Read East Ambae 2 KOREN 11 Bible Online

2 KOREN 11 - East Ambae bible

2 KOREN 11

¹Ineu nam tiehi gimiu ve nen siregi na taro laweau ve nan gato sagesageau tea biti. Hatie huri tare a tangaloi ram lehieu ve ineu a malalengagi, nge igimiu neu vei mwerehi beno.

²Ineu nam leohuri gimiu, ko nam tarani garagara ve nen voragi tangaloi noi God hogosie, vin hurie mwerehi ingeie mo tarani. Ineu nam lehi gimiu mwere na vavine taqalugu hi a matavono, ngehi nau waratau goroe ve vin legi mena tangaloi gatagale hogosie, igimiu hi ve nein legi mei Kraes hogosie.

³Nge ineu nam matagu ve vaiteu a domimiu mo vano salasala ko vin vei gimiu nein soi mwerei Iv u soi tomue, lo matahala mwerehi teu, a mwata u lamae gina nona kalikeli. Siu ineu nam matagu ve vaiteu nem siregi vohogi na nomiu doridori garea, ngehi igimiu nem tabe Kraes lo doridori hi u vovohoi ko u mwasara vurugegi.

⁴Igimiu nem rongribi mei hine tea mo vanai lobemiu ko mo waregi na tangaloi hi i Jisas u wegineu denie hi igamai gam waregi serea. Igimiu nem masinge ve nein lei vurugegi na vui sige a leogarea hi u wagineu dena Vui ko a Roro Garea hi neu leie dein gamai.

⁵Ineu nahe lado tea ve a tangaloi ngehi ram warera sibora ve ingere a gaihora, ve rau lawua garagara denieu.

⁶Nge hatie huri tare ve ineu nahe matue tea lo noku leo, nge nahe qilodo tea lo lolorani.

⁷Ineu nau waregi sere na Roro Garea lawe gimiu, nahe lai na gaivoli tea dein gimiu. Ineu nau vei hivogieu huri ve nain heu ragasi na henamiu. ?Wa igimiu nem lado ve ingeie hi he vovohoi tea?

⁸Ineu nau lei na gaivoli dena warelue lavasigi, a nora mane mo buluieu huri ve nain tabana lai lawe gimiu.

⁹Tare ve ineu nau tarani na gineu tea lune ineu nau toga mei gimiu, ineu nahe vai na rongesi tea lawe gimiu. Ira reretehigi hi rau vanai dena togagi venue lawua Masedonia, ingere rau buluieu lo noku tarani doluegi. Ineu nahe lado tea talumiu huri gineu tea gatagale, ko ineu nain he lado tea talumiu vohogi.

¹⁰Ihine tea lo vanue Akaea vin he tugoro lai na noku reteana tea huri na gineu ngaha, ngehi a hogo noi Kraes hi mo toga luku.

¹¹?Ko huri havagineu ineu nahe lado tea talumiu? ?Wa igimiu nem lado huri ve nahe tabe gimiu tea? I God u ilo huri ve ineu nau tabe gimiu.

¹²Ko ineu nain vano tuturedu nain vei na gineu hi nam vaie siserigi ngaha, a vevenagi ve ineu nan tarani ve na vai na sinobu ngerehi ran mese gato sagesagera. Ingere ram tarani ve rain veve ve a tabana hi igide dam tabanagi lune.

¹³A tangaloi mwerehi, ingere hatie gaihora hogo nge ram tabanagi kalikeli. Ingere ram dorire sibora ve ran mwereire gaihora noi Kraes.

¹⁴Ngehi igide dahe vutugegi tea huri. Hatie huri tare ve i Setan mo dorie sibona ve na mwere na engsel talo leleo.

¹⁵Siu igide dahe vutugegi tea tare a tangaloi tabanagi noi Setan ram vaire sibora ve ran mwereire tangaloi tabanagi hi ram tabana huri na matahala vovohoi. Nge lo vagasigi ingere rain lei na gaitawe vin huri na lalakogi hi rau vei.

¹⁶Ineu nam veve taligu lawe gimiu, he garea tea ve igimiu nein domigieu ve ineu a lengagi. Tare ve igimiu nem lado mwerehi, nen siregi laweau ve na vai na domiku mwere na tangaloi a lengagi, huri nain gato sagesageau tea biti lo nagomiu.

