Read East Ambae 2 KOREN 1 Bible Online

2 KOREN 1 - East Ambae bible

2 KOREN 1

¹Ineu Bol a gaihora noi Jisas Kraes. Ineu nau voragi gaihora mo huri na taraniana noi God. I Timoti hi i tuada lui Kraes. Lawe na warelue lo togagi venue lawua Koren, ko lawe na sinobu doluegi noi God mo dali na togagi venue lawua hi Akaia.

²Ve i God i Tamada ko a Huqe i Jisas Kraes na bete na hogogi ko a tamwata lawe gimiu.

³Igide da vevegarea lawe God i tamai noda Huqe i Jisas Kraes, i tamada hi u hahagavi ko a God hi a buluiana doluegi mo vanai denie.

⁴Ingeie mo bului gamai vataha tarogi lune igamai gam toga lo rongesi, siu huri ve igamai gain vei lei ve gan bului rahine wagineu hi ram toga lo halai rongesi wagiwegineu, gina buluiana nge tauhi igamai gau leie dein God.

⁵Igamai gam bului mei Kraes lo nona rong-gagarasi u sao. Lo matahala mwerehi teu, a buluiana u sao mo vanai lawe gide lui Kraes.

⁶Tare ve igamai gam rong-gagarasi, ngehi huri i God vin vei mesurigi gimiu ko vagamwasoi gimiu, ko tare ve i God mo bului gamai ve gain rong garea, ingeie vin bului gimiu vage ve na vai gimiu nen hurie. Siu lo taro ve igimiu nein rong-gagarasi ware gamai, igimiu nein rong ribi, a domimiu vin he soi lai tea.

⁷A nomai lado tare huri gimiu u huire, igamai gam ilo huri ve igimiu nem bulu mei gamai lo nomai gagarasi ko lo buluiana hi gau lei.

⁸Retueku ko irehaqeku, igamai gam tarani ve igimiu ilo na gineu esi hi rau vei gagarasigi gamai lo vanue Esia. Igamai gau weli na gineu mava u sao aiehi, rau mava u liu u kakarani ve na quitabibi gamai, ko a nomai huireana hatie. Igamai gahe lado tea ve gain mwaso.

⁹A hogo igamai lolo lolomai sibomai gau lado hogo ve gain mate. Nge u vei mwerehi ve igamai gain mese lado talumei sibomai, nge ve gain lado talui God hogosie, ngehi u ragasire hi rau mate.

¹⁰I God u vagamwasoi gide dena matagute lawua talo mateana. Ingeie vin vaga mwaso tuturedugi gide. A noda ladotare mo eno lune, ko ingeie vin vagamwasoi gide taligu.

¹¹Ko igimiu nein bului gamai gina nomiu tataro. Siu a sinobu u sao rain veve garea huri gamai ve i God u vei gareagi gamai, a vevenagi lo ului nora tataro vatu saosao.

¹²A gineu gatagale mo vai gamai gam havuhevu lune. Ngehi ve lune gau haharagi na nomai vaivei garea lawe na sinobu lategi lolo ure, nge hageliu igimiu.

¹³Igamai gau uli na leta lawe gimiu ngehi ve nein velu leie ko nein rong hogosie. Ineu nam lado ve igimiu neu ilo na gineu lalavasigi huri gamai, nge ineu nam tarani ve igimiu nein ilo na gineu doluegi huri gamai, siu huri lo rovonai bongi lune a noda Huqe i Jisas Kraes vin vanai taligu, igimiu nein sage gimiu huri gamai, mwerehi vage igamai gain sage gamai huri gimiu.

¹⁵Ineu nau ilo na gineu doluegi ingere ngaha, giniehi, ineu nau lado rarai ve nain siro gimiu tomue. Lo matahala mwerehi, igimiu nein lei na vaigarea lo sirosiro vagarue denieu.

¹⁶Ineu nau lado rarai ve nain siro gimiu lo matahalaku ve nain vano Masedonia ko nain siro gimiu taligu lune nain tudori. Ineu nau tarani na buluiana dein gimiu huri na matahalaku hi ve nain vano Judia.

¹⁷?Wa igimiu nem lado ve a noku lado rarai ingere ngaha hatie iloilogi lune? ?Sige bataha igimiu nem lado ve nau vei na lado rarai ngaha mwerehi a ureure mo vai, huri hi ve nain veve ve ‘io, io,’ ko ‘hatie, hatie,’ lo tarogi gatagale tauhi?

¹⁸Tare ve igimiu nem lado hogo lai lui God, igimiu nein lado hogo lai vage lo gineu hi gau veve lawe ve ‘io,’ nge ‘hatie’ vohogi ve ‘io’ ko ‘hatie.’

¹⁹I Netui God, i Jisas Kraes, ngehi i Saelas ko i Timoti ko ineu, igamai gahe waregi sere tea lawe gimiu ve ‘io’ ko ‘hatie’ vagatagale. Lui Kraes a ‘io’ u eno tamwere.

²⁰A ‘io’ lo waratau noi God doluegi mo eno lui Kraes, ko lui Kraes igide dam veve ‘Amen’ huri na roroa noi God.

²¹Igimiu nein ladohaqe ve i God ingeie hi u vei gimiu ko igamai dam huire lui Kraes. I God u vei gide dam voragi nona sinobu leowahe.

²²U teu na nona gai gigilegi lude mo haharagi ve igide ira nona ko ingeie u teu na nona Vui lolo loloda huri ve a tanoi bilebile huri na gineu doluegi hi u warataugi teu.

²³Ineu nam navuhi God ve na labe buluieu huri ve ineu nahe kali tea. Ineu nahe vanatu tea tomue lo vanue Koren, huri nam rao ve nain vei asiesigi gimiu, nge nam tarani ve nain veie vin mesuri mei gimiu.

²⁴Igamai gahe tarani tea ve gain veie vin siaga mei gimiu ve gain vei na hava domdomi tea hi ve u vovohoi ve igimiu nein ladohogo lune sige ve a havagineu tea hi he vovohoi tea, hatie. A nomiu lado hogo u labe siaga beno. Nge igamai gam tarani ve gain tabana bubugi mei gimiu, ve gan vai gimiu nein rong garea.