie. Ineu nahe tau na noku taro doluegi tea lo noku tabana hi nam waregi sere na Roro Garea.

¹⁸?Siu ineu nain lei na hava gaitawe? A noku gaitawe ingeie ngaha, ve lune ineu nam waregi sere na Roro Garea hatie huri ve nain lei na gai voli huri, nge huri ve nain waregi sere tabetabeginie.

¹⁹Ineu nahe toga vau tea lo vavai hine tea wagineu. Nge ineu nam vaieu siboku ve nan voragi tangaloi tabana vurogi lawe na sinobu doluegi huri ve nain qoragi leire vin sao.

²⁰Lawera duvi Israel, ineu nam dori mwere ve ineu a duvi Israel huri nain qoragi lei na duvi Israel vin sao. Ineu siboku nahe toga tea lo vavai Leohora gatagale. Nge lawe hine tea hi ram toga lo vavai Leohora ineu nam mwere na tangaloi hi mo toga lo vavai Leohora. Ineu nau vei mwere ngaha huri ve nain qoragi leire hi ram toga lo vavai Leohora.

²¹Lawe rahine hi rahe toga tea lo vavai Leohora. Ineu nam dori mwere na tangaloi he toga tea lo Leohora. Ineu nau veie mwere ngaha huri ve nain qoragi leire hi rahe toga tea lo vavai Leohora. Nge a hogo, ineu nahe vano tavala varea tea dena Leohora noi God. Ineu nam toga lo vavai Leohora noi Kraes.

²²Lawe rahine hi rau kekena lo nora ladohogo, ineu nam vaieu siboku huri ve nau kekena vage siu huri ve nain qoragi leire hi rau kekena lo nora ladohogo. Ineu nau vei leo ve nain vei na gineu doluegi huri ve nain qoragi leire lavasigi.

²³Ineu nau vei na gineu doluegi ingere ngaha huri na Roro Garea, a vevenagi ineu nam tarani ve nain lei na vai garea noi God lo tabana hi.

²⁴Igide dau ilo huri lo toatoa a tangaloi u sao ram toa, nge a tangaloi gatagale hogosie mo lai na gaitawe. Siu igimiu nen vai mwerehi, nen toga huri ve nei lei na gaitawe.

²⁵A tangaloi ngerehi ram toatoa ram kokogoro na gineu doluegi lo mwasoara siu huri ve ingere rain qoragi lei na gairorovi qetu nona ratahigi, a gairorovi qetu hi a gineuhi ureure ngehi mo voragi gaitawera hi mo eno mahogi qilodo hogosie, nge a noda gairorovi qetu ngehi vin he mabobo lai tea.

²⁶Ineu nahe toa tea haro, nge nam toa ve nai qoragi na gineu. Ineu nam qalo mwere na tangaloi hi u ilo na gilugilu ngehi mo tuli na limana vena hogo lo gineu, nge he tuli na limana tea vena vano mahava lo vurogi

²⁷Ineu nam huhui na tarabesiku ve na siaga huri ve ineu nain vei lei na gineu mwerehi nam taranie. Ineu nau ware na tangaloi u sao beno ve ran bulu meieu lolo toatoa hi, nge ineu nahe tarani tea ve vin teu vohogieu siboku dena toatoa hi