¹⁷A hogo a havagineu hi nam veve siserigi ngaha hatie gineu ve a Huqe mo horau ve nain veve. Nge ineu nam ronghogo siboku ve nam laqa mwere na tangaloi a lengagi.

¹⁸A sinobu u sao ram sara huri na mwasoana talo ure, siu ineu nain sageau vage.

¹⁹Huri igimiu neu mataisao, siu igimiu nein rongribi meire hi rau lenglengaga.

²⁰Igimiu neu rongribi beno meire tangaloi hi ram vai gimiu mwere na nora tangaloi tabana vurogi, sige ram balu nomiu gineu, sige ram lailei hageginire lo nagomiu, sige ram raba goro nagomiu. Igimiu nem siregi lawera ve ran vai lawe gimiu mwerehi.

²¹A tanoi maemae laweau ve nain veve na gineu ngaha, a vevenagi igamai gau wiriwiri ve gain vei na gineu ingere ngaha lawe gimiu. Nge tare ve ihine tea a domine u siaga ve vin gato sagesagea, Ineu a domiku u siaga ve nain gato mwere na lengai tangaloi.

²²?Wa ingere ta Hibru? Ineu vage. ?Wa ingere a duvi Israel? Ineu vage. ?Wa ingere den duvi Ebraham? Ineu vage.

²³?Wa ingere ram tabana lawe Kraes? Ineu nam tabana lawea u liu taligu. Ineu nam gato mwere na lengai tangaloi. Ineu nau tabana u huire taligu denire. Ineu nau toga lolo valei veuveu vatu sao. A betuku ram garasieu gina matai nora gaiteli u liu taligu denire. Vagasao u kakarani huri ve nain mate.

²⁴Vatu vagalime, ira duvi Israel rau vivihieu vaga ngavulu gaitolu domwagi gai siwo.

²⁵Lo taro wagiwegineu vagatolu rau wehieu gina gai. Lo taro gatagale u kakarani ve rain buguri vagamateau. Vagatolu ineu lolo aka hi rau tawaga ko lo taro gatagale denire hi, ineu neu halehale lategi lolo tahi huri bongi gatagale ko a rani gatagale.

²⁶Ineu nau dige lategi vatu saosao, u kakarani ve nain mate lolo wai lalawua hi ram hale u huire, ko lo limara uebalu, lo limara hi talo vanueku siboku ko lo limara hi hatie duvi Israel. U kakarani ve nain mate lolo togagi venue lalawua, lolo vanue vurogi, ko lolo tahi. U kakarani ve nain mate lo limara tangaloi hi ram kali ve ram huri Kraes.

²⁷Ineu nau tabana u huire garagara, ko vatu sao nahe maturu lei tea. Ineu nau mweruruhi ko nau madogu, ko vatu saosao ineu nahe gagani tea. A gamwadidi u wehieu ko hatie luqeku.

²⁸Ko ineu nahe veve na gineu lavasigi tea, nge vataha bongi nam rongoe ve nam wali na hakohako mava, huri a domiku mo taligi huri na warelue doluegi.

²⁹Lune ihine tea mo wiriwiri ko ineu nam wiriwiri vage, lune ihine tea mo soi lo galegaleasi, ineu a taqangiku mo horo gina hahagavi.

³⁰Tare ve ineu nain gato sagesageau, ineu nain sageau huri na gineu hi mo haharagi ve ineu nau kekena.

³¹Siu i God u ilo ve ineu nahe kali tea. Ingeie i God ko i tamai noda Huqe i Jisas Kraes, ko igide dain ware gareaginie vagi tuei.

³²Lune ineu nau toga lolo togagi venue lawua Damaskas, a huqegi u tabana lolo vavai ratahigi i Aretas u vei leo ve vin wiribibieu siu mo tau na soldia ram matagi goro na hugunei togagi venue lawua hi.

³³Nge ira noku buluiana ram siu torogieu lolo gete lo mahoi qetuqetui togagi venue lawua hi. Siu nam mwasikele vohogi dena huqegi.