Read East Ambae 2 KOREN 10 Bible Online

2 KOREN 10 - East Ambae bible

2 KOREN 10

¹Ineu Bol, nam navuhi gimiu gina ladobiti, ko gina lolo garea noi Kraes. A sinobu lavasigi ram veve huri ve ineu nam gato surigi mei gimiu lune nam toga lobemiu ko a leoku ram siaga lune ineu hatie lobemiu.

²Ingere ram lado ve igide dam toga mo huri na doridorinai ureure, nge ineu nau lado rarai ve nain gato siaga meire lune nain vanai. Ineu nam navuhi gimiu ve lune nain vanatu lobemiu, ineu nain gato siaga tea mwerehi lawe gimiu.

³Igide dam toga lolo ure, nge dahe qalo tea lo matahala gatagale mwerehi a ure mo qalo.

⁴Igide dam qalo lo lakoi vuro rau wegineu denire hi a ure mo qalo ginire. Igide a noda lakoi vuro a nora huireana mo vanai dein God ngehi vin ue vohogi na tanoi hilihili siaga nona tavului vuro. Igide dam ue vohogi na vuigaro nora sinobu.

⁵Ko a hava mavumevusui gineu garigerigi tea hi ram maraga lolo domire tangaloi ngehi mo tugoro hine tea ve na ilo God. Igamai gau haqea dena domire sinobu, gau vaire ram leahi na domire ko ram ronghuri Kraes.

⁶Igamai gam rarai ve gam vevegi hine tea tare he ronghuri tea. Nge tomue igamai gam tarani ve igimiu nein ronghuri vurugegi.

⁷Igimiu nem lehi na hogo. ?Wa igimiu nem lado ve igimiu a noi Kraes? Ngehi u garea, u vovohoi, nge igimiu nein dom hikehike siaga taligu lumiu sibomiu a vevenagi igamai ira noi Kraes mwerei gimiu vage.

⁸Huri ineu nahe maemae tea, hatie huri tare ineu nam sageau huri na huireana hi a Huqe u bete lawe gamai, a huireana ve na vai gimiu nein labe siaga ko hatie ve vin revesurigi gimiu.

⁹Ineu nahe tarani tea ve igimiu nein lado ve ineu nam vaileo ve na vaga matagutegi gimiu gina noku leta ingere ngaha.

¹⁰A sinobu lavasigi ram veve vena, “A leta noi Bol rau huire garagara ko rau mava, nge lune ingeie mo toga mei gide, ingeie u kekena. Ko a nona leo hatie gineu lune.”

¹¹Igimiu nein iloe mwere ngaha, ve igamai hatie mei gimiu siserigi ngaha, siu igamai gam gato mei gimiu lo leta ingere ngaha. Nge lune igamai tahi mei gimiu, igamai gain haharagi na huireana nge tauhi gau haharaginie lo nomai leta.

¹²Igamai gahe tarani tea ve gain tatarisegi gamai meire hi ram lado ve rau lalawua. Ingere ram tatariseginire sibora, ko ingere ram veveginire sibora ve rau mwere na havagineu. Ngehi mo haharaginie ve ingere a qature hatie gineu lolona.

¹³Nge igamai gain he sage gamai tea lo gineu ngerehi tavala varea dena tabana hi u betea lawe gamai ve gain veie. Igamai gain kokosi na nomai sagesage sulo tabana hi i God u betea lawe gamai, ko ngehi mo valu bubugi vage mena nomai tabana hi gau veie mei gimiu.

¹⁴Giniehi, lune gau vanatu lobemiu gahe vano tea vena liu na tovotovo hi tea huri igamai a muegi hi gau lei na Roro Garea lawe gimiu.

¹⁵Igamai gam kokosi na nomai sagesage huri na nomai tabana hogosie, nge hatie lo tabana hi a tangaloi wagineu rau vei. Igamai gam lado tare ve a nomiu ladohogo vin mauri vin huire. Igimiu nein bului na nomai tabana vin lawua, lawua vage.

¹⁶Igamai gam tarani ve gan waregi sere na Roro Garea lo maho mahogi wagineu dena nomiu togagi venue lawua. Igamai gahe tarani tea ve gain sage gamai huri na tabana hi u vei beno lo mahogi hi a tangaloi wagineu u tabana aie.

¹⁷Nge tare ve ihine tea mo tarani ve na sagea, vin sage laie huri na Huqe hogosie.

¹⁸Hatie ve ingeie hi ram veve sibora ve rau garea, huri ve a Huqe vin lei vurugeginire, nge ingere hogosie hi a Huqe mo lado ve rau garea.